༄༅། །ཕྱི་ལོ་ ༢༠༢༤ ཟླ ༠༦ ཚེས་ ༠༣ ཉིན་བཞིའི་ཚད་མའི་ཐོག་གཞུང་ཆེན་རིས་མེད་བགྲོ་གླེང་ལྷན་ཚོགས་ཐེངས་བདུན་པ་བཀྲིས་ལྗོངས་ཁམས་པ་སྒར་འབྲུག་མཐོ་སློབ་དྷརྨ་ཀཱ་རའི་གཙུག་ལག་སློབ་གཉེར་ཁང་དུ་དབུ་འཛུགས་གནང་འདུག
ཆོས་རིག་ལས་ཁུངས་ནས་གོ་སྒྲིག་ཞུས་པའི་རིས་མེད་བགྲོ་གླེང་ཐེངས་བདུན་པའི་བརྗོད་གཞི་ཚད་མའི་གཞུང་ལུགས་ཀྱི་བསྟན་དོན་འགའ་ཞིག་གི་ཐད་རིས་མེད་ཆོས་སྡེ་ཁག་གི་མཁན་སློབ་དགེ་བཤེས་གྲངས་བཅོ་བརྒྱད་ནས་དཔྱད་རྩོམ་བགྲོ་གླེང་གནང་རྒྱུ་ཡིན་འདུག གཞུང་ཆེན་རིས་མེད་བགྲོ་གླེང་ལྷན་ཚོགས་ཐེངས་བདུན་པ་བཀྲིས་ལྗོངས་ཁམས་པ་སྒར་འབྲུག་མཐོ་སློབ་དྷརྨ་ཀཱ་རའི་གཙུག་ལག་སློབ་གཉེར་ཁང་དུ་ཇི་ལྟར་རེ་བསྐུལ་ཞུས་པ་བཞིན་ཞལ་བཞེས་ཐོབ་སྟེ་གོ་སྒྲིག་གནང་ཡོད་པ་དང་། བགྲོ་གླེང་དབུ་འབྱེད་མཛད་སྒོའི་སྐུ་མགྲོན་གཙོ་བོར་ཁམས་པ་སྒར་དཔལ་ཕུན་ཚོགས་ཆོས་འཁོར་གླིང་གི་དབུ་འཛིན་སྐྱབས་རྗེ་ཁམས་སྤྲུལ་རིན་པོ་ཆེ་མཆོག་དང་། དམིགས་བསལ་སྐུ་མགྲོན་བོད་མིའི་སྒྲིག་འཛུགས་ཆོས་རིག་ལས་ཁུངས་ཀྱི་དྲུང་འཕར་ཀུན་དགའ་རྒྱལ་མཚན་ལགས། ཁམས་པ་སྒར་འབྲུག་མཐོ་སློབ་དྷརྨ་ཀཱ་རའི་གཞུང་ཆེན་རིས་མེད་བགྲོ་གླེང་ཐེངས་བདུན་པའི་གོ་སྒྲིག་ཚོགས་ཆུང་གི་ཚོགས་གཙོ་མཁན་པོ་བསོད་ནམས་དབང་རྒྱལ་ལགས། དབུ་བཞུགས་ཐོག་བགྲོ་གླེང་ལ་དངོས་སུ་མཉམ་ཞུགས་གནང་མཁན་དགོན་ཁག ༣༢ ནས་དགེ་འདུན་པ་དང་བཙུན་མ་གྲངས་ ༢༥༠ ཕེབས་ཡོད།
སྐབས་དེར་ཆོས་རིག་དྲུང་འཕར་ཀུན་དགའ་རྒྱལ་མཚན་ལགས་ཀྱིས་གཞུང་ཆེན་རིས་མེད་བགྲོ་གླེང་གི་རྒྱབ་ལྗོངས་ལོ་རྒྱུས་དང་། བགྲོ་གླེང་ཚོགས་འདུ་འདི་བརྒྱུད་གཡུང་དྲུང་བོན་ཐེ་བའི་བོད་བརྒྱུད་ནང་བསྟན་གྱི་ཆོས་བརྒྱུད་ཕན་ཚུན་དབར་ལྟ་བ་དགོངས་ཚུལ་བརྗེ་ལེན་གནང་རྒྱུའི་གོ་སྐབས་བཟང་པོ་ཐོབ་ཀྱི་ཡོད་ཚུལ་ངོ་སྤྲོད་གནང་རྗེས་སྐྱབས་རྗེ་ཁམས་སྤྲུལ་རིན་པོ་ཆེ་མཆོག་གིས་བགྲོ་གླེང་འཚོགས་འདུ་དང་འབྲེལ་བའི་གསུང་བཤད་གནང་། རིན་པོ་ཆེ་མཆོག་གིས་རྒྱ་གར་ཆོས་ཀྱི་འབྱུང་གནས་ནས་མདོ་བསྔགས་ལུང་རྟོགས་ཀྱི་བསྟན་པ་རིན་པོ་ཆེ་བོད་གངས་ཅན་གྱི་ལྗོངས་སུ་དར་ཞིང་འཕེལ་ཚུལ་དང་། ལུང་རྟོགས་ཀྱི་བསྟན་པ་རིན་པོ་ཆེར་ཐོས་བསམ་སློབ་གཉེར་གནང་ཚུལ་སྐོར་ལམ་སྟོན་བཀའ་སློབ་གནང་ཡོད། 
ཆོས་རིག་ལས་ཁུངས་ནས་གཙོ་བོ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཆོས་ཚོགས་ཐེངས་བཅུ་གཅིག་ཐོག་ཕེབས་པའི་བཀའ་སློབ་དགོངས་དོན་དང་། བོད་ཀྱི་ཆོས་བརྒྱུད་དབར་མཐུན་འབྲེལ་དང་། གུས་བརྩི། ཆོས་སྡེ་ངོ་སྤྲོད་ཡོང་རྒྱུ་སོགས་ལ་དམིགས་ཏེ་ཕྱི་ལོ་ ༢༠༡༥ ནས་བཟུང་བསྐོང་ཚོགས་གནང་བཞིན་པ་རེད།
འཕགས་ཡུལ་བཀྲ་ཤིས་ལྗོངས་གདན་ས་ཁམས་པ་སྒར་གྱི་བཤད་གྲྭ་ཁམས་སྒར་འབྲུག་མཐོ་སློབ་དྷརྨ་ཀཱ་ར་ནི། ༸རྒྱལ་བ་མདོ་ཁམས་པའི་གདན་ས་བཞི་པ་དེ་ཡིན་ཞིང་། ༸རྒྱལ་མཆོག་མདོ་ཁམས་བརྒྱད་པ་བསྐལ་བཟང་དོན་བརྒྱུད་ཉི་མས་གནས་ཆེན་ཉེར་བཞིའི་ཡ་གྱལ་སྤྱི་བོ་ཛལེནྡཱ་རའི་ཉེ་འཁྲིས་སུ་ཕྱི་ལོ་ ༡༩༦༦ ལོར་ཕྱག་བཏབ། ཐོག་མར་རྒྱ་གར་དུ་ཕེབས་རྗེས་ཀ་སྦུག་ཏུ་གནས་སྐབས་བཞུགས་ཤིང་། དེར་བཤད་སྒྲུབ་འཁོར་ལོ་གསུམ་གྱི་མཛད་པ་བླ་ན་མེད་པ་བསྐྱངས་རྗེས་ས་གནས་ཀང་ར་རྫོང་ཁོངས་ད་ལྟའི་བཀྲ་ཤིས་ལྗོངས་དང་ཉེ་བ་བྷུ་ནུ་རིས་ལ་ཡང་གནས་སྐབས་ཙམ་དུ་བསྟན་རྒྱུན་ལ་ཕན་ངེས་ཀྱི་མཛད་པ་བསྐྱངས་ཏེ་སླར་ཡང་ཧི་མཱ་ཅལ་ཅམ་པ་རྫོང་ཁོངས་སུ་ཡོད་པའི་ཌཱལ་ཧའུ་སི་ཞེས་པའི་ས་གནས་སུ་ཡང་དེ་མཚུངས་ཀྱིས་མཛད་པ་བསྐྱངས་ཏེ། མཐར་ཕྱི་ལོ་ ༡༩༦༨ ལོར་བཀྲ་ཤིས་ལྗོངས་སུ་གདན་ས་གཏན་འཇགས་གནང་ཡོད། ཕྱི་ལོ་ ༢༠༢༣ ཟླ་ ༩ ཚེས་ ༢༧ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཁམས་སྒར་འབྲུག་མཐོ་སློབ་དྷརྨ་ཀཱ་རའི་གཙུག་ལག་སློབ་གཉེར་ཁང་འདིའི་རྟེན་དང་བརྟེན་པ་བཅས་གསར་བཞེངས་ལེགས་གྲུབ་བྱུང་བར་དབུ་འབྱེད་ལྷ་དར་མདུད་གྲོལ་དང་རབ་གནས་བཀའ་དྲིན་ཆེ་བ་མཛད་ཡོད་པ་བཅས།། 
