༄༅། །ཕྱི་ལོ་ ༢༠༢༤ ཟླ་བ་ ༠༥ ཚེས་ ༡༡ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གི་ནུབ་ཡུ་རོབ་ཁུལ་གྱི་མཛད་འཆར་ཁག་ལེགས་པར་མཇུག་སྒྲིལ་ཏེ། སུད་སི་ཕེབས་འབྱོར་སྐབས་སུད་སི་དང་ལེཀ་ཀྲིན་ཚིན་བོད་རིགས་ཚོགས་པའི་ཚོགས་གཙོ་གཙོས་པའི་ས་གནས་བོད་མི་རྣམས་ནས་ཕེབས་བསུ་ཞུས་ཡོད།
ཕྱི་ཚེས་ ༡༢ ཉིན་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་ཐོག་མར་ཨར་གྷའུ་བོད་རིགས་ཚོགས་པའི་གཟའ་མཇུག་བོད་ཡིག་སློབ་གྲྭར་འཚམས་གཟིགས་སུ་ཕེབས་ཏེ། དགེ་ལས་སློབ་ཕྲུག་རྣམས་ལ་གསུང་བཤད་གནང་ཞིང་། སྐབས་དེར་ཁོང་གིས་བོད་ཕྲུག་རྣམས་ནས་འགན་ཁུར་ཡོད་པའི་ཐོག་ནས་བོད་ཀྱི་ཆོས་དང་རིག་གཞུང་སློབ་གཉེར་གནང་རྒྱུ་གལ་གནད་ཆེན་པོ་ཡིན་པ་ལྟར། ས་གནས་བོད་མི་རྣམས་ནས་རང་འགན་རང་ཁུར་གྱི་ཐོག་ནས་མ་འོངས་སོན་རྩ་བོད་རིགས་གཞོན་ནུ་རྣམས་ལ་བོད་ཀྱི་ཆོས་དང་རིག་གཞུང་སློབ་ཁྲིད་གནང་བར་བསྔགས་བརྗོད་གནང་ཡོད།
དེ་རྗེས་བོད་ཕྲུག་འབྲེལ་མཐུད་ཚོགས་པ་དང་། ཡུ་རོབ་བོད་ཀྱི་གཞོན་ནུ་ཚོགས་པ་ཟུང་སྦྲེལ་གྱི་གོ་སྒྲིག་ཞུས་ཐོག་དཔལ་ལྡན་སྲིད་སྐྱོང་མཆོག་གིས་ཛུ་རིག་གཙུག་ལག་སློབ་གཉེར་ཁང་དུ་བོད་རིགས་གཞོན་སྐྱེས་ལྷན་ཐུག་འཕྲད་ཀྱིས་བོད་མིའི་སྒྲིག་འཛུགས་དང་། བོད་དོན་བདེན་པའི་འཐབ་རྩོད་ཡུན་གནས་ཐུབ་ཐབས། བཀའ་ཤག་སྐབས་བཅུ་དྲུག་པའི་ལས་དོན་གནང་ཕྱོགས། དབུ་མའི་ལམ་གྱི་སྲིད་བྱུས་གཞིར་བཟུང་བོད་རྒྱའི་དཀའ་རྙོག་སེལ་ཐབས་སོགས་ཀྱི་སྐོར་གསུང་བཤད་གནང་ཡོད། ཛུ་རིག་གཙུག་ལག་སློབ་གཉེར་ཁང་ནས་སུད་སི་དང་ལེག་ཀྲིན་ཚིན་བོད་རིགས་ཚོགས་པའི་ལས་ཁུངས་སུ་ཆེད་ཕེབས་ཀྱིས་སུད་སི་དང་བླངས་བོད་དོན་ཞུ་གཏུག་ལས་འགུལ་ཚོགས་མི་རྣམས་ཀྱིས་གོ་སྒྲིག་ཞུས་པའི་གཞོན་སྐྱེས་ཚོགས་འདུར་ལྷན་ཞུགས་གནང་གནང་སྟེ་བོད་དོན་འཐབ་རྩོད་དང་། གཞོན་སྐྱེས་ཀྱི་ལས་འགན་སྐོར་གསུང་བཤད་གནང་ཡོད།
ཕྱི་ཚེས་ ༡༣ ཉིན་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་སུད་སིར་འཚོག་བཞིན་པའི་གཏན་འཇགས་འཐབ་ཇུས་འཆར་འགོད་ཚོགས་ཆུང་གི་ཚོགས་འདུ་ཐེངས་དྲུག་པར་གཙོ་ཞུགས་གནང་ཡོད་ཅིང་། ཚོགས་འདུའི་ཐོག་བདེ་སྲུང་བཀའ་བློན་རྒྱ་རི་སྒྲོལ་མ་མཆོག་དང་། ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག བཀའ་ཟུར་བསྟན་པ་ཚེ་རིང་མཆོག དམིགས་བསལ་སྐུ་ཚབ་ཟུར་པ་སྐལ་བཟང་རྒྱལ་མཚན་ལགས། ཆབ་དྲུང་བཀྲ་ཤིས་རྒྱ་མཚོ་ལགས། བདེ་སྲུང་དྲུང་ཆེ་ཀརྨ་རིན་ཆེན་ལགས། ཕྱི་དྲིལ་དྲུང་ཆེ་ཀརྨ་ཆོས་དབྱིངས་ལགས། བོད་ཀྱི་སྲིད་བྱུས་ཉམས་ཞིབ་ཁང་གི་ཟླ་བ་ཚེ་རིང་ལགས། དགའ་ལྡན་ཕོ་བྲང་གི་དྲུང་ཆེ་རྔ་བ་ཚེ་རྒྱམ་ལགས། བཀའ་དྲུང་ཡིག་ཚང་གི་དྲུང་འཕར་བློ་བཟང་ཆོས་གྲགས་ལགས་ལྷན་ཞུགས་གནང་ཡོད།
ཚོགས་འདུའི་ལས་སེང་དུ་དཔལ་ལྡན་སྲིད་སྐྱོང་མཆོག་དང་ཚོགས་བཅར་བ་རྣམས་ནས་ཛུ་རིག་གི་གཞུང་དོན་ལྷན་ཚོགས་ (Government Council of Zurich) ཀྱི་བདེ་སྲུང་བློན་ཆེན་མ་རི་ཧོ་ཕེ་ཧེར་ (Mario Fehr) ལགས་དང་མཇལ་མོལ་གནང་ཡོད། ཕྱི་ཚེས་ ༡༥ ཉིན་དཔལ་ལྡན་སྲིད་སྐྱོང་མཆོག་ཕ་རན་སིའི་རྒྱལ་ས་པེ་རི་སིར་ཕེབས་ཏེ་གྲོས་ཚོགས་འཐུས་མི་དང་། གཙུག་ལག་སློབ་གཉེར་ཁང་གི་སློབ་གཉེར་བ་སོགས་དང་མཇལ་འཕྲད་གནང་རྒྱུའི་མཛད་འཆར་ཡོད་པ་བཅས།།
