༄༅། །ཨོསྟྲེ་ལི་ཡཱའི་ལྗང་ཁུ་སྲིད་དོན་ཚོགས་པའི་གྲོས་ཚོགས་གོང་མའི་འཐུས་མི་ལྕམ་སྐུ་སྦར་བྷ་ར་པོ་ཀོག་ ( Barbara Pocock) ལགས་ཨོ་གླིང་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཟུང་སྦྲེལ་ཚོགས་གཙོ་བསྐོ་བཞག་བྱུང་བར་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་དང་།  ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་རྣམ་གཉིས་ཀྱི་གནང་བའི་འཚམས་འདྲིའི་གསུང་འཕྲིན་ཨོསྟྲེ་ལི་ཡཱའི་སྐུ་ཚབ་དོན་གཅོད་ཀརྨ་སེངྒེ་ལགས་ཀྱིས་ཕུལ་ཡོད།

དེ་ཡང་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གི་གསུང་འཕྲིན་ནང་། སྐབས་ ༡༧ པའི་བོད་མི་མང་སྤྱི་འཐུས་ལྷན་ཚོགས་ཀྱི་ཚབ་ཞུས་ཏེ་ལྕམ་སྐུ་སྦར་བྷ་ར་ལགས་ཨོ་གླིང་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཟུང་སྦྲེལ་ཚོགས་གཙོར་བསྐོ་བཞག་བྱུང་བར་འཚམས་འདྲི་ཞུ་རྒྱུ་དང་། ཁྱེད་ཀྱིས་སྤྱི་ཚོགས་དྲང་བདེན་དང་། གནམ་གཤིས་འགྱུར་ལྡོག སྐྱབས་བཅོལ་བའི་ཐོབ་ཐང་། དེ་བཞིན་རྡུལ་ཕྲན་མཚོན་ཆ་བཀོལ་སྤྱོད་ལ་ངོ་རྒོལ་གནང་བར་ཕྱི་ལོ་ ༢༠༡༠ ལོར་ ( Member of the Order of Australia) ཞེས་པའི་ཆེ་མཐོང་གི་གཟེངས་རྟགས་ཕུལ་ཡོད། ཁྱེད་ཀྱི་ཐུགས་བརྩོན་དེ་བོད་དང་བོད་མིའི་འཐབ་རྩོད་དང་མཐུན་གྱི་ཡོད། ཅེས་གསུངས།

དེ་བཞིན་བོད་མིའི་སྒྲིག་འཛུགས་ཀྱི་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་གི་གསུང་འཕྲིན་ནང་། སྐུ་ཉིད་ཨོསྟྲེ་ལི་ཡཱའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཟུང་སྦྲེལ་ཚོགས་གཙོར་བསྐོ་བཞག་གནང་བ་དེ་ནི་ཁྱེད་ཀྱིས་འགྲོ་བ་མིའི་ཐོབ་ཐང་ལ་ཆོད་སེམས་བརྟན་པོ་བཟུང་བ་ཞིག་དང་། གཉའ་གནོན་འོག་གི་མི་རིགས་ཀྱི་འབོད་སྒྲ་ཇེ་ཆེར་གཏོང་བའི་ཐུགས་བསྐྱེད་ཀྱི་དཔང་རྟགས་ཤིག་ཡིན། ང་རང་བོད་མིའི་སྐུ་ཚབ་ཤིག་ཡིན་པའི་ཆ་ནས་ཁྱེད་ཀྱིས་བོད་མི་མང་གི་རང་དབང་དང་ཐོབ་ཐང་ཆེད་དུ་འཐབ་རྩོད་གནང་བར་རྗེས་སུ་ཡི་རང་ཞུ་འདོད་བྱུང་། ཞེས་གསུངས་ཡོད།

སྐབས་དེར་ཨོསྟྲེ་ལི་ཡཱའི་སྐུ་ཚབ་དོན་གཅོད་ཀརྨ་སེངྒེ་ལགས་ཀྱིས་བོད་མིའི་སྒྲིག་འཛུགས་དང་། ཨོསྟྲེ་ལི་ཡཱའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་གཙོའི་ལས་གནས་ཀྱི་འགན་ཁྲིའི་སྐོར་ངོ་སྤྲོད་དང་། འབྱུང་འགྱུར་བོད་མི་མང་སྤྱི་འཐུས་སྐུ་ཚབ་ཚོགས་ཆུང་ཞིག་ས་གནས་སུ་གཞུང་འབྲེལ་ཕྱོགས་ཕེབས་གནང་གི་ཡོད་པ་ཐེ་བའི་འབྱུང་འགྱུར་གྱི་ལས་གཞི་ཁག་ཅིག་གི་སྐོར་སྙན་སེང་ཞུས་ཡོད། 

མཇལ་མོལ་སྐབས་ཨོསྟྲེ་ལི་ཡཱ་བོད་དོན་ལྷན་ཚོགས་ཀྱི་འགན་འཛིན་ལྕམ་སྐུ་ཛའོ་བྷེ་ཌི་ཕོར་ཌི་ (Zoe Bedford) ལགས་ལྷན་བཅར་ཞུས་ཡོད་པ་བཅས། །