༄༅། །འདི་གར་ཐའེ་ཝན་སྐུ་ཚབ་དོན་གཅོད་ལས་ཁུངས་ནས་བཏང་གནས་ནང་འཁོད་དོན། ཕྱི་ལོ་ ༢༠༢༤ ཟླ་བ་ ༥ ཚེས་ ༡༦ ཉིན་དཔལ་ལྡན་བོད་མི་མང་སྤྱི་འཐུས་ཚོགས་གཞོན་སྒྲོལ་མ་ཚེ་རིང་མཆོག་གི་དབུ་འཁྲིད་པའི་སྤྱི་འཐུས་བསྟན་པ་ཡར་འཕེལ་ལགས་དང་། སྤྱི་འཐུས་བཀྲ་ཤིས་དོན་གྲུབ་ལགས་བཅས་ཐའེ་ཝན་ཐའོ་ཡོན་རྒྱལ་སྤྱིའི་གནམ་ཐང་དུ་ཞབས་སོར་བདེ་བར་འཁོད་དེ་ཐའེ་ཝན་བོད་ཀྱི་སྐུ་ཚབ་དོན་གཅོད་དང་ཐའེ་སྡོད་བོད་རིགས་ཚོགས་པའི་ཚོགས་གཙོ་དང་ཚོགས་གཞོན། ས་གནས་གཞོན་ནུའི་ཚོགས་གཙོ་བཅས་ནས་ཕེབས་བསུ་གཟབ་རྒྱས་ཞུས་ཡོད། 

དེ་ནས་དགོང་དྲོ་ཆུ་ཚོད་ ༦།༣༠ ཐོག་ཐའེ་ཝན་ཞི་བདེ་ཡུན་བརྟན་བསྟི་གནས་ཁང་གི་འགན་འཛིན་ (Mr. Chen-Ming-Huang) ལགས་དང་དྲུང་ཡིག་མཉམ་དུ་ཞལ་ལག་མཉམ་རོལ་གྱིས་གླེང་མོལ་ཞིབ་ཕྲ་གནང་ཡོད།

ཕྱི་ལོ་ ༢༠༢༤ ཟླ་བ་ ༥ ཚེས་ ༡༧ ཉིན་རྒྱབ་ཚུ་ཚོད་ ༡།༣༠ ཙམ་ལ་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་དང་དྲུང་ཆེ་ཀརྨ་ཆོས་དབྱིངས་ལགས་རྣམ་གཉིས་ཐའེ་ཝན་ཐའོ་ཡོན་རྒྱལ་སྤྱིའི་གནམ་ཐང་དུ་ཞབས་སོར་བདེ་བར་འཁོད་དེ་ཐའེ་ཝན་བོད་ཀྱི་སྐུ་ཚབ་དོན་གཅོད་ལས་ཁུངས་ཀྱི་དྲུང་ཆེ། ཐའེ་སྡོད་བོད་རིགས་ཚོགས་པའི་ཚོགས་གཙོ་དང་རྒྱུན་ལས་རྣམ་པའི་ཕེབས་བསུ་གཟབ་རྒྱས་ཞུས་ཡོད།

དེ་ནས་ཐའེ་ཡོན་རྒྱལ་སྤྱིའི་གནམ་ཐང་ནས་ཐད་ཀར་ཐའེ་ཝན་བོད་དང་ཐའེ་ཝན་འགྲོ་བ་མིའི་ཐོབ་ཐང་ཚོགས་པ་གཙོས་པའི་གཞུང་ཁོངས་མིན་པའི་ཚོགས་པ་ཁག་ནས་གོ་སྒྲིག་ཞུས་པའི་ཀུན་གཟིགས་པཎ་ཆེན་ཆུང་སྲིད་རིན་པོ་ཆེ་མཆོག་རྒྱ་དམར་གཞུང་གིས་བཙན་འཁྲིད་གར་སོང་ཆ་མེད་དུ་གྱུར་ནས་མི་ལོ་ ༢༩ འཁོར་བའི་དྲ་ཐོག་གསར་འགོད་གསལ་བསྒྲགས་གནང་བའི་མཛད་སྒོར་མཉམ་ཞུགས་ཀྱིས་གསུང་བཤད་གནང་ཡོད། སྐབས་དེར་གཟིག་རྒྱབ་རིན་པོ་ཆེ་མཆོག་དང་། བོད་མི་མང་སྤྱི་འཐུས་ཚོགས་གཞོན་སྒྲོལ་མ་ཚེ་རིང་མཆོག་བཅས་ནས་ཀུན་གཟིགས་པཎ་རིན་པོ་ཆེ་མཆོག་དང་འབྲེལ་བའི་གསུང་བཤད་གནང་། གོང་གསལ་གསར་འགོད་གསལ་བསྒྲགས་ཐོག་སྤྱི་འཐུས་བསྟན་པ་ཡར་འཕེལ་ལགས་དང་སྤྱི་འཐུས་བཀྲ་ཤིས་དོན་གྲུབ་ལགས་རྣམ་གཉིས་ཀྱང་མཉམ་ཞུགས་གནང་ཡོད། དེ་ནས་དགོང་དྲོ་ཚོུད་ལྔ་པ་ནས་དྲུག་པ་བར་ཐའེ་ཝན་གཞུང་འབྲེལ་གནད་ཡོད་མི་སྣ་དང་མཇལ་འཕྲད་ཀྱིས་བཀའ་མོལ་ཞིབ་ཕྲ་བྱུང་ཡོད། །