༄༅། །བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་ཡུ་རོབ་ཁུལ་དུ་བོད་དོན་ཞུ་གཏུག་དང་བོད་རིགས་མང་ཚོགས་ཐུག་འཕྲད་ཀྱི་མཛད་རིམ་སྤེལ་མུས་ལྟར། ཕྱི་ལོ་ ༢༠༢༤ ཟླ་བ་ ༠༤ ཚེས་ ༢༨ ནས་དཔལ་ལྡན་སྲིད་སྐྱོང་མཆོག་གིས་སུད་སི་དང་། ཨི་ཊ་ལིའི་ཀྲྀན་ཀྲོ་ (Trento) བོལ་ཛ་ནོ། (Bolzano) ཨོསྟྲི་ཡའི་ཨིན་སི་བྷག་(Innsbruck) ཇར་མ་ནིའི་བྷར་ལིན་ (Berlin) བཅས་སུ་གཞུང་གི་གནད་ཡོད་མི་སྣ་དང་། གྲོས་ཚོགས་འཐུས་མི། གཙུག་ལག་སློབ་གཉེར་ཁང་གི་སྐུ་ཚབ་སོགས་དང་མཇལ་འཕྲད་ཀྱིས་བོད་དོན་ཞུ་གཏུག་གནང་བ་མ་ཟད། ས་གནས་དེ་དག་གི་བོད་རིགས་མང་ཚོགས་དང་ཐུག་འཕྲད་ཀྱིས་བོད་མིའི་རང་དབང་འཐབ་རྩོད་དང་། བོད་མིའི་སྒྲིག་འཛུགས་ཀྱི་ལས་དོན་གནང་ཕྱོགས་སོགས་ཀྱི་སྐོར་གསུང་བཤད་གནང་ཡོད།

ཨིན་སི་བྷག་ཏུ་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་ཨིན་སི་བྷག་གཙུག་ལག་སློབ་གཉེར་ཁང་གི་རེག་ཊར་གཞོན་པ་གཙུག་ལག་སློབ་དཔོན་བྷན་ཧརཊ་ཕུ་གན་ཤུ་ (Bernhard Fügenschuh) ལགས་དང་། གཙུག་ལག་སློབ་གཉེར་ཁང་གི་གྲོས་ཚོགས་ཀྱི་ཚོགས་མི་འབུམ་རམས་པ་ཨན་ན་གྷམ་བར་ (Anna Gamper) ལགས་དང་མཇལ་འཕྲད་གནང་ཞིང་། སྐབས་དེར་རེག་ཊར་གཞོན་པས་བོད་ཕྲུག་ཁག་ཅིག་ལ་ཨིན་སི་བྷག་གཙུག་ལག་སློབ་གཉེར་ཁང་དུ་འབུམ་རམས་པ་དང་། གཙུག་ལག་རབ་འབྱམས་པའི་སློབ་ཡོན་གནང་འཆར་དང་། འབྱུང་འགྱུར་བོད་མིའི་སྒྲིག་འཛུགས་དང་། ཨིན་སི་བྷག་གཙུག་ལག་སློབ་གཉེར་དབར་མཉམ་ལས་གནང་འདོད་ཡོད་སྐོར་གསུངས་པར་དཔལ་ལྡན་སྲིད་སྐྱོང་མཆོག་གིས་ཐུགས་རྗེ་ལེགས་འབུལ་ཞུས་ཡོད།ཟླ་བ་ ༠༥ ཚེས་ ༠༣ ཉིན་དཔལ་ལྡན་སྲིད་སྐྱོང་མཆོག་གིས་འཛམ་གླིང་ཡུ་གུར་ལྷན་ཚོགས་ཐེངས་ ༢༠ པར་ལྷན་ཞུགས་ཀྱིས་གསུང་བཤད་གནང་ཡོད་པ་དང་། སྐབས་དེར་དཔལ་ལྡན་སྲིད་སྐྱོང་མཆོག་གིས་ཡུ་གུར་བ་དང་། བོད་མི། ཧོང་ཀོང་བ། ལྷོ་སོག་པ། ཐེའི་ཝན་མི་མང་། རྒྱ་རིགས་མང་གཙོ་དོན་གཉེར་བ་རྣམས་ནི་རྒྱ་ནག་དམར་ཤོག་ཚོགས་པའི་གདུག་རྩུབ་བཙན་གནོན་ལ་གདོང་ལེན་འཐབ་རྩོད་བྱེད་མཁན་གཅིག་མཚུངས་ཡིན་པ་མ་ཟད། བོད་མི་དང་ཡུ་གུར་བ་གཉིས་ཀས་འཚེ་བ་མེད་པའི་ལམ་ནས་འཐབ་རྩོད་བྱེད་ཀྱི་ཡོད་པ་གསུངས། དེ་བཞིན་ཁོང་གིས་ཡུ་རོབ་རྒྱལ་ཁབ་ཚོས་བོད་མི་དང་ཡུ་གུར་བ་ཚོར་དམར་ཤོག་ཚོགས་པའི་བཙན་གནོན་མྱོང་མཁན་ཙམ་དུ་མ་བལྟས་པར། རྒྱ་ནག་ལ་ཁ་གཏད་གཅོག་མཁན་གྱི་ནང་གི་སྟོབས་ཤུགས་སུ་ངོས་འཛིན་གནང་ན། གྲུབ་འབྲས་ཆེ་བ་སོན་ངེས་ཡིན་པ་གསལ་སྟོན་དང་སྦྲགས། ཡུ་རོབ་རྒྱལ་ཁབ་ཁག་གིས་མང་གཙོའི་རིན་ཐང་རྣམས་གཙིགས་ཆེར་འཛིན་གྱི་ཡོད་པ་ལྟར། རྒྱ་ནག་གཞུང་ལ་དེ་དོན་ཞུ་གཏུག་དང་རྒྱ་ནག་གི་མང་གཙོའི་རྒྱབ་འགལ་དུ་འགྲོ་བའི་བྱེད་བབ་དེ་དག་ལ་ངོ་རྒོལ་གནང་དགོས་པའི་འབོད་སྐུལ་ཞུས་ཡོད་པ་རེད།

ཟླ་འདིའི་ཕྱི་ཚེས་ ༠༤ ནས་ ༠༨ བར་དཔལ་ལྡན་སྲིད་སྐྱོང་མཆོག་ནས་བྷན་ལིན་དུ་གཞུང་གི་མཐོ་རིམ་མི་སྣ་སོགས་མཇལ་འཕྲད་ཀྱི་མཛད་རིམ་ཡོད་པ་བཅས།།