༄༅། །ཕྱི་ལོ་ ༢༠༢༤ ཟླ་བ་ ༠༥ ཚེས་ ༠༩ ནས་རྒྱ་གར་ལྷོ་ཕྱོགས་ཧུན་སུར་རབ་རྒྱས་གླིང་ནས་བོད་མིའི་སྒྲིག་འཛུགས་བཀའ་ཤག་སྐབས་བཅུ་དྲུག་པའི་རུབ་སྡོད་གཞིས་སྒར་བསྐྱར་གསོའི་གཙོ་གནད་ལས་གཞི་དངོས་སུ་དབུ་འཛུགས་གནང་ཡོད།
དེ་ཡང་ཟླ་འདིའི་ཚེས་ ༠༩ ནས་ ༡༦ བར་ལས་གཞིའི་སྔོན་འགྲོའི་ས་ཁྲ་འགོད་རྒྱུའི་ལས་གཞི་དབུ་འཛུགས་གནང་ཡོད་པ་དང་སྐབས་དེར་སྐྱེ་ལྡན་སོ་ནམ་ཉམས་ཞིབ་དང་སྦྱོང་བརྡར་ཁང་གི་འགན་འཛིན་ཚེ་རིང་རྡོ་རྗེ་ལགས། ནང་སྲིད་ལས་ཁུངས་ཀྱི་དྲུང་གཞོན་དངོས་གྲུབ་འོད་ཟེར་ལགས། སྤྱི་དམངས་འཛུགས་སྐྲུན་འཆར་འགོད་པ་བསྟན་འཛིན་བསྟན་པ་ལགས། ཁང་པ་བཟོད་འགོད་པ་དབང་རྒྱལ་ལགས། ས་གནས་ཀྱི་སོ་ནམ་སློབ་སྟོན་པ་རྡོ་རྗེ་དབང་ཕྱུག་ལགས་ཕེབས་ཡོད་པ་རེད།
སྔོན་འགྲོའི་ས་ཁྲ་འགོད་ལས་གྲུབ་མཚམས་ས་ཚིགས་སུ་ལྷོ་སྤྱི་འཇིགས་མེད་ཚུལ་ཁྲིམས་ལགས་དང་། ཧུན་སར་རབ་རྒྱས་གླིང་ས་གནས་འགོ་འཛིན་བསྟན་འཛིན་ཟླ་སྒྲོན་ལགས། ཧུན་སུར་ས་ཁང་ཚོགས་མི་བཅས་གཟིགས་ཞིབ་ཏུ་ཕེབས་ཡོད།
སྤྱིར་རུབ་སྡོད་གཞིས་སྒར་བསྐྱར་གསོའི་གཙོ་གནད་ལས་གཞི་འདི་ནི་རྒྱ་གར་དང་བལ་ཡུལ་ནང་གི་བོད་མིའི་གཞིས་ཆགས་ཁག་གི་བོད་རིགས་གཞོན་སྐྱེས་མང་པོ་ཞིག་མུ་མཐུད་གྲོང་ཁྱེར་ཁག་ཏུ་ལས་འཚོལ་ཆེད་ཐོན་སྐྱོད་དང་། ཡར་ཐོན་རྒྱལ་ཁབ་ཁག་ཏུ་གཞིས་སྤོ་བྱེད་བཞིན་པ་ཡོད་པ་ལ་བརྟེན་ནས་བོད་མིའི་རུབ་སྡོད་སྤྱི་ཚོགས་རྒྱུན་གནས་ཐུབ་རྒྱུར་གདོང་ལེན་བྱེད་སྒོ་ཛ་དྲག་ཆགས་ཡོད་པ་དང་། ཕྱོགས་གཞན་ཞིག་ནས་འདས་པའི་ལོ་ངོ་བཞི་བཅུའི་ནང་བོད་ནས་ཕེབས་པ་རྣམས་དང་། བཙན་བྱོལ་དུ་གཞིས་སྐལ་མ་ཐོབ་པའི་བོད་མི་ཁག་ཅིག་ལ་སྡོད་ཁང་མེད་པའི་དཀའ་ངལ་ཞིག་འཕྲད་བཞིན་ཡོད་པས། གཞིས་སྐལ་མ་ཐོབ་པའི་བོད་མི་ཚོར་སྡོད་གནས་གོ་སྒྲིག་དང་། འཐོར་འགྲེམས་སུ་འགྲོ་བཞིན་པའི་གཞིས་སྒར་ཁག་ཏུ་མི་འབོར་བསྐྱར་གསོ་བཅས་གདོང་ལེན་བྱེ་སྒོ་འདི་གཉིས་མཐུན་སྦྱོར་དང་། གཞིས་ཆགས་སྲ་བརྟན་གྱི་གོ་སྐབས་སུ་བསྒྱུར་ཆེད། སྐབས་བཅུ་དྲུག་པའི་བཀའ་ཤག་གིས་ཐོག་མའི་ལས་གཞི་ཁོངས་སུ་གཞིས་སྐལ་མ་ཐོབ་པའི་ཁྱིམ་ཚང་ ༢༠༠༠ ཙམ་གྱི་མི་གྲངས་ ༥༠༠༠ ལྷག་སོ་སོའི་འཁོར་འབྱོར་ལ་དཔག་པའི་ད་ཡོད་གཞིས་སྒར་ཆེ་ཁག་ཏུ་སྡོད་ཁང་གི་མཐུན་རྐྱེན་སྦྱར་རྒྱུ་དང་། རིམ་པས་གཞིས་སྐལ་མ་ཐོབ་པ་རྣམས་ལའང་དེ་མཚུངས་ཀྱི་མཐུན་རྐྱེན་སྦྱོར་ཐབས་སུ་དབུ་འཛུགས་གནང་བ་ཞིག་ཡིན།།
