༄༅། །ཕྱི་ལོ་ ༢༠༢༤ ཟླ་བ་ ༠༥ ཚེས་ ༢༣ ཉིན་ཨ་རིའི་གྲོས་ཚོགས་གོང་མའི་ནང་དུ་བོད་རྒྱའི་དཀའ་རྙོག་སེལ་ཐབས་ཀྱི་ཁྲིམས་འཆར་ལ་སྲིད་དོན་ཚོགས་པ་ཐུན་མོང་ནས་སྤྱི་མོས་ཀྱིས་གཏན་འབེབས་གནང་བར་བོད་མིའི་སྒྲིག་འཛུགས་ནས་བསྔགས་བརྗོད་ཞུ་རྒྱུ་ཡིན། ཁྲིམས་འཆར་དེ་ཉིད་ཨ་རིའི་གྲོས་ཚོགས་གོང་མའི་ནང་དུ་ཨ་རིའི་གྲོས་ཚོགས་གོང་མའི་རྒྱ་ནག་ལས་དོན་ཚོགས་ཆུང་གི་ཟུང་སྦྲེལ་ཚོགས་གཙོ་ཇེབ་མར་ཀི་ལི་ (Jeff Merkley) མཆོག་དང་། གྲོས་ཚོགས་གོང་མའི་འཐུས་མི་ཀྲོཊ་ཡོང་ (Todd Young) མཆོག་གིས་ངོ་སྤྲོད་གནང་ཡོད།
ཁྲིམས་འཆར་དེ་ནི་ཨ་རིའི་སྲིད་གཞུང་གིས་རྒྱ་ནག་མི་མང་སྤྱི་མཐུན་རྒྱལ་ཁབ་དང་། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་ཚབ་བམ། ཡང་ན། མང་གཙོའི་ལམ་ནས་འོས་འདེམས་བྱུང་བའི་བོད་མིའི་འགོ་ཁྲིད་ཚོའི་དབར་སྔོན་འགྲོའི་ཆ་རྐྱེན་གང་ཡང་མེད་པའི་ཐོག བོད་རྒྱའི་དཀའ་རྙོག་སེལ་ཐབས་ཀྱི་གྲོས་མོལ་ཐད་ཀར་ཡོང་ཐབས་ཀྱི་སྲིད་བྱུས་ཤིག་ཡིན་པ་དང་། ཁྲིམས་འཆར་དེས་བོད་རྒྱའི་དཀའ་རྙོག་ད་དུང་ཐག་ཆོད་མེད་པ་དང་། བོད་ཀྱི་ཁྲིམས་མཐུན་གནས་བབ་དེ་ད་དུང་རྒྱལ་སྤྱིའི་ཁྲིམས་ལུགས་གཞིར་བཟུང་ཐག་གཅོད་བྱེད་དགོས་པར་ངོས་འཛིན་བྱེད་ཀྱི་ཡོད། དེ་མཚུངས་ཁྲིམས་འཆར་དེ་བརྒྱུད་རྒྱ་ནག་གཞུང་གིས་བོད་ཀྱི་ལོ་རྒྱུས་དང་། རིག་གཞུང་། མི་རིགས། ༸གོང་ས་མཆོག་ཐེ་བའི་སྒྲིག་འཛུགས་ཁག་སོགས་ཀྱི་སྐོར་མ་བདེན་རྫུན་སྒྲིག་གི་ཁྱོག་བཤད་བྱེད་བཞིན་པར་ཨ་རི་གཞུང་གིས་ཁ་གཏད་གཅོག་རྒྱུའི་དམིགས་ཡུལ་བཟུང་གི་ཡོད་པ་རེེད།
གྲོས་ཚོགས་གོང་མའི་ནང་ཁྲིམས་འཆར་གཏན་འབེབས་སྐབས་གྲོས་ཚོགས་འཐུས་མི་མར་ཀི་ལི་མཆོག་གིས། བོད་མི་ཐེ་བའི་འཛམ་གླིང་གི་མི་མང་ཚང་མར་རང་དབང་དང་། རང་ཐག་རང་གཅོད་ཀྱི་ཐོབ་ཐང་ཡོད། ང་ཚོ་གྲོས་ཚོགས་གོང་འོག་གཉིས་ཀྱི་སྲིད་དོན་ཚོགས་པ་ཐུན་མོང་ནས་གཏན་འབེབས་བྱས་པའི་བོད་རྒྱའི་དཀའ་རྙོག་སེལ་ཐབས་ཀྱི་ཁྲིམས་འཆར་འདི་ནི། རྒྱ་ནག་མི་མང་སྤྱི་མཐུན་རྒྱལ་ཁབ་ཀྱིས་མུ་མཐུད་ནས་བོད་མིའི་གཞི་རྩའི་ཐོབ་ཐང་རྡོག་རོལ་གཏོང་བཞིན་པར་ཐད་ཀར་ཡ་ལན་སྤྲད་པ་ཞིག་ཡིན་པ་མ་ཟད། ཁྲིམས་འཆར་འདིས་རྒྱ་ནག་མི་མང་སྤྱི་མཐུན་རྒྱལ་ཁབ་དང་བོད་གཉིས་ཀྱི་དཀའ་རྙོག་ཞི་བའི་ལམ་ནས་སེལ་ཐབས་ལ་རྒྱབ་སྐྱོར་དང་། རྒྱ་ནག་མི་མང་སྤྱི་མཐུན་རྒྱལ་ཁབ་ཀྱིས་བོད་དང་བོད་ཀྱི་ལོ་རྒྱུས་སྐོར་ལ་རྫུན་བཟོ་བྱས་པའི་གནས་ཚུལ་ལ་ཁ་གཏད་གཅོག་གི་ཡོད། ད་ལྟ་ཁྲིམས་འཆར་འདི་ཕྱིར་གྲོས་ཚོགས་སུ་འགྲོ་བཞིན་ཡོད་ལ། ང་ཚོས་བོད་མི་རྣམས་ལ་རང་ཉིད་ཀྱི་མ་འོངས་པའི་གནད་དོན་ཐག་གཅོད་བྱ་རྒྱུའི་ཐོབ་ཐང་སྤྲོད་ཆེད་ཁྲིམས་འཆར་འདི་སྲིད་འཛིན་བྷཧི་ཊེན་གྱི་ལས་ཁུངས་སུ་སླེབས་ཐབས་ལ་འབད་རྩོལ་ཞུ་རྒྱུ་ཡིན། ཞེས་གསུངས།
དེ་བཞིན་གྲོས་ཚོགས་གོང་མའི་འཐུས་མི་ཀྲོཊ་ཡོང་མཆོག་གིས། རྒྱ་ནག་དམར་ཤོག་ཚོགས་པས་བོད་ཐོག་བཙན་འཛུལ་བྱས་པ་དེ་རང་དོན་ཁོ་ནའི་ཆེད་དུ་ཡིན་པ་མ་ཟད། རྒྱ་ནག་དམར་ཤོག་ཚོགས་པའི་འདོད་པ་གཞིར་བཟུང་བོད་ཀྱི་སྐོར་འགྲེལ་བརྗོད་བྱེད་ཀྱི་ཡོད། ང་ཚོས་ངེས་པར་དུ་ཨ་རིས་བོད་ཐོག་འཛིན་པའི་སྲིད་ཇུས་ལ་བསྐྱར་གསོ་བྱས་ཏེ། བོད་མི་མང་གི་རང་དབང་གོང་འཕེལ་གཏང་རྒྱུ་དང་། བོད་རྒྱའི་དཀའ་རྙོག་སེལ་ཐབས་སུ་ཕྱོགས་གཉིར་བར་གྲོས་མོལ་ཡོང་བར་སྐུལ་དེད་གཏོང་དགོས། གྲོས་ཚོགས་གོང་མའི་ནང་དུ་འོས་ཤོག་ལམ་ནས་ཁྲིམས་འཆར་འདི་གཏན་འབེབས་གནང་ཐུབ་པ་དེ་ནི་བོད་ཕྱི་ནང་གཉིས་སུ་རྒྱ་ནག་དམར་ཤོག་གཞུང་གི་བྱེད་སྟངས་དེར་ཨ་རིས་ངོས་ལེན་བྱེད་ཐབས་མེད་པ་གསལ་སྟོན་གནང་ཡོད།
ཨ་རིའི་གྲོས་ཚོགས་གོང་མའི་ནང་དུ་བོད་དོན་ཁྲིམས་འཆར་དེ་གཏན་འབེབས་གནང་བར་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས། ས་ག་ཟླ་བའི་དུས་ཚིགས་ཁྱད་པར་ཅན་ཉིན་ཨ་རིའི་གྲོས་ཚོགས་གོང་མའི་ནང་དུ་བོད་རྒྱའི་དཀའ་རྙོག་སེལ་ཐབས་ཀྱི་ཁྲིམས་འཆར་སྤྱི་མོས་ཐོག་གཏན་འབེབས་གནང་ཐུབ་པ་བྱུང་ཡོད། འདི་ནི་ཁྲིམས་འཆར་དེ་ཁྲིམས་ཡིག་ཏུ་གཏན་འབེབས་ཐུབ་པར་གོམ་སྟབས་ཆེན་པོ་ཞིག་ཡིན། ཁྲིམས་འཆར་འདི་གྲོས་ཚོགས་གོང་མ་བར་དུ་སླེབས་པར་མི་སྒེར་དང་ཚོགས་པ་གཅིག་གིས་སྒྲུབ་པ་མ་ཡིན་པར། ཐུན་མོང་གི་འབད་རྩོལ་ལ་བརྟེན་ནས་བྱུང་བ་ཞིག་རེད། ང་ཚོར་མི་འགྲོ་དང་དཔལ་འབྱོར་གྱི་མཐུན་རྐྱེན་ཧ་ཅང་འཛོམས་པོ་མེད་ནའང། ང་ཚོ་མཉམ་རུབ་ཀྱིས་ལས་དོན་བྱས་ན་ང་ཚོའི་དམིགས་ཡུལ་སྒྲུབ་ཐུབ་པ་བསྟན་ཡོད། ང་ཚོས་དམིགས་བསལ་ཁྲིམས་འཆར་འདི་ངོ་སྤྲོད་གནང་མཁན་གྲོས་ཚོགས་གོང་མའི་འཐུས་མི་ཇེབ་མར་ཀི་ལི་མཆོག་དང་། གྲོས་ཚོགས་གོང་མའི་འཐུས་མི་ཀྲོཊ་མཆོག་གཙོས་པའི་འབྲེལ་ཡོད་ཡོངས་དང་། ཨ་རིའི་གྲོས་ཚོགས་གོང་མས་ཐག་གཅོད་ལྡན་པའི་ཐོག་ནས་རྒྱབ་སྐྱོར་གནང་བར་ཐུགས་རྗེ་ཆེ་ཞུ་རྒྱུ་ཡིན། ཞེས་གསུངས་ཡོད་པ་བཅས།།
