༄༅། །ཕྱི་ལོ་ ༢༠༢༤ ཟླ་བ་ ༠༥ ཚེས་ ༠༦ ཉིན་བོད་མིའི་སྒྲིག་འཛུགས་དཔལ་འབྱོར་ལས་ཁུངས་ཀྱི་བུད་མེད་ནུས་སྟོབས་གོང་སྤེལ་ཚན་པའི་གོ་སྒྲིག་འོག་བཞུགས་སྒར་རྡ་རམ་ས་ལའི་ནོར་བུ་གསོལ་མགྲོན་ཁང་དུ་བོད་མིའི་སྒྲིག་འཛུགས་ཀྱི་དྲུང་ཆེ་དང་དྲུང་འཕར་རྣམས་ལ་འཛིན་སྐྱོང་ལས་དོན་སྐབས་ཕོ་མོ་ལྟ་ཚུལ་མཉམ་སྡུད་ཡོང་ཐབས་ཀྱི་ཟབ་སྦྱོང་དབུ་འཛུགས་གནང་ཡོད།
དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༩:༣༠ ཐོག་བོད་མིའི་སྒྲིག་འཛུགས་ཀྱི་མང་གཙོའི་ཀ་བ་གསུམ་དང་། རང་དབང་ཅན་གྱི་སྡེ་ཚན་ཁག་གི་དྲུང་ཆེ་དང་དྲུང་འཕར་རྣམ་པ་ལྷན་འཛོམས་ཀྱི་ཐོག་མར་བུད་མེད་ནུས་སྟོབས་གོང་སྤེལ་ཚན་པའི་འགན་འཛིན་ཚེ་རིང་སྐྱིད་ལགས་ནས་ཕེབས་བསུ་དང་འབྲེལ་ཟབ་སྦྱོང་ངོ་སྤྲོད་གནང་ཡོད། སྐབས་དེར་ཁོང་མོས་ཐེངས་འདིའི་བོད་མིའི་སྒྲིག་འཛུགས་ཀྱི་འགོ་ཁྲིད་རྣམས་ལ་ཕོ་མོ་ལྟ་ཚུལ་མཉམ་སྡུད་ཡོང་ཐབས་ཀྱི་ཟབ་སྦྱོང་གོ་སྒྲིག་གནང་དགོས་དོན་ནི། བོད་མིའི་སྒྲིག་འཛུགས་ཀྱི་འཛིན་སྐྱོང་དང་ལས་གཞི་ལས་འཆར་སྤེལ་སྐབས་ཕོ་མོ་ལྟ་ཚུལ་མཉམ་སྡུད་ཡོང་ཐབས་གཙོ་བོར་དམིགས་པ་ཡིན་སྐོར་གསུངས་རྗེས་ཚོགས་བཅར་བ་རྣམས་ནས་རང་ཉིད་ངོ་སྤྲོད་གནང་སྟེ་སྦྱོང་བརྡར་དངོས་སུ་དབུ་འཛུགས་ཞུས་ཡོད་པ་རེད།
ཉིན་གྲངས་གཉིས་རིང་གི་ཟབ་སྦྱོང་གི་སློབ་སྟོན་པར་སུ་དར་ཤ་ལགས་དང་། པུ་ཇ་བཇ་པའི་ལགས་ནས་གནང་གི་ཡོད་པ་བཅས།།
