༄༅། །ཕྱི་ལོ་ ༢༠༢༤ ཟླ་ ༠༥ ཚེས་ ༢༩ ཉིན་དྷ་སྟེང་བོད་ཕྲུག་ཁྱིམ་སྡེའི་ལོ་འཁོར་ཁང་ཚན་ནང་ཁུལ་གྱི་ལྷ་གཞུང་འཁྲབ་སྟོན་འགྲན་བསྡུར་གྱི་སྐུ་མགྲོན་གཙོ་བོར་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་ཕེབས་ཡོད། 

དེ་ཡང་གོང་ཚེས་ཉིན་གྱི་ཕྱི་དྲོ་ཆུ་ཚོད་ ༦། ༣༠ ཙམ་ལ་དཔལ་ལྡན་སྲིད་སྐྱོང་མཆོག་ཕེབས་འབྱོར་སྐབས་བོད་ཕྲུག་ཁྱིམ་སྡེའི་སྤྱི་ཁྱབ་འགན་འཛིན་བསོད་ནམས་སྲི་གཅོད་ལགས་དང་། བོད་ཕྲུག་ཁྱིམ་སྡེའི་ངེས་སྟོན་པ་ཚུལ་ཁྲིམས་རྡོ་རྗེ་ལགས། སློབ་གྲྭའི་སློབ་སྤྱི་ངག་དབང་ལྷ་མོ་ལགས་གཙོས་པའི་སློབ་ཕྲུག་རྣམས་ཀྱིས་ཕེབས་བསུ་ཞུས་ཡོད།དེ་ནས་ཁང་ཚན་སོ་སོས་སྐར་མ་སུམ་བཅུ་རེར་ལྷ་གཞུང་གཟིགས་འབུལ་གྲུབ་མཚམས་དཔལ་ལྡན་སྲིད་སྐྱོང་མཆོག་གིས་གསུང་བཤད་གནང་ཡོད། ཁོང་གིས་ལྷ་གཞུང་ནི་བོད་ཀྱི་ཐུན་མོང་མ་ཡིན་པའི་རིག་གཞུང་ཞིག་ཡིན་ལ་ལྷག་པར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ལོ་ལྟར་ཞོ་སྟོན་སྐབས་འཁྲབ་སྟོན་པ་རྣམས་ལ་དམིགས་བསལ་མཇལ་ཁ་དང་། ལྷ་གཞུང་གི་གལ་གནད་ཐོག་བཀའ་སློབ་སྩལ་གྱི་ཡོད་པས་བོད་མི་ཡོད་དོ་ཅོག་གིས་མགོན་པོ་གང་ཉིད་མཆོག་གི་བཀའ་དགོངས་སྒྲུབ་རྒྱུ་ལས་འགན་ཡིན་ཅེས་ནན་བརྗོད་གནང་།

དེ་བཞིན་སློབ་ཕྲུག་རྣམས་ཀྱིས་དེ་རིང་དམིགས་ཡུལ་བཟང་པོ་ཞིག་བཟུང་ནས་འཁྲབ་སྟོན་གནང་བར་བསྔགས་བརྗོད་གནང་བ་མ་ཟད། སློབ་གྲྭའི་དགེ་ལས་རྣམས་ནས་ཐུགས་འགན་འཁུར་བའི་ཐོག་བོད་ཀྱི་ཐུན་མོང་མ་ཡིན་པའི་རིག་གཞུང་དེ་འཁྲབ་པ་དེ་དགའ་སྤོབས་སྐྱེས་དགོས་པ་ཞིག་ཡིན་ཅེས་གསུངས། དེ་དང་འབྲེལ་ཏེ་ལྷ་གཞུང་དེ་རྩ་ཆེན་ཞིག་ཏུ་བརྩིས་ནས་སློབ་གྲྭའི་ངོས་ནས་དེའི་ཐོག་འགྲོ་གྲོན་གནང་དགོས་པ་རྣམས་འཛེམས་མེད་ངང་མཐུན་འགྱུར་གནང་དགོས་གལ་དང་། སློབ་ཕྲུག་ངོས་ནས་མ་འོངས་སྤྱི་ཚོགས་ནང་ཞབས་འདེགས་ཞུ་དགོས་པའི་འབོད་སྐུལ་གནང་ཡོད།

འཁྲབ་སྟོན་པ་རྣམས་ནས་སྣང་ས་འོད་འབུམ་དང་། གཟུགས་ཀྱི་ཉི་མ། ཆོས་རྒྱལ་ནོར་བཟང་། འགྲོ་བ་བཟང་མོ་བཅས་ཀྱི་ལྷ་གཞུང་འཁྲབ་སྟོན་གནང་ཞིང་། ད་ལོའི་ཁང་ཚན་ནང་ཁུལ་གྱི་ལྷ་གཞུང་འགྲན་བསྡུར་གྱི་ཨང་རིམ་དང་པོ་དེ་གཉའ་ཁྲི་ཁང་ཚན་ལ་ཐོབ་ཡོད་པ་རེད། སྐབས་དེར་དྷ་ས་ས་གནས་འགོ་འཛིན་དཀོན་མཆོག་མིག་དམར་ལགས་ཀྱང་ཕེབས་ཞུགས་གནང་ཡོད་པ་བཅས།།