༄༅། །ཕྱི་ལོ་ ༢༠༢༤ ཟླ་བ་ ༥ ཚེས་ ༣ ཉིན་ཨོ་གླིང་སྐུ་ཚབ་དོན་གཅོད་ཀརྨ་སེངྒེ་ལགས་ཨོ་གླིང་མངའ་སྡེ་ཝིག་ཊོ་རི་ཡ་ཁུལ་གནས་སྡོད་བོད་རིགས་སློབ་ཕྲུག་རྣམས་ལ་བོད་ཀྱི་སྐད་ཡིག་དང་། རིག་གནས་བཅས་སློབ་ཁྲིད་ཆེད་ཝིག་ཊོ་རི་ཡ་གཟའ་མཇུག་བོད་ཡིག་སློབ་གྲྭ་དང་ཝིག་ཊོ་རི་ཡ་ལྷོ་ཤར་གཟའ་མཇུག་བོད་ཡིག་སློབ་གྲྭ་གཉིས་ཡོད་ལ་ཆེད་ཕེབས་ཀྱིས་སློབ་ཕྲུག་དང་། དགེ་ལས། ཕ་མ་བཅས་ཐུགས་འཕྲད་ཀྱིས་བོད་པའི་མི་རབས་གསར་པ་གཞོན་སྐྱེས་ཚོ་ལ་བོད་མི་རིགས་ཀྱི་ཐུན་མོང་མ་ཡིན་པའི་ཆོས་དང་། རིག་གཞུང་། སྐད་ཡིག བོད་མིའི་གོམས་གཤིས་ཡ་རབས་སྤྱོད་བཟང་བཅས་སློབ་འཁྲིད་གནང་རྒྱུ་གལ་ཆེ་ཡིན་སྐོར་དང་། དེ་བཞིན་ཕ་མ་སོ་སོའི་ངོས་ནས་རང་ཉིད་ཀྱི་ཕྲུག་གུར་བོད་ཀྱི་སྐད་ཡིག་ལ་དོ་སྣང་ཡོང་ཐབས་དམིགས་བསལ་འགན་ཁུར་རྐང་བཞེས་གནང་དགོས་པའི་ལམ་སྟོན་ཞིབ་རྒྱས་གནང་། མཇུག་ཏུ་གཟའ་མཇུག་བོད་ཡིག་སློབ་གྲྭ་གཉིས་ཀྱི་སློབ་སྤྱི་གཙོས་པའི་དགེ་ལས་རྣམས་ཀྱིས་མ་སྐུལ་དང་བླངས་ཐོག་མ་འོངས་བོད་ཀྱི་མི་རབས་གསར་པ་རྣམས་ལ་བོད་ཀྱི་སྐད་ཡིག་དང་རིག་གཞུང་བཟང་པོ་རྣམས་སློབ་འཁྲིད་གནང་བཞིན་པར་ལེགས་གསོ་བསྔགས་བརྗོད་དང་ཐུགས་རྗེ་ཆེ་ཞུས།
སྐུ་ཚབ་དོན་གཅོད་ཀརྨ་སེང་གེ་ལགས་སློབ་ཁག་གཉིས་ལ་འཚམས་གཟིགས་ཕེབས་སྐབས་ཝིག་ཊོ་རི་ཡ་ས་གནས་བོད་རིགས་མཐུན་ཚོགས་ཀྱི་ཚོགས་གཙོ་བསམ་གྲུབ་ལགས་དང། རིག་གཞུང་འགན་འཛིན་རྡོ་རྗེ་རྣམ་རྒྱལ་ལགས་གཉིས་ལྷན་བཅར་ཞུས་ཡོད།
གོང་གསལ་ཝིག་ཊོ་རི་ཡ་གཟའ་མཇུག་བོད་ཡིག་སློབ་གྲྭའི་ནང་སློབ་ཕྲུག་ ༥༧ དང་། ཝིག་ཊོ་རི་ཡ་ལྷོ་ཤར་གཟའ་མཇུག་བོད་ཡིག་སློབ་གྲྭའི་ནང་སློབ་ཕྲུག་ ༢༠ ནས་བོད་ཀྱི་སྐད་ཡིག་དང་། རིག་གཞུང་། བོད་མིའི་གོམས་གཤིས་ཡ་རབས་བཟང་སྤྱོད་བཅས་སློབ་གཉེར་གནང་བཞིན་ཡོད། །
