༄༅། །ཕྱི་ལོ་ ༢༠༢༤ ཟླ་བ་ ༠༥ ཚེས་ ༠༩ ཉིན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བདག་ཅག་གི་སྟོན་པ་མཉམ་མེད་ཤཱཀྱ་ཐུབ་པ་སྐུ་བལྟམས་པ་དང་། སངས་རྒྱས་པ། སྐུ་མྱ་ངན་ལས་འདས་པའི་ས་ག་ཟླ་བའི་དུས་ཚིགས་ཁྱད་པར་ཅན་ལ་དགེ་སྐུལ་གསུང་འཕྲིན་སྩལ་ཡོད།
དེ་ཡང་གསུང་འཕྲིན་ནང་མགོན་པོ་མཆོག་གིས། སངས་རྒྱས་བཅོམ་ལྡན་འདས་རྒྱ་གར་དུ་བྱོན་ཏེ་ཆོས་ཀྱི་འཁོར་ལོ་བསྐོར་བ་ནས་བཟུང་ལོ་ངོ་ཉིས་སྟོང་ལྔ་བརྒྱ་ལྷག་ཙམ་འདས་ཡོད་ནའང་། ཁོང་གི་གསུང་གི་སྙིང་པོ་ནི་སྔར་ལྟར་དུས་ད་ལྟའང་འབྲེལ་བ་ཡོད། དེང་རབས་ཚན་རིག་གིས་ཕྱིའི་དངོས་པོའི་འཇིག་རྟེན་ལ་རྒྱུས་ལོན་ཚད་མཐོན་པོ་བྱས་ཡོད་ནའང་། ནང་པའི་ཚན་རིག་གིས་དེང་རབས་ཀྱི་ཚན་རིག་ལ་ལྟོས་ས་ལྟོས་འཇོག་གིས་གསར་པ་ཡིན་པའི་སེམས་དང་སེམས་འབྱུང་གི་ཆ་ཤས་མང་པོ་ཞིག་ལ་གང་ཟག་དང་པོའི་དཔྱད་པ་ཞིབ་ཚགས་པོའི་ཐོག་ནས་རྒྱུས་ལོན་བྱེད་རྒྱུར་ཤུགས་སྣོན་བརྒྱབ་ཡོད། ངས་ཐབས་ལམ་འདི་གཉིས་ཟུང་འབྲེལ་བྱས་ན། ང་ཚོའི་ལུས་སེམས་དང་སྤྱི་ཚོགས་ཀྱི་བདེ་ཐབས་ཚད་མཐོར་ཐུབ་པའི་གནས་ཚུལ་གསར་པ་རྙེད་ངེས་པའི་ཡིད་ཆེས་བྱེད་ཀྱི་ཡོད།
ངོས་རང་བོད་བརྒྱུད་ནང་བསྟན་གྱི་གྲྭ་པ་ཞིག་ཡིན་པའི་ཆ་ནས། ངས་རང་ཉིད་དཔལ་ནཱ་ལེནྡྲའི་གཙུག་ལག་སློབ་གཉེར་ཁང་གི་རྗེས་འཛིན་པ་ཞིག་ཏུ་བརྩི་བཞིན་ཡོད། དཔལ་ནཱ་ལེནྡྲའི་གཙུག་ལག་སློབ་གཉེར་ཁང་དུ་ནང་ཆོས་འཆད་ཉན་བྱེད་ཚུལ་འདིས་རྒྱ་གར་དུ་ནང་ཆོས་དར་རྒྱས་ཀྱི་ཡང་རྩེ་མཚོན་གྱི་ཡོད། གལ་སྲིད་ང་ཚོ་དུས་རབས་ཉེར་གཅིག་པའི་ནང་པ་ཞིག་བྱེད་ཀྱི་ཡིན་ན། དད་པ་ཙམ་ལ་བརྟེན་རྒྱུའི་ཚབ་ཏུ་སངས་རྒྱས་ཀྱི་གསུང་རབ་ལ་སློབ་གཉེར་དང་དཔྱད་པ་བྱེད་རྒྱུ་དེ་གལ་ཆེན་པོ་ཡིན།
བུདྡྷ་པཱུརྞི་མཱའམ་བཻཤཱཁ་པཱུརྞི་མཱ་ནི། སངས་རྒྱས་ཤཱཀྱ་ཐུབ་པ་སྐུ་བལྟམས་པ་དང་། སངས་རྒྱས་པ། སྐུ་མྱ་ངན་ལས་འདས་པ་བཅས་ཀྱི་རྗེས་དྲན་ཉིན་མོ་ཞིག་ཡིན་ལ། ནང་པའི་ལོ་ཐོའི་ནང་གི་ཆེས་རྩ་ཆེ་བའི་ཉིན་མོ་ཞིག་ཏུ་བརྩི་བཞིན་ཡོད། དུས་བཟང་འདིའི་སྐབས་སུ་ངས་འཛམ་གླིང་ཡུལ་གྲུ་གང་སར་གནས་པའི་ནང་པའི་ཆོས་གྲོགས་ཚོར་སྙིང་རྗེ་དང་བརྩེ་སེམས་ཀྱིས་ཁེངས་པའི་མི་ཚེ་དོན་དང་ལྡན་པ་ཞིག་སྐྱེལ་བའི་སྨོན་འདུན་ཞུ་བཞིན་ཡོད། ཅེས་བཀའ་སྩལ་ཡོད་པ་བཅས།།
