༄༅། །འདི་གར་ཀ་སྦུག་བོད་མིའི་ས་གནས་འགོ་འཛིན་ལས་ཁུངས་ནས་བཏང་གནས་ནང་འཁོད་དོན། ཕྱི་ལོ་ ༢༠༢༤ ཟླ་བ་ ༠༦ ཚེས་ ༢༤ ཉིན་ཀ་སྦུག་ས་གནས་འགོ་འཛིན་གསར་པ་ཚེ་བརྟན་ལགས་དང་། ས་གནས་འགོ་འཛིན་ལས་ཚབ་ལས་དྲུང་བསྟན་འཛིན་ཆོས་དབྱིངས་ལགས་རྣམ་གཉིས་བར་རྩིས་ལེན་རྩིས་སྤྲོད་གནང་ཡོད།
དེ་ཡང་བོད་མིའི་སྒྲིག་འཛུགས་ནང་སྲིད་ལས་ཁུངས་ཀྱི་སྐུ་ཚབ་སྒང་ཏོག་ས་གནས་འགོ་འཛིན་དོན་གྲུབ་བཟང་པོ་ལགས་ཀྱིས་སྤྲོད་དཔང་གནང་ཐོག་ཀ་སྦུག་ས་གནས་འགོ་འཛིན་ལས་ཁང་དང་། རྒས་གསོ་ཁང་། ལས་ཤག་བཅས་ཀྱི་ཡིག་ཕེལ་དང་ཅ་དངོས་རྣམས་རྩིས་སྤྲོད་ཞུས། ཕྱི་ཟླ་ ༠༦ ཚེས་ ༢༥ ཉིན་གྱི་སྔ་དྲོ་ཆུ་ཚོད་ ༩༌༣༠ ཐོག་ས་གནས་འགོ་འཛིན་ལས་ཚབ་ལས་དྲུང་བསྟན་འཛིན་ཆོས་དབྱིངས་ལགས་དང་ས་འགོ་གསར་པ་ཚེ་བརྟན་ལགས་དབར་ཞབས་སྟེགས་བརྗེ་ལེན་གྱི་མཛད་སྒོར་ཆེད་དུ་ཕེབས་པའི་ས་གནས་འཐུས་ཚོགས་ཀྱི་ཚོགས་གཙོ་དང་། ས་གནས་རང་བདེན་ཚོགས་ཆུང་གི་ཚོགས་གཙོ། སམ་བྷོ་ཊ་སློབ་གྲྭའི་རེག་ཊར། གཞན་ཡང་ས་གནས་ཀྱི་གཞུང་དང་གཞུང་ཁོངས་མིན་པའི་ཚོགས་པ་ཁག་གི་ཚོགས་གཙོ་བཅས་ཚང་འཛོམས་ཐོག་ས་གནས་འགོ་འཛིན་ལས་ཚབ་ལས་དྲུང་དང་ས་འགོ་གསར་པ་རྣམ་གཉིས་ལ་རྟེན་འབྲེལ་མཇལ་དར་སྒྲོན་ཏེ་ས་གནས་འགོ་འཛིན་ལས་ཚབ་ལས་དྲུང་བསྟན་འཛིན་ཆོས་དབྱིངས་ལགས་ནས་ས་གནས་འགོ་འཛིན་གསར་པའི་ངོ་སྤྲོད་དང་། ལས་དོན་མཇུག་སྐྱོང་དང་འབྲེལ་གསུང་བཤད་གནང་ཡོད། དེ་ནས་ས་གནས་འགོ་འཛིན་གསར་པ་ཚེ་བརྟན་ལགས་ནས་འཚམས་འདྲིའི་གསུང་བཤད་གནང་དང་ནང་སྲིད་སྐུ་ཚབ་སྒང་ཏོག་ས་གནས་འགོ་འཛིན་དོན་གྲུབ་བཟང་པོ་ལགས་ནས་སྤྲོད་དཔང་གི་གཟིགས་ཚུལ་གསུང་བཤད་གནང་། མཐར་ས་གནས་འགོ་འཛིན་ལས་ཁུངས་ཀྱི་རྩིས་པས་ཐུགས་རྗེ་ཆེ་ཞུའི་གསུང་བཤད་གནང་ཡོད་པ་བཅས། །
