༄༅། །ཕྱི་ལོ་ ༢༠༢༤ ཟླ་བ་ ༠༤ ཚེས་ ༡༥ ནས་ཟླ་བ་ ༠༥ ཚེས་ ༠༣ བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་དྲུང་ཆེ་ཟླ་བ་ཚུལ་ཁྲིམས་ལགས་རྒྱ་གར་དབུས་དང་ལྷོ་ཕྱོགས་གཞིས་ཆགས་ཁག་ཏུ་ཆེད་ཕེབས་ཀྱིས་འཕྲོད་བསྟེན་དང་འབྲེལ་བའི་ལས་གཞི་ལས་འཆར་ཁག་ལ་གཟིགས་ཞིབ་གནང་ཡོད།
དེ་ཡང་འཕྲོད་བསྟེན་དྲུང་ཆེ་ཟླ་བ་ཚུལ་ཁྲིམས་ལགས་དང་འབྲེལ་ཡོད་ལས་བྱེད་དཀོན་མཆོག་སྒྲོལ་མ་ལགས་གཉིས་ནས་མོན་གྷོ་འདོད་རྒུ་གླིང་དང་། ཧོན་སུར་རབ་རྒྱས་གླིང་། སྦེལ་ཀོབ་གཞིས་ཆགས་སོ་སོའི་འཕྲོད་བསྟེན་དང་འབྲེལ་བའི་ལས་འཆར་ཁག་དང་། འཕྲོད་བསྟེན་སྨན་ཁང་ཁག་ལ་གཟིགས་ཞིབ་གནང་ཡོད། དྲུང་ཆེ་ཟླ་བ་ཚུལ་ཁྲིམས་ལགས་སྦན་ད་ར་ནོར་རྒྱས་གླིང་དང་། མན་སྤར་ཕན་བདེ་གླིང་། ཨོ་རི་ས་ཕུན་ཚོགས་གླིང་། ལྡི་ལི་བསམ་ཡས་གླིང་བཅས་སུ་གཟིགས་སྐོར་དུ་ཕེབས་སྐབས་འབྲེལ་ཡོད་ལས་བྱེད་བསྟན་འཛིན་ཆོས་ལྡན་ལགས་ལྷན་བཅར་ཞུས་ཡོད་པ་རེད།
གཟིགས་སྐོར་དེའི་དམིགས་ཡུལ་ནི་གཞིས་ཆགས་ཁག་གི་འཕྲོད་བསྟེན་ཞབས་ཞུ་སྤྱི་དང་། བྱེ་བྲག་ཏུ་འཕྲོད་བསྟེན་ལས་ཁུངས་ཀྱིས་མཐུན་འགྱུར་ཞུས་པའི་ཆུ་དང་གཙང་སྦྲའི་ལས་འཆར་ལ་གཟིགས་ཞིབ་གནང་རྒྱུ་ཡིན་པ་རེད། གཞན་ཡང་ཕྱོགས་ཕེབས་སྐབས་དྲུང་ཆེ་ཟླ་བ་ཚུལ་ཁྲིམས་ལགས་འགྲོ་ཕན་བོད་ཀྱི་སྨན་རྩིས་ཁང་གི་ཡན་ལག་སྨན་ཁང་དང་། བོད་ཀྱི་དགོན་སྡེ་ཁག་གིས་འཛིན་སྐྱོང་བྱེད་པའི་འཕྲོད་བསྟེན་སྨན་ཁང་། དེ་བཞིན་རྒྱ་གར་གྱི་ས་གནས་སྨན་ཁང་ཐེ་བའི་འཕྲོད་བསྟེན་སྨན་ཁང་གཞན་ཁག་ལ་ཡང་ཕེབས་པ་མ་ཟད། མན་སྤར་ཕན་བདེ་གླིང་གཞིས་ཆགས་སུ་སྨན་སྤྲོད་ཁང་དང་། སྨན་བཅོས་ཁང་། ནད་པའི་ཉལ་ཁང་། བརྟག་དཔྱད་ཁང་དབུ་འབྱེད་དང་། ཨོ་རི་ས་ཕུན་ཚོགས་གླིང་གི་སྨན་ལྷ་སྨན་ཁང་དུ་ལུས་ཁམས་གསོ་དཔྱད་ཚན་པ་དབུ་འབྱེད་གནང་ཡོད།
ཕྱོགས་ཕེབས་སྐབས་འཕྲོད་བསྟེན་དྲུང་ཆེ་ནས་ས་གནས་འགོ་འཛིན་རྣམ་པ་དང་། ས་གནས་འཕྲོད་བསྟེན་སྨན་ཁང་གི་འགན་འཛིན། ས་གནས་འཕྲོད་བསྟེན་ཚོགས་པ། དགོན་པ་ཁག་གི་འཛིན་སྐྱོང་འོག་ཡོད་པའི་སྨན་ཁང་གི་འགན་འཛིན་སོགས་ལྷན་དུ་འཕྲོད་བསྟེན་དང་འབྲེལ་བའི་གནད་དོན་ཐོག་གྲོས་བསྡུར་གནང་ཞིང་། སྐབས་དེར་དྲུང་ཆེ་ཟླ་བ་ཚུལ་ཁྲིམས་ལགས་ཀྱིས་འཕྲོད་བསྟེན་དང་འབྲེལ་བའི་ལས་དོན་ཐོག་ཚོགས་སྒེར་ཚང་མས་ཐུན་མོང་གི་ནུས་པ་སྤུངས་རྒྱུ་གལ་ཆེན་པོ་ཡིན་པ་ནན་བརྗོད་གནང་ཡོད་པ་བཅས།། 
