༄༅། །དེ་རིང་ཉི་འོང་གྲོས་ཚོགས་ནང་རྒྱ་ནག་དང་ཉི་ཧོང་གི་གཞུང་འབྲེལ་མ་ཡིན་པའི་ཚོགས་པ་ཁག་གི་གོ་སྒྲིག་འོག་རྒྱ་ནག་གནམ་བདེ་སྒོ་མོ་ཆེའི་དམར་གསོད་དོན་རྐྱེན་བྱུང་ནས་ལོ་ངོ་ ༣༥ འཁོར་བའི་དུས་དྲན་སྲུང་བརྩི་ཞུས་ཡོད།
སྐབས་དེར་སྐུ་ཞབས་ཨི་ཌེ་ཀེ་ཏ་རོ་(Ide Keitaro)ལགས་དང་། སྐུ་ཞབས་ཨོ་ཤིན་ཅུ་(Oshinchu)ལགས་གཉིས་ཀྱིས་མཛད་སྒོའི་གཙོ་སྐྱོང་དང་འབྲེལ། ཕྱི་ལོ་ ༡༩༨༩ ཟླ ༦ ཚེས ༤ ཉིན་གྱི་གནམ་བདེ་སྒོ་མོ་ཆེའི་དོན་རྐྱེན་གྱི་ལོ་རྒྱུས་མདོར་ཙམ་ངོ་སྤྲོད་གནང་རྗེས་གྲོས་ཚོགས་འཐུས་མི་ཟུར་པ་དང་དཔལ་འབྱོར་ལས་དོན་གྱི་བློན་ཆེན་གཞོན་པ་ཟུར་པ་མ་ཁི་ནི་སེའི་ཤུ་(Makino Seishu)ལགས་ཀྱིས་ཚོགས་ཞུགས་པ་ཚོར་དགའ་བསུ་ཞུས་ཏེ། མང་གཙོ་གལ་ཆེའི་རང་བཞིན་དང་། རྒྱ་ནག་དམར་ཤོག་ཚོགས་པས་རྒྱ་ནག་དང་བཙན་བཟུང་བྱས་པའི་ས་ཁུལ་ཁག་ཏུ་འགྲོ་བ་མིའི་ཐོབ་ཐང་དང་མང་གཙོ་ཉམས་རྒུད་དུ་བཏང་བ་དེར་ཁོང་གིས་ཡུན་རིང་ངོ་རྒོལ་གནང་སྐོར་དང་། དེ་བཞིན་རྒྱ་ནག་མི་མང་ཡོངས་རྫོགས་དང་རྒྱལ་སྤྱིའི་མང་གཙོ་ཚོགས་པ་རྣམས་ཆིག་སྒྲིལ་གྱིས་བཙན་གནོན་བྱེད་མཁན་གྱི་སྲིད་གཞུང་ལ་འཐབ་རྩོད་བྱས་ཏེ་རྒྱ་ནག་ལ་རང་དབང་དང་མང་གཙོ་སྐྲུན་དགོས་པའི་འབོད་སྐུལ་ཞུས།
ཚོགས་འདུའི་ཐོག་ཉི་འོང་སྐུ་ཚབ་དོན་གཅོད་ཨརྱ་ཚེ་དབང་རྒྱལ་པོ་ལགས་གསུང་བཤད་པར་མགྲོན་འབོད་གནང་དོན་ལྟར་ཆེད་ཕེབས་ཀྱིས་མཛད་སྒོ་གོ་སྒྲིག་གནང་མཁན་རྣམས་ལ་ཐུགས་རྗེ་ལེགས་འབུལ་ཞུས་པ་དང་ཆབས་ཅིག གནམ་བདེ་སྒོ་མོ་ཆེའི་དོན་རྐྱེན་གྱི་སྐབས་དང་དེའི་རྗེས་ལ་རྒྱ་ནག་དམར་ཤོག་ཚོགས་པའི་གདུག་རྩུབ་མྱོང་མཁན་རྣམས་ལ་བོད་མི་རྣམས་ཀྱི་ཚབ་ཞུས་ཏེ་ཐུགས་གསོ་ཞུས་པ་མ་ཟད། བོད་མི་དང་ལས་དབང་གཅིག་པའི་ཧོང་ཀོང་བ་དང་། ཐེའི་ཝན་མི་མང་ལ་གདུང་སེམས་མཉམ་སྐྱེ་ཞུས། དེ་བཞིན་ཁོང་གིས་མང་གཙོ་ནི་འགྲོ་བ་མིའི་ཐོབ་ཐང་ཡིན་པ་དང་། བོད་མི་ཚོས་རང་དབང་དང་མང་གཙོའི་དོན་དུ་རྒྱ་རིགས་ཆེད་གྲོགས་ཚོ་དང་མཉམ་དུ་འཐབ་རྩོད་བྱེད་བཞིན་ཡོད་ཅེས་དང་། ད་དུང་ཁོང་གིས་རྒྱ་ནག་དམར་ཤོག་ཚོགས་པས་བཤད་པ་ལྟར་མ་ཡིན་པར་བོད་མི་རྣམས་ཁ་བྲལ་རིང་ལུགས་པ་མིན་ལ་རྒྱ་ནག་ལ་ངོ་རྒོལ་བྱེད་མཁན་ཡང་མིན་ལ། བོད་རྒྱའི་མི་རིགས་མཐུན་སྒྲིལ་ལ་འཇིགས་སྣང་བྱེད་མཁན་རྒྱ་དམར་གུང་ཁྲན་ཏང་ཡིན་ཞེས་གསུངས། དེ་དང་འབྲེལ་ཏེ་ཁོང་གིས་རྒྱ་ནག་གཞུང་གིས་བོད་ཤར་ཕྱོགས་བླ་རུང་སྒར་དང་། ཡ་ཆེན་སྒར་སོགས་གཏོར་བཤིག་གཏོང་བཞིན་པ་འདི་ཡིས་རྒྱ་ནག་དམར་ཤོག་ཚོགས་པའི་ཁ་བྲལ་རིང་ལུགས་ཀྱི་བསམ་ཚུལ་མཚོན་གྱི་ཡོད་པ་གསལ་པོ་རེད་ཅེས་གསུངས་ཡོད།
ཚོགས་འདུའི་ནང་གསུང་བཤད་གནང་མཁན་གྱི་ཁྲོད་ཉི་འོང་རྒྱལ་སྤྱིའི་ཉེས་ཡངས་ཚོགས་པའི་སྐུ་ཞབས་ཀའི་ཏཱ་དའི་སུ་ཀེ་(Kitai Daisuke)ལགས་དང་། ཉི་ཧོང་ཡུ་གུར་ལྷན་ཚོགས་ཀྱི་སྐུ་ཞབས་ས་ཝུ་ཏི་མོ་ཧེ་མའེ་ཏེ་(Sawuti Mohemaite )ལགས། གསར་འགོད་པ་ཧ་རེ་མོ་ཏོ་ཧྲིན་(Harimoto Shin)ལགས། རྩོམ་པ་པོ་ལིའི་ཀོ་མཱ་ཀི་(Lee Komaki)ལགས་བཅས་ཕེབས་ཡོད། ཁོང་ཚོ་ཚང་མས་རྒྱ་ནག་དམར་ཤོག་ཚོགས་པའི་དབང་སྒྱུར་འོག་གི་དྲག་གནོན་ཆེ་བའི་ཁོར་ཡུག་སྐོར་དང་། རྒྱ་ནག་དང་། ཨེ་ཤི་ཡ། འཛམ་གླིང་ནང་ཞི་བདེ་དང་བརྟན་བརླིང་ཡོང་བར་རྒྱ་ནག་ནང་མང་གཙོ་གལ་ཆེན་ཡིན་པའི་སྐོར་སོགས་གསུངས། གཞན་ཡང་ཚོགས་འདུའི་ཐོག་རང་དབང་ལ་རྒྱབ་སྐྱོར་དང་རྒྱ་ནག་དམར་ཤོག་ཚོགས་པའི་སྲིད་དབང་གདུག་རྩུབ་ཅན་དེར་སྐྱོན་བརྗོད་བྱེད་པའི་གསུང་འཕྲིན་ཁག་ཅིག་འགྲེམས་སྤེལ་བྱས་ཡོད།
ཚོགས་འདུ་རིམ་པ་གཉིས་པའི་ནང་ཊོཀ་ཁྱོ་གཙུག་ལག་སློབ་གཉེར་ཁང་གི་སློབ་དཔོན་ཆེན་མོ་ཨ་ཁོ་ཊོ་མོ་ཀོ་(Ako Tomoko)ལགས་ཀྱིས་ཕྱོགས་སྒྲིག་གནང་བའི་བརྙན་ཐུང་ཞིག་བསྟན་ཞིང། དེའི་ནང་ཧོང་ཀོང་གིས་མང་གཙོའི་འཐབ་རྩོད་བྱས་ཚུལ་དང་དེ་ལ་གདུག་རྩུབ་ཀྱིས་དྲག་གནོན་ཇི་ལྟར་བྱས་པའི་སྐོར་བསྟན་ཡོད། བརྙན་ཐུང་དེའི་ནང་གཙོ་བོ་མང་གཙོ་དོན་གཉེར་བ་ལྕམ་ཆའུ་ཧང་ཏུང་(Chow Hang-Tung)ལགས་ཀྱི་སྐོར་བགྲོ་གླེང་བྱས་ཡོད་ལ། ཁོང་མོ་ནི་ད་ལྟའང་བཙོན་ཁང་དུ་མནར་གཅོད་མྱོང་བཞིན་ཡོད། དེ་རྗེས་ཧི་ར་ནོ་ཡུ་རུ་(Hirano Yuru)ལགས་ཐེ་བའི་གསུང་བཤད་པ་གཞན་རྣམས་ཀྱིས་དམར་ཤོག་ཚོགས་པས་ཧོང་ཀོང་གི་ཞི་བདེ་དང་། དར་རྒྱས། མང་གཙོའི་ཐོབ་ཐང་བཅས་ཇི་ལྟར་འཕྲོག་བཅོམ་བྱས་པའི་སྐོར་བགྲོ་གླེང་གནང་ཡོད།
མཛད་སྒོའི་མཇུག་ཏུ་རྒྱ་ནག་དམར་ཤོག་ཚོགས་པའི་སྲིད་དབང་འོག་སྡུག་སྦྱོང་མནར་གཅོད་མྱོང་མཁན་ཚོའི་ཆེད་མར་མེ་ཁྲོམ་སྐོར་གནང་ཡོད་པ་བཅས།།
