༄༅། ། རྒྱ་གར་ཨ་རུ་ནཱ་ཅལ་མངའ་སྡེའི་སྤྱི་ཁྱབ་བློན་ཆེན་པདྨ་མཁའ་འགྲོ་མཆོག་གི་སྲིད་དོན་ཚོགས་པར་མངའ་སྡེའི་གྲོས་ཚོགས་ཀྱི་འོས་བསྡུའི་རྒྱལ་ཁ་ཐོབ་པར། དཔལ་ལྡན་བོད་མི་མང་སྤྱི་འཐུས་ཚོགས་གཞོན་སྒྲོལ་མ་ཚེ་རིང་མཆོག་གིས་གཞིས་བྱེས་བོད་མི་ཡོངས་དང་། སྐབས་བཅུ་བདུན་པའི་བོད་མི་མང་སྤྱི་འཐུས་ལྷན་ཚོགས་ཀྱི་ཚབ་ཞུས་ཏེ་དགའ་བསུའི་འཚམས་འདྲི་ཞུས་གནང་འདུག

དེ་ཡང་འཚམས་འཕྲིན་ནང་འཁོད་དོན། ད་ལན་འོས་བསྡུའི་ཁྲོད་རྒྱལ་ཁ་ཐོབ་པ་དེས་སྐུ་ཉིད་ཀྱི་དབུ་ཁྲིད་གནང་ཕྱོགས་ཀྱི་ནུས་པ་དང་། མི་མང་གིས་ཡིད་ཆེས་ཆེན་པོ་ཡོད་པ་གསལ་པོར་མཚོན་གྱི་ཡོད། སྐུ་ཉིད་ཀྱིས་རྒྱ་གར་དང་། ལྷག་པར་དུ་ཨ་རུ་ནཱ་ཅལ་མངའ་སྡེའི་ནང་རང་དོན་བློས་གཏོང་གིས་ཞབས་ཕྱི་གཟེངས་སུ་ཐོན་པ་ཞུས་ཡོད་པ་ནི་བསྔགས་འོས་སུ་གྱུར་ཡོད།

ཕྱི་ལོ་ ༢༠༢༢ ལོར་བོད་མི་མང་སྤྱི་འཐུས་ལྷན་ཚོགས་ཀྱི་སྐུ་ཚབ་ཚོགས་ཆུང་ཞིག་ཨ་རུ་ནཱ་ཅལ་མངའ་སྡེའི་ནང་ས་བགོས་ཕྱོགས་བསྐྱོད་ཕེབས་སྐབས། རྒྱ་གར་དབུས་དང་། མངའ་སྡེ་གཞུང་གཉིས་ནས་ད་བར་བོད་ཀྱི་བདེན་དོན་དང་། ས་གནས་བོད་མི་རྣམས་ལ་མཐུན་འགྱུར་རྒྱབ་སྐྱོར་གནང་བར་ཐུགས་རྗེ་ཆེ་ཞུ་སླད་སྐུ་ཉིད་མཆོག་མཇལ་འཕྲད་གནང་རྒྱུའི་གོ་སྐབས་བཟང་པོ་བྱུང་ཡོད།

ངས་སླར་ཡང་སྐུ་ཉིད་ལ་འཚམས་འདྲི་ཞུ་རྒྱུ་དང་། སྐུ་ཉིད་ཀྱི་ལས་ཡུན་རིང་མི་མང་གི་མངོན་འདོད་བསྒྲུབ་རྒྱུ་སོགས་ལས་དོན་མཐའ་དག་ལམ་ལྷོངས་ཡོང་བའི་སྨོན་འདུན་ཞུ་རྒྱུ་ཡིན་ཞེས་འཁོད་འདུག་པ་བཅས།།