༄༅། །ཕྱི་ལོ་ ༢༠༢༤ ཟླ་ ༥ ཚེས་ ༡༧ ཉིན་༸ཀུན་གཟིགས་པཎ་ཆེན་བསྟན་འཛིན་དགེ་འདུན་ཡེ་ཤེས་འཕྲིན་ལས་མཆོག་གར་སོང་ཆ་མེད་དུ་ཕྱིན་ནས་ལོ་ངོ་ ༢༩ འཁོར་བའི་དུས་དྲན་ཉིན་ཝིལ་ནི་ཡ་སི་(Vilnius)བོད་དོན་རྒྱབ་སྐྱོར་ཚོགས་པས་ཝིལ་ནི་ཡ་སིའི་རྒྱ་ནག་གཞུང་ཚབ་ཁང་གི་མདུན་དུ་ངོ་རྒོལ་ལས་འགུལ་ཞིག་སྤེལ་ཡོད། ངོ་རྒོལ་དེ་ཡང་ལི་ཐུ་ནི་ཡ་དང་། ཡུ་རོབ་ཀྱི་ཆབ་སྲིད་པ་རྣམས་ནས་བོད་ནང་འགྲོ་བ་མིའི་ཐོབ་ཐང་རྡོག་རོལ་འགྲོ་བཞིན་པའི་ཐོག་དོ་སྣང་ཡོང་སླད་ཡིན་འདུག
ཕྱི་ལོ་ ༡༩༩༥ ཟླ་ ༥ ཚེས་ ༡༧ ཉིན་དགེ་འདུན་ཆོས་ཀྱི་ཉི་མ་མཆོག་༸ཀུན་གཟིགས་པཎ་ཆེན་རིན་པོ་ཆེ་མཆོག་གི་ཡང་སྲིད་དུ་ངོས་འཛིན་གནང་ནས་ཉིན་གསུམ་གྱི་རྗེས་སུ་རྒྱ་ནག་གཞུང་གིས་ཁོང་གི་སྐུ་འཁོར་ནང་མི་དང་། བྱ་བྲལ་རིན་པོ་བཅས་པ་བཙན་འཁྲིད་ཀྱིས་གར་སོང་ཆ་མེད་དུ་ཕྱིན་ཡོད། དེ་ཡང་ཝིལ་ནི་ཡ་སི་བོད་དོན་རྒྱབ་སྐྱོར་ཚོགས་མི་རོ་སྦར་ཊ་སི་ ( Robertas Mažeika) ལགས་ཀྱིས་༸ཀུན་གཟིགས་པཎ་ཆེན་རིན་པོ་ཆེ་མཆོག་གང་དུ་ཡོད་མེད་སྐོར་རྒྱ་གཞུང་ལ་ཤུགས་གནོན་སྤྲོད་དགོས་གལ་སྐོར་འགྲེལ་བརྗོད་གནང་བ་དང་སྦྲགས། བོད་མི་དང་། ལི་ཐུ་ནི་ཡའི་བོད་རིགས་སྐུ་ཚབ་བཅས་ཀྱིས་ཡུ་རོབ་གྲོས་ཚོགས་ཀྱི་འཐུས་མི་རྣམས་ནས་བོད་ནང་གི་ཛ་དྲག་གནས་སྟངས་ལ་རྒྱབ་སྐྱོར་མཚོན་ཆེད་ཁས་ལེན་དམ་བཅའི་མཚན་རྟགས་འགོད་གནང་ཡོང་བའི་རེ་སྐུལ་ཞུ་བཞིན་ཡོད་ཅེས་གསུངས།
ཝིལ་ནི་ཡ་སི་གཙུག་ལག་སློབ་གཉེར་ཁང་གི་སློབ་དཔོན་དང་། ཝིལ་ནི་ཡ་སི་བོད་ཁང་གི་འགན་འཛིན་ཝི་ཊི་སི་ (Vytis Vydūnas )ལགས་ཀྱིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཡང་སྲིད་གནད་དོན་ནི་ལི་ཐུ་ནི་ཡའི་མང་ཚོགས་ཁྲོད་ཡ་མཚན་སྣང་སྲིད་ཀྱང་། དངོས་ཡོད་དུ་རྒྱལ་སྤྱིའི་གནད་དོན་དང་འབྲེལ་བ་ཆགས་ཀྱི་ཡོད་པའི་སྐོར་གསུངས། དེ་ཡང་ཁོང་གིས། བོད་མི་དང་ཡུ་གུར་བ་རྣམས་ང་ཚོའི་རང་བཞིན་གྱི་མཐུན་གྲོགས་ཡིན། ད་ལྟ་ཨུ་རུ་སུའི་ནང་མི་ཆོས་ལས་འགལ་བའི་སྲིད་གཞུང་དེའི་མཐུན་གྲོགས་རྒྱ་ནག་ཡིན་སྟབས། ང་ཚོས་ངེས་པར་དུ་བོད་ཀྱི་འཐབ་རྩོད་ལ་རྒྱབ་སྐྱོར་བྱེད་དགོས། ཞེས་གསུངས།
སྐབས་དེར་ངོ་རྒོལ་བ་རྣམས་ནས་བོད་དང་ལི་ཐུ་ནི་ཡའི་རྒྱལ་དར་དང་། ༸ཀུན་གཟིགས་པཎ་ཆེན་རིན་པོ་ཆེ་མཆོག་མྱུར་དུ་གློད་བཀྲོལ་དགོས་། བོད་ནང་འགྲོ་བ་མིའི་ཐོབ་ཐང་ལ་བརྩི་བཀུར་དགོས། བོད་ནང་རིག་གཞུང་རྩ་མེད་གཏང་རྒྱུ་མཚམས་འཇོག་དགོས། ཞེས་སོགས་ཀྱི་འབོད་ཚིག་བཀོད་པའི་འཕྲད་དར་བསྣམས་ཏེ། ངོ་རྒོལ་སྐད་འབོད་གནང་ཡོད་པ་དང་། ངོ་རྒོལ་གནས་ཚུལ་དེ་རྒྱལ་ཡོངས་བརྙན་འཕྲིན་བརྒྱུད་འགྲེམས་སྤེལ་གནང་ཡོད་པ་བཅས།། 
