༄༅། །བོད་དོན་གོ་རྟོགས་དང་ཞུ་གཏུག་ལས་གཞི་ཡར་རྒྱས་གཏོང་ཐབས་སུ་བོད་མིའི་སྒྲིག་འཛུགས་ཕྱི་དྲིལ་ལས་ཁུངས་དང་ཁྱབ་ཁོངས་བྱང་ཨ་རིའི་སྐུ་ཚབ་དོན་ཁང་མཉམ་སྦྲེལ་གྱིས་ཁེ་ན་ཊའི་བོད་རིགས་གཞོན་སྐྱེས་རྣམས་ལ་བོད་དོན་ཞུ་གཏུག་གནང་ཕྱོགས་ཀྱི་ཟབ་སྦྱོང་དབུ་འཛུགས་གནང་ཡོད།
དེ་ཡང་ཟབ་སྦྱོང་དབུ་འབྱེད་མཛད་སྒོའི་ཐོག་བྱང་ཨ་རིའི་སྐུ་ཚབ་དོན་ཁང་གི་རྒྱ་རིགས་འབྲེལ་མཐུད་པ་ཚུལ་ཁྲིམས་རྒྱ་མཚོ་ལགས་ཀྱིས་ཚོགས་བཅར་བ་རྣམས་ལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་དགོངས་པ་གཞིར་བཟུང་བོད་མིའི་སྒྲིག་འཛུགས་ཀྱི་སྲིད་བྱུས་དང་། སྒྲོམ་གཞི་ངོ་སྤྲོད། ཕྱི་དྲིལ་བོད་དོན་ཞུ་གཏུག་ཚན་པའི་འབྲེལ་ལས་བསྟན་འཛིན་ཀུན་མཁྱེན་ལགས་ནས་བཀའ་ཤག་སྐབས་བཅུ་དྲུག་པའི་ལས་གཞི་དང་བླངས་བོད་དོན་ཞུ་གཏུག་ལས་འགུལ་གྱི་དམིགས་ཡུལ་དང་། ལས་དོན་བྱེད་ཕྱོགས། གྲུབ་འབྲས་སོགས་ཀྱི་སྐོར་འགྲེལ་བརྗོད་གནང་གྲུབ་མཚམས་ཁེ་ན་ཊ་བོད་དོན་ལྷན་ཚོགས་ཀྱི་ངེས་སྟོན་པ་ཤེས་རབ་མཐར་ཕྱིན་ལགས་ནས་བོད་ནང་གི་འགྲོ་བ་མིའི་ཐོབ་ཐང་ཆེད་ཁེ་ན་ཊ་བོད་དོན་ལྷན་ཚོགས་ངོས་ནས་ཞུ་གཏུག་གནང་ཕྱོགས་ངོ་སྤྲོད་དང་སྦྲགས། བོད་དོན་ཞུ་གཏུག་སྐབས་སུ་གདོང་ལེན་བྱ་དགོས་ཇི་ཡོད་དང་། ཞུ་གཏུག་ཐབས་བྱུས་སོགས་ཀྱི་སྐོར་རང་ཉིད་ཀྱི་ཉམས་མྱོང་ལ་གཞི་བཅོལ་ནས་འགྲེལ་བརྗོད་ཞིབ་ཕྲ་གནང་ཡོད།
དེ་ནས་འབུམ་རམས་པ་རྒྱལ་ལོ་ལགས་ཀྱིས་རྒྱ་ནག་གཞུང་གིས་མི་རིགས་བཙན་སྒྱུར་གྱི་སྲིད་བྱུས་དང་། རྒྱབ་ལྗོངས་དམིགས་ཡུལ་སོགས་ངོ་སྤྲོད་ཞིབ་ཕྲ་གནང་བ་དང་ཆབས་ཅིག རྒྱ་ནག་གཞུང་གིས་བོད་ནང་འཛུགས་སྐྲུན་ཡར་རྒྱས་གཏོང་བཞིན་པ་དེ་ནི་རྒྱ་ནག་གཞུང་གི་བོད་མིའི་འགྲོ་བ་མིའི་ཐོབ་ཐང་རྡོག་རོལ་ཚད་མེད་བཏང་དང་གཏོང་བཞིན་པ་རྣམས་སྦེད་སྐྱུང་གིས་བོད་མིའི་ཡིད་ཆེས་འཐོབ་ཐབས་ཀྱི་བྱུས་ངན་ཡིན་པ་ཐེར་འདོན་གནང་བའི་ཐོག རང་ཉིད་ཀྱི་འཚོ་བའི་ཉམས་མྱོང་དང་སྦྲགས་ཏེ་བོད་ནང་གི་མི་སེར་སྤེལ་ཡུལ་གཏན་འཇགས་སློབ་གྲྭའི་ནང་བོད་མི་རྒྱ་རིགས་སུ་བསྒྱུར་རྒྱུའི་ཚབས་ཆེའི་ལས་གཞི་སྤེལ་བཞིན་པའི་སྐོར་འགྲེལ་བརྗོད་གནང་ཡོད།
ཚོགས་ཐུན་བཞི་པར་སྤྱི་ཚོགས་དྲང་བདེན་དང་མང་གཙོ་ཚོགས་པའི་ཚོགས་གཙོ་ཡུ་ནི་ཕར་སེམ་གིན་ཊིན་ལགས་དང་ཝི་ནི་ལགས་ཀྱིས་འགྲོ་བ་མིའི་ཐོབ་ཐང་དང་། འཐབ་རྩོད་ཕན་ཚུན་མཉམ་ལས་གནང་ཕྱོགས། དེང་སྐབས་ཞུ་གཏུག་བྱེད་སྐབས་ཀྱི་དཀའ་ངལ་དང་གོ་སྐབས་སོགས་ཀྱི་སྐོར་ངོ་སྤྲོད་དང་དོགས་འདྲི་ཁག་ལ་ལན་འདེབས་གནང་རྗེས་ཚོགས་བཅར་བ་རྣམས་སྡེ་ཚན་ལྔ་རུ་བགོས་སྟེ་ཁེ་ན་ཊའི་ནང་བོད་དོན་ཞུ་གཏུག་བྱེད་ཕྱོགས་སྐོར་གོ་བསྡུར་དང་ལག་ལེན་འཆར་གཞི་འཆར་འགོད་གནང་ཡོད།
ཕྱི་དྲོ་ཨ་རི་དོན་ཁང་གི་རྒྱ་རིགས་འབྲེལ་མཐུད་པའི་གཙོ་སྐྱོང་འོག་ཁེ་ན་ཊ་གནས་སྡོད་བོད་རིགས་དང་རྒྱ་རིགས་གཞོན་སྐྱེས་བར་བགྲོ་གླེང་བསྐོང་ཚོགས་གནང་སྟེ། རྒྱ་རིགས་དང་། ཡུ་གུར། ལྷོ་སོག་གཞོན་སྐྱེས་ཁག་ཅིག་ལྷན་ཞུགས་ཀྱིས་བོད་རིགས་གཞོན་སྐྱེས་ལྷན་དུ་རྒྱ་ནག་གི་ཆབ་སྲིད་དང་། བོད་ཀྱི་མ་འོངས་གནས་བབ་སྐོར་བགྲོ་གླེང་གནང་སྟེ་ཟབ་སྦྱོང་ཉིན་དང་པོ་ལེགས་པར་མཇུག་སྒྲིལ་ཡོད་པ་བཅས།། 
