༄༅། །རྒྱ་ནག་སྲིད་འཛིན་སྲིད་འཛིན་ཞི་ཅིན་ཕིང་ཕ་རན་སིར་མ་སླེབས་པའི་སྔ་རོལ་དུ། ཕ་རན་སིའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་ཇ་ཁི་ལིན་ཡུ་སི་ཊ་སེ་བྷི་རི་ནེའོ་ (Jacqueline Eustache-Brinio) ལགས་ཀྱིས་སྲིད་འཛིན་མེག་ཀེ་ལོན་ལ་རྒྱ་ནག་གི་སྲིད་འཛིན་ལྷན་དུ་བོད་དོན་སྐོར་གྲོས་མོལ་གནང་དགོས་པའི་ཞུ་ཡིག་ཅིག་ཕུལ་ཡོད།

གྲོས་ཚོགས་འཐུས་མི་གཞན་བཅུ་གསུམ་གྱིས་མཉམ་འབྲེལ་གྱིས་མཚན་རྟགས་བཀོད་པའི་ཞུ་ཡིག་དེའི་ནང་། གྲོས་ཚོགས་འཐུས་མི་ཨེ་སི་ཊ་ཤེ་བྷི་རེ་ནོ་ལགས་ཀྱིས་སྲིད་འཛིན་ཞི་ཅིན་ཕིང་གི་སྲིད་དབང་འོག བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཇེ་སྡུག་ཏུ་འགྲོ་བཞིན་པ་ནན་བརྗོད་དང་། བོད་ནི་ས་ཁམས་ཆབ་སྲིད་དང་གོ་ལའི་སྣོད་བཅུད་རྟེན་འབྲེལ་གྱི་ཆ་ནས་གལ་གནད་ཆེན་པོ་ཆགས་ཡོད་སྐོར་བསྟན་པ་མ་ཟད། ད་ལྟ་ས་ཁུལ་དེར་རྩོད་རྙོག་མང་པོ་ཞིག་འབྱུང་བཞིན་པའི་གནས་སྟངས་འོག་༸གོང་ས་མཆོག་གིས་བོད་དོན་ཞི་བདེའི་གྲོས་འཆར་དོན་ཚན་ལྔ་བཏོན་གནང་མཛད་པ་དེ་སྔ་ལས་ལྷག་པའི་འབྲེལ་བ་ཆགས་ཡོད་པ་གསུངས་ཡོད།

དེ་བཞིན་ཁོང་གིས། གནས་སྟངས་དེ་དག་ལ་བརྟེན་ནས་བོད་རྒྱ་གྲོས་མོལ་དང་། བོད་མི་མང་གི་རང་དབང་ལ་རྩི་མཐོང་བྱ་རྒྱུ་དེ་ཕ་རན་སི་གཞུང་གི་རྒྱ་ནག་དང་འབྲེལ་བའི་སྲིད་བྱུས་ཀྱི་ལྟེ་བར་འཇོག་དགོས། ཞེས་གསུངས།

རྒྱ་ནག་གི་སྲིད་འཛིན་ཞི་ཅིན་ཕིང་ཕྱི་ལོ་ ༢༠༢༤ ཟླ་བ་ ༠༥ ཚེས་ ༠༥ ཉིན་ཕ་རན་སིའི་རྒྱལ་ས་པེ་རི་སིར་སླེབས་ཡོད་པ་དང་། དེ་རིང་ཕ་རན་སིའི་སྲིད་འཛིན་ཨི་མེ་ནོལ་མེག་རོན་མཆོག་དང་། ཡུ་རོབ་མཐུན་ཚོགས་འཛིན་སྐྱོང་ལྷན་ཁང་གི་ཚོགས་གཙོ་ཨུར་སུ་ལ་ཝོན་ཊེར་ (Ursula von der Leyen) མཆོག་དང་ཐུག་འཕྲད་ཞུ་གི་ཡོད། 

ཁ་སང་ཕྱི་ཚེས་ ༠༥ ཉིན་སྲིད་འཛིན་ཞི་ཅིན་ཕིང་ཕ་རན་སིར་འབྱོར་བའི་སྐབས་ས་གནས་བོད་མི་དང་། བོད་དོན་རྒྱབ་སྐྱོར་བ་སོགས་མི་གྲངས་ ༤༠༠༠ ལྷག་ལྷན་འཛོམས་ཀྱིས་རྒྱ་ནག་གཞུང་གིས་བོད་ནང་དྲག་གནོན་ཆེ་བའི་སྲིད་བྱུས་ལག་བསྟར་དང་། བོད་མིའི་རང་དབང་ལ་རྡོག་རོལ་བརྩིས་མེད་གཏོང་བཞིན་པར་གཞི་རྒྱ་ཆེ་བའི་ངོ་རྒོལ་ལས་འགུལ་སྤེལ་ཡོད་པ་བཅས།།