༄༅། །ཕྱི་ལོ་ ༢༠༢༤ ཟླ་བ་ ༥ ཚེས་ ༡༠ ཉིན་སྦར་སིལ་གྲོས་ཚོགས་འཐུས་མི་ཟུར་པ་ལྷན་ཚོགས་ཀྱི་ཚོགས་གཙོ་དང་དྲུང་ཆེ་རྣམ་པས་གདན་ཞུ་གནང་བ་ལྟར། བེལ་ཇ་ཡམ་སྐུ་ཚབ་དོན་གཅོད་འགན་ཁང་རིག་འཛིན་ཆོས་སྒྲོན་ལགས་དང་། ཡུ་རོབ་སྤྱི་འཐུས་ཐུབ་བསྟན་དབང་ཆེན་ལགས་རྣམ་གཉིས་སི་པེན་གྱི་གྲོས་ཚོགས་ཁང་དུ་ཕེབས་ནས་བོད་ནང་གི་ཛ་དྲག་གནས་སྟངས་སྐོར་གྲོས་བསྡུར་གནང་ཡོད། སྐབས་དེར་རྒྱལ་སྤྱིའི་བོད་དོན་ལས་འགུལ་ཁང་གི་འཛིན་སྐྱོང་འགན་འཛིན་བཀྲས་མཐོང་དབང་པོ་ལགས་ཀྱང་ལྷན་བཅར་ཞུས་ཡོད།
དེ་ཡང་གོང་ཚེས་ཉིན་བེལ་ཇ་ཡམ་སྐུ་ཚབ་དོན་གཅོད་འགན་ཁང་རིག་འཛིན་ཆོས་སྒྲོན་ལགས་ཀྱིས་རྒྱལ་སྤྱིའི་ཐོག་བོད་མིའི་དཀའ་ངལ་ཤེས་རྟོགས་དང་། བོད་མིའི་ཐོབ་ཐང་རྩོད་ལེན་བྱེད་རྒྱུ་གལ་ཆེན་པོ་ཡིན་པའི་སྐོར་དང་། རྒྱ་ནག་གཞུང་གིས་འགྲོ་བ་མིའི་ཐོབ་ཐང་ལ་རྡོག་རོལ་གཏོང་བ། བོད་ཀྱི་སྐད་ཡིག་དང་ཆོས་ལུགས། རིག་གཞུང་བཅས་ལ་མཐོང་ཆུང་བྱེད་བཞིན་ཡོད་པ་སོགས་ཀྱི་སྐོར་ལ་འགྲེལ་བརྗོད་གནང་། ཕྱོགས་མཚུངས་བོད་མི་མང་གིས་དཀའ་ངལ་དེའི་ཁྲོད་འཚེ་མེད་ཞི་བའི་ལམ་དུ་ཞུགས་རྒྱུའི་དམ་བཅའ་དང་། དེའི་ཐོག་རྒྱལ་སྤྱིའི་རྒྱབ་སྐྱོར་དགོས་གལ་ཆེ་བ་སོགས་ཀྱི་སྐོར་ལ་ནན་བཤད་གནང་།
སི་པེན་གྱི་གྲོས་ཚོགས་འཐུས་མི་ཟུར་པ་རྣམ་པས་བོད་ཀྱི་རྩ་དོན་ལ་དོ་སྣང་ཆེན་པོ་གནང་བ་དང་འབྲེལ་གྲོས་མོལ་དེའི་ནང་ཞུགས་ནས་བོད་མིའི་རང་དབང་འཐབ་རྩོད་ལ་སེམས་ཁུར་དང་གདུང་སེམས་མཉམ་སྐྱེའི་རྣམ་པ་བསྟན་ནས་བོད་ནང་གི་གནས་སྟངས་ཤེས་རྟོགས་ཡོང་རྒྱུ་གལ་གནད་ཆེན་པོ་ཡིན་པའི་ངོས་འཛིན་གནང་བ་དང་། ལས་འགུལ་སྤེལ་མཁན་ཚོར་རྒྱབ་སྐྱོར་བྱེད་རྒྱུའི་ཁས་ལེན་དམ་བཅའ་བཞག་ཡོད།
ཐེངས་འདིར་བེལ་ཇ་ཡམ་སྐུ་ཚབ་དོན་གཅོད་སི་པེན་གྱི་གྲོས་ཚོགས་སུ་ཕེབས་པ་འདི་ནི་མ་འོངས་པར་མཉམ་ལས་ཀྱི་རྨང་གཞི་སྐྲུན་པའི་གོ་སྐབས་གལ་ཆེན་ཞིག་ཡིན། མཛད་སྒོ་འདི་ནི་གྲོས་ཚོགས་འཐུས་མི་ཟུར་པ་དང་བོད་ཀྱི་གྲོགས་པོ་རོ་སྦཊ་ན་ཧར་ལགས་ཀྱིས་བརྒྱུད་ནས་གོ་སྒྲིག་གནང་བ་ཞིག་ཡིན་པ་བཅས།།
