༄༅། །ཕྱི་ལོ་ ༢༠༢༤ ཟླ་བ་ ༠༦ ཚེས་ ༢༡ ཉིན་ཉི་འོང་སྐུ་ཚབ་དོན་ཁང་གིས་རྒྱལ་སྤྱིའི་རྣལ་འབྱོར་དབུགས་སྦྱོང་ཉིན་མོ་སྲུང་བརྩི་ཞུ་ཆེད་དྲྭ་ཐོག་དབུགས་སྦྱོང་འཛིན་གྲྭ་ཞིག་གོ་སྒྲིག་ཞུས་ཡོད་པ་རེད།
དེ་ཡང་རྣལ་འབྱོར་དབུགས་སྦྱོང་གི་འཛིན་གྲྭར་ཉི་འོང་ས་གནས་འདྲ་མིན་ནས་དོན་གཉེར་བ་ཁག་ཅིག་ནས་མཉམ་ཞུགས་གནང་ཡོད་པ་དང་། ཚོགས་བཅར་བ་རྣམས་ལ་དགེ་བཤེས་བྱ་འཕུར་རིན་པོ་ཆེ་ནས་རྫོགས་པ་ཆེན་པོའི་ལུགས་ལྟར་རྣལ་འབྱོར་དབུགས་སྦྱོང་སློབ་ཁྲིད་གནང་ཡོད། དབུགས་སྦྱོང་འཛིན་གྲྭའི་ཐོག་མར་ཉི་འོང་སྐུ་ཚབ་དོན་གཅོད་ཨརྱ་ཚེ་དབང་རྒྱལ་པོ་ལགས་ཀྱིས་ཕེབས་བསུ་དང་སྦྲགས། སློབ་ཁྲིད་པ་བྱ་འཕུར་རིན་པོ་ཆེ་དང་གསུང་སྒྱུར་བ་ཏ་ཀི་ཤི་ཏ་ཡུ་རི་ལགས་ངོ་སྤྲོད་གནང་བའི་ཐོག རྣལ་འབྱོར་དབུགས་སྦྱོང་གི་ཉམས་ལེན་དེ་བཞིན་བན་བོན་གཉིས་ཀའི་ཉམས་ལེན་གྱི་སྙིང་པོ་ཡིན་པ་དང་། དེ་ཉིད་འཛམ་གླིང་ཕྱི་ལ་ངོ་སྤྲོད་ཉེ་ལམ་མ་གཏོགས་བྱུང་མེད་པས། ལམ་སྲོལ་དེ་ཉམས་ལེན་པའི་ཁྲོད་དུ་ཉམས་པ་མེད་པ་གནས་ཡོད་པ་གསལ་བཤད་གནང་། དེ་བཞིན་ཁོང་གིས་རྣལ་འབྱོར་དབུགས་སྦྱོང་ནི་ལུས་སེམས་གཉིས་ཀྱི་འཕྲོད་བསྟེན་ལ་ཕན་རླབས་ཆེན་པོ་ཡོད་པ་འགྲེལ་བརྗོད་གནང་ཡོད།
དེ་རྗེས་བྱ་འཕུར་རིན་པོ་ཆེས་དབུགས་སྦྱོང་ཐབས་ལམ་དགུ་དང་། ཀེག་སལ་ཟེར་བའི་རྣལ་འབྱོར་གྱི་ཉམས་ལེན། དེ་བཞིན་རྩ་རླུང་ཐིག་ལེའི་སྐོར་ངོ་སྤྲོད་གནང་རྗེས་འཛིན་གྲྭ་འགོ་བཙུགས་ཤིང་། སྐབས་དེར་ཁོང་གིས་རྩ་གཡས་དཀར་པོ་དང་། གཡོན་དམར་པོ། དབུས་སྔོན་པོ་བཅས་གསུམ་ངོ་སྤྲོད་དང་། དབུགས་སྦྱོང་དགུ་ཕྲུགས་ལ་བརྟེན་ནས་འདོད་ཆགས་དང་། ཁོང་ཁྲོ། མ་རིག་པ་ལྟ་བུའི་ཉོན་མོངས་རྣམས་ཇི་ལྟར་སྦྱོང་ཐུབ་ཚུལ་འགྲེལ་བརྗོད་གནང་བ་མ་ཟད། ཀེག་སལ་ལྔ་ནི་ལུས་ཀྱི་འཁོར་ལོ་ལྔ་མངོན་དུ་འབྱེད་པའི་ཆེད་ཉམས་ལེན་བྱེད་ཀྱི་ཡོད་པ་གསུངས།
སློབ་ཁྲིད་གྲུབ་རྗེས་ཚོགས་བཅར་བ་རྣམས་ནས་དབུགས་གཏོང་ལེན་ཇི་ལྟར་བྱེད་དགོས་པ་དང་། རྩ་ལམ་གྱི་གནས་ཚུལ། འབྱུང་བ་ལྔའི་བྱེད་ལས་སོགས་ཀྱི་སྐོར་ལ་བཀའ་འདྲི་ཞུས་པས། རིན་པོ་ཆེས་དབུགས་གཏོང་ལེན་བྱེད་སྐབས་ཕྱིའི་འབྱུང་བ་ལྔའི་ཁ་དོག་དང་། དེ་དག་གིས་ནང་གི་འབྱུང་བ་ལྔ་ལ་ཤུགས་རྐྱེན་ཇི་ལྟར་ཐེབས་པ། མཐར་དེ་དག་གིས་ལུས་ཀྱི་འབྱུང་བ་ལྔ་ལ་གསོས་འདེབས་ཇི་ལྟར་བྱེད་ཚུལ་སྐོར་ལན་འདེབས་གསལ་བཤད་གནང་།
བྱ་འཕུར་རིན་པོ་ཆེ་ནི་རྒྱ་གར་ཌོ་ལན་ཇིར་རྟེན་གཞི་བྱས་པའི་དཔལ་གཤེན་བསྟན་སྨན་རིའི་གླིང་གི་ཉམས་ལེན་ཡོད་པའི་དགེ་བཤེས་ཤིག་ཡིན་པ་དང་། ཁོང་གིས་གཡུང་དྲུང་བོན་དང་། རྫོགས་ཆེན། ནང་ཆོས་སྐོར་དཔེ་དེབ་མང་ཅིག་ལྗགས་རྩོམ་གནང་ཡོད་པ་མ་ཟད། ཁོང་གིས་ཨ་རིར་རྒྱལ་གཤེན་ཞང་བོད་སློབ་གཉེར་ཁང་དང་། བྱ་འཕུར་ཐེབས་རྩ་ཁང་དབུ་འཛུགས་གནང་ཡོད་པ་བཅས།།
