༄༅། །ཕྱི་ལོ་ ༢༠༢༤ ཟླ་བ་ ༠༥ ཚེས་ ༡༧ ཉིན་བོད་མིའི་སྒྲིག་འཛུགས་ཕྱི་དྲིལ་ཁྱབ་ཁོངས་བོད་ཀྱི་འགྲེམས་སྟོན་ཁང་གིས་རྒྱལ་སྤྱིའི་འགྲེམས་སྟོན་ཉིན་མོ་ཐེངས་ ༤༧ སྔ་བསྣུར་གྱིས་སྲུང་བརྩི་ཞུས་ཡོད།
དེ་ཡང་གོང་ཚེས་ཉིན་གྱི་སྔ་དྲོ་བོད་ཀྱི་འགྲེམས་སྟོན་ཁང་གི་ཚོགས་ཁང་དུ་རྒྱལ་སྤྱིའི་འགྲེམས་སྟོན་ཉིན་མོ་སྲུང་བརྩིའི་དབུ་འབྱེད་མཛད་སྒོ་འཚོགས་ཡོད་པ་དང་། སྐབས་དེར་ཕྱི་དྲིལ་དྲུང་ཚབ་བསྟན་འཛིན་ལེགས་བཤད་ལགས་དང་། དྲིལ་བསྒྲགས་དྲུང་འཕར་རྣམ་རྒྱལ་ཚེ་དབང་ལགས། བཞུགས་སྒར་ཁུལ་གྱི་ཚོགས་སྡེ་ཁག་གི་སྐུ་ཚབ། རྡ་ས་བོད་ཁྱིམ་དང་། མེས་དབོན་གཙུག་ལག་དཔེ་སྟོན་སློབ་གྲྭའི་སློབ་ཕྲུག་བཅས་ལྷན་ཞུགས་ཐོག སྐུ་མགྲོན་གཙོ་བོ་ཕྱི་དྲིལ་དྲུང་ཚབ་བསྟན་འཛིན་ལེགས་བཤད་ལགས་ཀྱིས་བོད་ཀྱི་འགྲེམས་སྟོན་ཁང་ནི་བོད་ཀྱི་ཆོས་རིག་རྒྱུན་འཛིན་དང་། དྲིལ་བསྒྲགས་ཆེད་གལ་གནད་ཆེན་པོ་ཆགས་ཚུལ་ངོ་སྤྲོད་དང་། བོད་ཀྱི་འགྲེམས་སྟོན་ཁང་གི་འགན་འཛིན་བསྟན་འཛིན་སྟོབས་ལྡན་ལགས་ཀྱིས་བོད་ཀྱི་འགྲེམས་སྟོན་ཁང་གི་ལས་གཞིའི་རྒྱབ་ལྗོངས་དམིགས་ཡུལ་དང་། བོད་ཀྱི་འགྲེམས་སྟོན་ཁང་གི་སྐོར་སྐྱོད་དང་། དུས་ཐུང་འགྲེམས་སྟོན་སྐོར་ངོ་སྤྲོད་གནང་། དེ་རྗེས་བོད་ཀྱི་སྲིད་བྱུས་ཉམས་ཞིབ་ཁང་གི་ཉམས་ཞིབ་པ་བསྟན་འཛིན་ལྷ་སྒྲོན་ལགས་ཀྱིས་འགྲེམས་སྟོན་ཁང་གི་ངོ་བོ་དང་། རྒྱ་ནག་གཞུང་གིས་འགྲེམས་སྟོན་ཁང་བརྒྱུད་བོད་ཀྱི་ལོ་རྒྱུས་འཁྱོད་བཤད་བྱ་བར་བེད་སྤྱོད་གཏོང་གི་ཡོད་ཚུལ་གསལ་སྟོན་དང་། བོད་ཀྱི་འགྲེམས་སྟོན་ཁང་གི་མ་འོངས་ལས་འཆར་སྐོར་དགོངས་ཚུལ་ཁག་ཅིག་གསུངས་ཡོད།
ཉིན་མོ་དེ་དང་བསྟུན་ནས་བོད་ཀྱི་འགྲེམས་སྟོན་ཁང་ནས་བོད་ཀྱི་སྒྱུ་རྩལ་བ་ཁག་ཅིག་ལ་རང་ཉིད་ཀྱི་སྒྱུ་རྩལ་ལས་རིགས་འགྲེམས་སྟོན་གནང་རྒྱུའི་གོ་སྐབས་ཕུལ་ཡོད་པ་མ་ཟད། རིན་མེད་འགྲེམས་སྟོན་ཁང་སྐོར་སྐྱོད། དངོས་བྱུང་གློག་བརྙན་གཟིགས་འབུལ། ཕྲུ་གུ་རྩེད་ཆས་དབུ་འབྱེད་གནང་ཡོད་པ་བཅས།། 
