༄༅། །ཕ་རན་སི་དང་རྒྱ་ནག་བར་ཕྱི་སྲིད་འབྲེལ་ལམ་འགོ་བཙུགས་ནས་ལོ་ངོ་ ༦༠ འཁོར་བའི་དུས་ཆེན་སྲུང་བརྩིའི་ཆེད་རྒྱ་ནག་གི་སྲིད་འཛིན་ཞི་ཅིན་ཕིང་རིང་མིན་ཕ་རན་སིར་སླེབ་ལ་ཉེ་བའི་སྐབས་ཏེ། ཕྱི་ལོ་ ༢༠༢༤ ཟླ་བ་ ༠༤ ཚེས་ ༣༠ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་ཕ་རན་སིའི་སྲིད་འཛིན་ཨེ་མེ་ནོལ་མེག་རོན་མཆོག་དང་མཇལ་འཕྲད་གནང་ཡོད།

དེ་ཡང་སྐབས་དེར་དཔལ་ལྡན་སྲིད་སྐྱོང་མཆོག་ཕ་རན་སིའི་རྒྱལ་ས་པེ་རི་སིར་ཆེད་ཕེབས་ཀྱིས་བོད་དོན་རྒྱབ་སྐྱོར་བ་དང་ཕ་རན་སི་གྲོས་ཚོགས་འཐུས་མི་ཟུར་པ་ཨན་ཊི་རི་གྷ་ཊོ་ལོན་ (Andre Gattolin) ལགས་ལ་ཆེ་བསྟོད་གཟེངས་རྟགས་འབུལ་བཞེས་མཛད་སྒོར་ལྷན་ཞུགས་དང་འབྲེལ། ཕ་རན་སིའི་སྲིད་འཛིན་ཨེ་མེ་ནོལ་མེག་རོན་ (Emmanuel Macron) མཆོག་དང་མཇལ་འཕྲད་ཀྱིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་མཚན་རྟགས་སྐྱོན་པའི་སྐུ་པར་ཞིག་ཕུལ་ཏེ་བོད་དོན་ལ་རྒྱབ་སྐྱོར་གནང་སྐྱོང་ཡོང་བའི་རེ་སྐུལ་ཞུས་ཡོད་པ་བཅས།།