༄༅། །འདི་གར་ཆོས་རིག་ལས་ཁུངས་ནས་བཏང་གནས་ནང་འཁོད་དོན།  ཕྱི་ལོ་ ༢༠༢༤ ཟླ་ ༥ ཚེས་ ༣ ཉིན་ས་སྐྱ་བཙུན་མའི་མཐོ་སློབ་ཏུ་ས་སྐྱ་བཙུན་མའི་མཐོ་སློབ་ཀྱི་སྐབས་གཉིས་པའི་བསླབ་པ་མཐར་སོན་དང་། ས་པཎ་ལྔ་རིག་མཐོ་སློབ་ཀྱི་སྐབས་དང་པོའི་བསླབ་པ་མཐར་སོན་མཛད་སྒོ་འཚོགས་ཡོད།མཛད་སྒོའི་ཚོགས་མགོན་གྱི་གཙོ་བོར་འཁོན་རིགས་བསྟན་པའི་མངའ་བདག་དཔལ་ས་སྐྱ་ཁྲི་འཛིན་ཞེ་གསུམ་པ་ཛྙཱན་བཛྲ་རིན་པོ་ཆེ་མཆོག་དང་། དཔལ་ས་སྐྱའི་རྒྱལ་ཡུམ་ཆེན་མོ་མཆོག རྡོར་གླིང་ས་སྐྱ་གུ་རུ་དགོན་མདོ་སྔགས་ནོར་བུའི་གླིང་གི་དགོན་བདག་འཁོན་གདུང་ཨ་སངྒ་བཛྲ་རིན་པོ་ཆེ་མཆོག དཔལ་ས་སྐྱའི་བོད་མི་མང་སྤྱི་འཐུས་མཁན་པོ་ཀཿབྲག་དངོས་གྲུབ་བསོད་ནམས་ལགས། མཁན་པོ་རྒྱ་མཚོ་ལགས། ཆོས་རིག་བཀའ་བློན་གྱི་སྐུ་ཚབ་དྲུང་འཕར་ཀུན་དགའ་རྒྱལ་མཚན་ལགས། བོད་ཀྱི་བཙུན་མའི་ལས་འཆར་གྱི་ངེས་སྟོན་པ་དྲུང་ཆེ་ཟུར་པ་སྣང་ས་ཆོས་སྒྲོན་ལགས་བཅས་ཕེབས་ཡོད། དེ་བཞིན་ཉེ་འཁོར་ས་གནས་འགོ་འཛིན་དང་སློབ་གྲྭ་ཁག་གི་སྐུ་ཚབ་རྣམ་པ་དང་། ས་གནས་མི་མང་བཅས་ཕེབས་འདུགམཛད་སྒོའི་ཐོག་མར་ཚོགས་མགོན་གྱི་གཙོ་བོ་དཔལ་ས་སྐྱ་ཁྲི་འཛིན་ཞེ་གསུམ་པ་མཆོག་ནས་སྣང་གསལ་མར་མེ་ཞལ་འབྱེད་གནང་། དེ་རྗེས་ས་སྐྱ་བཙུན་མའི་མཐོ་སློབ་ཀྱི་སློབ་གཉེར་བ་ཁག་ཅིག་ནས་ལེགས་སྦྱར་ཐོག་ནས་ཤེས་རབ་སྙིང་པོའི་སྒོ་ནས་ཤིས་བརྗོད་གསུངས་སོང་། ཤིས་བརྗོད་རྗེས་སུ་ཚོགས་མགོན་གྱི་གཙོ་བོ་དཔལ་ས་སྐྱ་ཁྲི་འཛིན་ཞེ་གསུམ་པ་ཛྙཱན་བཛྲ་རིན་པོ་ཆེ་མཆོག་ལ་མཎྜལ་རྟེན་གསུམ་འདེགས་འབུལ་དང་། འདུས་ཚོགས་ལ་རྟེན་འབྲེལ་མཚོན་བྱེད་གསོལ་ཇ་འབྲས་སིལ་འདེགས་འབུལ་ཞུས།དེ་ནས་ས་སྐྱ་བཙུན་མའི་མཐོ་སློབ་ཀྱི་མཁན་པོ་ཡེ་ཤེས་ཚེ་རིང་ལགས་ནས་ཕེབས་བསུ་དང་སྦྲགས་ས་སྐྱ་བཙུན་མའི་མཐོ་སློབ་དང་ས་པཎ་ལྔ་རིག་མཐོ་སློབ་ཀྱི་གནས་བབ་ཐོག་གསུང་བཤད་དང་། དེ་རྗེས་ས་སྐྱའི་སྤྱི་འཐུས་མཁན་པོ་ཀཿ བྲག་དངོས་གྲུབ་བསོད་ནམས་ལགས་དང་། བོད་ཀྱི་བཙུན་མའི་ལས་འཆར་ངེས་སྟོན་པ་སྣང་ས་ཆོས་སྒྲོན་ལགས། བོད་མིའི་སྒྲིག་འཛུགས་ཀྱི་ཆོས་རིག་བཀའ་བློན་གྱི་སྐུ་ཚབ་ཆོས་རིག་དྲུང་འཕར་ཀུན་དགའ་རྒྱལ་མཚན་ལགས་བཅས་ནས་གསུང་བཤད་གནང་། ཆོས་རིག་སྐུ་ཚབ་ངོས་ནས་དགོན་སྡེ་གྲྭ་ཚང་ཁག་ཏུ་ཚན་རིག་སློབ་ཁྲིད་གནང་དགོས་གལ་དང་། ནམ་རྒྱུན་གྲོང་ཆོག་འགྲོ་བར་གནང་བ་མེད་ཀྱང་གྲོང་པའི་མི་འདས་གྲོངས་སུ་གྱུར་སྐབས་དམིགས་བསལ་དགོངས་བཞེས་གནང་དགོས་པ་སོགས་གསུངས།དེ་ནས་ཚོགས་མགོན་གྱི་གཙོ་བོ་དཔལ་ས་སྐྱ་ཁྲི་འཛིན་ཞེ་གསུམ་པ་ཛྙཱན་བཛྲ་རིན་པོ་ཆེ་མཆོག་ནས་ས་སྐྱ་བཙུན་མའི་མཐོ་སློབ་ཀྱི་སྐབས་གཉིས་པའི་བསླབ་པ་མཐར་སོན་དང་། ས་པཎ་ལྔ་རིག་མཐོ་སློབ་ཀྱི་སྐབས་དང་པོའི་བསླབ་པ་མཐར་སོན་པའི་སློབ་གཉེར་བ་རྣམས་ལ་བཀའ་བཅུ་པ་དང་སློབ་དཔོན་གྱི་ཕྱག་འཁྱེར་སྩལ། དེ་གྲུབ་མཚམས་དེ་གའི་བཙུན་མ་ཁག་ཅིག་གིས་བརྩམས་པའི་དཔེ་དེབ་རྣམས་ཞལ་འབྱེད་གནང་།

གསུང་བཤད་ཀྱི་མཐའ་མ་ཚོགས་མགོན་གྱི་གཙོ་བོ་དཔལ་ས་སྐྱ་ཁྲི་འཛིན་མཆོག་ནས་འདུས་ཚོགས་ལ་ཐོས་བསམ་སྒོམ་གསུམ་གནང་དགོས་པའི་ཐོག་དཔེ་ཆ་གཟིགས་རྗེས་སྒོམ་རྒྱག་དགོས་པ་དང་། དེ་ཡང་སོ་སོའི་ཉམས་མྱོང་ཐོག་ནས་གནང་ཡོད་ན་བླ་མའི་དགོངས་པའང་དེས་འགྲུབ་ཀྱི་ཡོད་པ་སོགས་ཀྱི་བཀའ་སློབ་ལམ་སྟོན་གཟབ་རྒྱས་སྩལ།དེ་ནས་ས་སྐྱ་བཙུན་མའི་མཐོ་སློབ་ཀྱི་མཁན་པོ་ཡེ་ཤེས་ཚེ་རིང་ལགས་ནས་ཐུགས་རྗེ་ཆེ་ཞུའི་གསུང་བཤད་གནང་ཞིང་། མཐར་འདུས་ཚོགས་ནས་འགྲོ་ལ་བདེ་སྐྱིད་མ་འུར་འདོན་ངང་མཛད་སྒོ་རྒྱལ་ཁའི་ངང་གྲོལ། །