༄༅། །འདི་གར་ཐའེ་ཝན་བོད་ཀྱི་སྐུ་ཚབ་དོན་ཁང་ནས་བཏང་གནས་ནང་འཁོད་དོན། ཐའེ་ཝན་བོད་ཀྱི་སྐུ་ཚབ་དོན་གཅོད་ལས་ཁུངས་དང་། བོད་དང་ཐའེ་ཝན་འགྲོ་བ་མིའི་ཐོབ་ཐང་ཚོགས་པ་ཟུང་ནས་ཐའེ་ཝན་སྐབས་བཅུ་གཅིག་པའི་གྲོས་ཚོགས་བོད་དོན་རྒྱབ་སྐྱོར་ཚོགས་ཆུང་བསྐྱར་གསོ་ཞུ་ཆེད། ཕྱི་ཟླ་ ༣ ཟླ་མཇུག་ནས་བཟུང་ཐའེ་ཝན་སྐབས་བཅུ་གཅིག་པའི་གྲོས་ཚོགས་འཐུས་མི་ཁག་ལ་མཇལ་བཅར་ཞུས་ཏེ། གྲོས་ཚོགས་འཐུས་མིར་གདམ་ཐོན་བྱུང་བར་འཚམས་འདྲིའི་བཀྲ་ཤིས་བདེ་ལེགས་ཞུས་པ་དང་ཆབས་ཅིག འདས་པའི་ལོ་མང་རིང་བོད་དོན་དང་བོད་མི་ལ་རྒྱབ་སྐྱོར་ཚད་མེད་གནང་བར་ཐུགས་རྗེ་ཆེ་ཞུས་པ་དང་། མ་འོངས་པར་མུ་མཐུད་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ནང་མཉམ་ཞུགས་གནང་སྟེ་བོད་ཐའེ་གཉིས་དབར་གྱི་མཛའ་བརྩེའི་འབྲེལ་བ་གོང་སྤེལ་དང་། མུ་མཐུད་བོད་དོན་དང་བོད་མིའི་དཀའ་ངལ་སེལ་ཆེད་གང་ཅིའི་ཐད་རྒྱབ་སྐྱོར་གནང་སྐྱོང་བའི་ཞུ་གཏུག་གི་ལས་འགུལ་སྤེལ་དང་སྤེལ་མུས་ཡིན་པ་རེད། 
ཕྱི་ཟླ་ ༣ ཚེས་ ༢༩ ཉིན་ཐའེ་ཝན་བོད་ཀྱི་སྐུ་ཚབ་དོན་གཅོད་འབའ་བ་སྐལ་བཟང་རྒྱལ་མཚན་ལགས་དང་། དོན་ཁང་གི་དྲུང་ཆེ་མི་འགྱུར་གཡུ་སྒྲོན་ལགས། བོད་དང་ཐའེ་ཝན་འགྲོ་བ་མིའི་ཐོབ་ཐང་གི་འགན་འཛིན་ཚོགས་མི་བཀྲ་ཤིས་ཚེ་རིང་ལགས། གཞན་ཡང་དོན་ཁང་གི་ལས་བྱེད་བཅས་ཐའེ་ཝན་གྲོས་ཚོགས་སྐབས་བཅུ་པའི་བོད་དོན་རྒྱབ་སྐྱོར་ཚོགས་པའི་ཚོགས་གཞོན་གྲོས་ཚོགས་འཐུས་མི་ཧུང་ཧྲིན་ཧན་ལགས་ཀྱི་ཡིག་ཚང་དུ་བཅར་ཏེ་སྐབས་བཅུ་གཅིག་པའི་གྲོས་ཚོགས་བོད་དོན་རྒྱབ་སྐྱོར་ཚོགས་ཆུང་བསྐྱར་གསོ་བྱ་ཕྱོགས་སྐོར་བཀའ་མོལ་ཞུས་པ་དང་། དེ་དུས་ཕྱོགས་ཕན་ཚུན་གཉིས་དབར་ཕྱི་ཟླ་ ༥ ཚེས་ ༡༧ པཎ་ཆེན་ཆུང་སྲིད་རིན་པོ་ཆེ་རྒྱ་དམར་གཞུང་གིས་བཙན་འཁྲིད་བྱས་ཏེ་མི་ལོ་ ༢༩ འཁོར་བའི་དུས་དྲན་དང་སྟབས་བསྟུན། ཐའེ་ཝན་སྐབས་བཅུ་གཅིག་པའི་གྲོས་ཚོགས་བོད་དོན་རྒྱབ་སྐྱོར་ཚོགས་ཆུང་བསྐྱར་གསོའི་མཛད་སྒོ་ཚོགས་ཐབས་དང་། དེའི་ཆེད་དུ་བོད་དང་ཐའེ་ཝན་འགྲོ་བ་མིའི་ཐོབ་ཐང་ཚོགས་པའི་འགན་འཛིན་ཚོགས་མི་བཀྲ་ཤིས་ཚེ་རིང་ལགས་ཆེད་དུ་གཞུང་འབྲེལ་རྡ་སར་བསྐྱོད་དེ་འབྲེལ་ཡོད་བཀའ་སྤྱི་གཉིས་ཀྱི་སྐུ་ཚབ་ཕེབས་གནང་ཡོང་བའི་མགྲོན་ཤོག་ཕུལ་བར་བཅར་རྒྱུའི་ཐག་གཅོད་བྱས།
ཕྱི་ཟླ་ ༤ ཚེས་ ༡ ཉིན་སྐབས་བཅུ་གཅིག་པའི་གྲོས་ཚོགས་འཐུས་མི་གསར་པ་ལྕམ་ཧུའང་ཇེ་ལགས་ཀྱི་ཡིག་ཚང་དུ་བཅར་ཏེ་འཚམས་འདྲིའི་བཀྲ་ཤིས་བདེ་ལེགས་ཞུས་པ་དང་། མ་འོངས་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ནང་དུ་ཞུགས་གནང་ཡོང་བའི་རེ་བསྐུལ་ཞུས་པ་དང་ཆབས་ཅིག ཉེ་ལམ་བོད་མདོ་ཁམས་སྡེ་དགེའི་ཕྱོགས་སུ་རྒྱ་གཞུང་གི་གློག་ཁང་ལས་གཞི་ལས་བོད་མི་ཚོར་དཀའ་ངལ་འཕྲད་བཞིན་པའི་བོད་མིའི་སྒྲིག་འཛུགས་ཀྱི་ཛ་དྲག་འབོད་བསྐུལ་ཞུ་ཡིག་དང་། བཀའ་ཤག་སྐབས་བཅུ་དྲུག་པའི་བོད་ཀྱི་མ་འོངས་འགན་སྲུང་གི་ཕུགས་དམིགས་ཡིག་ཆ། གཞན་ཡང་༧གོང་ས་མཆོག་གི་བཀའ་སློབ་སྙིང་བཅུད་གསལ་བའི་དོན་ཁང་གི་ལོ་ཐོ་བཅས་བོད་དོན་ལ་རྒྱུས་ལོན་དང་དོ་སྣང་ཡོང་ཆེད་དུ་ཕུལ།
ཕྱི་ཟླ་ ༤ ཚེས་ ༣ ཉིན་ཐའེ་ཝན་གྲོས་ཚོགས་འཐུས་མི་རྙིང་གྲས་སྐུ་ཞབས་ཝང་ཏིང་ཡུས་ལགས་ཀྱི་ཡིག་ཚང་དུ་བཅར་ཏེ་འདས་པའི་ལོ་མང་རིང་བོད་དོན་ལ་རྒྱབ་སྐྱོར་ཚད་མེད་གནང་བར་ཐུགས་རྗེ་ཆེ་ཞུས་པ་དང་། ད་ལྟའི་བོད་ཕྱི་ནང་གི་གནས་སྟངས། བཙན་བྱོལ་བོད་མི་ཐའེ་ཝན་དུ་ཡོང་བར་ཐོངས་མཆན་ཞུ་ཕྱོགས་སྐོར་གྱི་དཀའ་ངལ་སོགས་ངོ་སྤྲོད་ཞུས་རྗེས། གོང་གསལ་ཡིག་ཆ་ཁག་ཁོང་ལ་ཕུལ་བ་དང་། གྲོས་ཚོགས་འཐུས་མི་སྐུ་ཞབས་ཝང་ཏིང་ཡུས་ལགས་ཀྱི་ཡིག་ཚང་དུ་བཅར་སྐབས། ཐའེ་ཝན་འགྲོ་བ་མིའི་ཐོབ་ཐང་ཚོགས་པའི་ཉམས་ཞིབ་པ་རྒས་གྲས་ཧྲི་ཡེ་ཤང་ལགས་བོད་དང་ཐའེ་ཝན་འགྲོ་བ་མིའི་ཐོབ་ཐང་ཚོགས་པའི་ཚབ་ཞུས་ཏེ་མཉམ་བཅར་ཞུས་ཡོད།
ཕྱི་ཟླ་ ༤ ཚེས་ ༡༡ ཉིན་གྲོས་ཚོགས་འཐུས་མི་སྐུ་ཞབས་ཧྲིན་སྦུ་ཡང་ལགས་ཀྱི་ཡིག་ཚང་དུ་བཅར་ཞིང་། སྐུ་ཚབ་དོན་གཅོད་ནས་འཚམས་འདྲིའི་མཇལ་དར་ཕུལ་བ་དང་ཆབས་ཅིག བཀའ་མོལ་ཞུ་དགོས་ཁག་ཞུས་རྗེས་དོན་ཁང་གི་ལས་བྱེད་རྣམས་གྲོས་ཚོགས་འཐུས་མི་སྐུ་ཞབས་ཧྲིན་སྦུ་ཡང་ལགས་དང་དྲན་རྟེན་གྱི་མཉམ་པར་སྒྲོན་པ་དང་། མ་འོངས་ཕྱོགས་ཕན་ཚུན་མཉམ་ལས་ཞུ་ཕྱོགས་སོགས་སྐོར་བཀའ་མོལ་ལྷུག་པོ་བྱུང་ཡོད་པ་རེད།
ཕྱི་ཟླ་ ༤ ཚེས་ ༡༡ ཉིན་སྐུ་ཚབ་དོན་གཅོད་འབའ་བ་སྐལ་བཟང་རྒྱལ་མཚན་ལགས་ནས་ཐའེ་ཝན་གྲོས་ཚོགས་འཐུས་མི་སྐུ་ཞབས་ཆུའུ་ཀྲི་དབྱེ་ལགས་ཀྱི་ཡིག་ཚང་དུ་བཅར་ཏེ་བོད་དོན་ངོ་སྤྲོད་ཞུ་བཞིན་པ་དང་། གྲོས་ཚོགས་འཐུས་མི་ཁོང་ནས་མ་འོངས་ ༢༠༢༥ ལོའི་གྲོས་ཚོགས་བོད་དོན་རྒྱབ་སྐྱོར་ཚོགས་འདུར་བཅར་རྒྱུའི་རེ་འདུན་ཡོད་པ་དང་། བོད་དོན་དང་འབྲེལ་བའི་ལས་དོན་ཆེ་ཕྲ་གང་ཡིན་རུང་རོགས་པ་གང་ཐུབ་ཞུ་ཆོག་པའི་ཕན་ཚུན་བཀའ་མོལ་ལྷུག་པོ་བྱུང་ཡོད་པ་རེད།
ཕྱི་ལོ་ ༤ ཚེས་ ༡༡ ཉིན་སྐུ་ཚབ་དོན་གཅོད་དང་དྲུང་ཆེ་རྣམ་གཉིས་གྲོས་ཚོགས་འཐུས་མི་ལྕམ་ཀྲང་ཡ་ལིང་གི་ཡིག་ཚང་དུ་བཅར་བ་དང་། སྐུ་ཚབ་དོན་གཅོད་ལགས་ནས་གྲོས་ཚོགས་འཐུས་མི་ཁོང་ལ་བོད་དོན་ངོ་སྤྲོད་དང་འབྲེལ། དོན་གཅོད་ལས་ཁུངས་ཀྱི་ཆེད་དུ་བཟོས་པའི་ཤོག་ནོན་པདྨའི་ཤེལ་རྡོ་ཞེས་ཡིག་ཚང་དུ་ཤོག་གུ་མནན་ས། ཤེལ་རྡོའི་སྒང་ཨ། ཀ མ་ཞེས་ཡིག་འབྲུ་གསུམ་གསལ་བ་དེ་རྒྱལ་མཆོག་སྐུ་ཕྲེང་བཅུ་གསུམ་པ་དགོངས་པ་རྫོགས་རྗེས་ཡང་སྲིད་བཙལ་འཚོལ་ཆེད་མཚོ་མཇལ་སྐབས་ཇི་བྱུང་དང་། དེར་བརྟེན་ནས་ད་ལྟའི་རྒྱལ་མཆོག་སྐུ་ཕྲེང་བཅུ་བཞི་པ་ངོས་འཛིན་ཇི་ལྟར་གནང་ལུགས་ཀྱི་ཡ་མཚན་ལོ་རྒྱུས་སོགས་ངོ་སྤྲོད་མཐིལ་ཕྱིན་ཞུས།
ཕྱི་ཟླ་ ༤ ཚེས་ ༡༡ ཉིན་གྲོས་ཚོགས་འཐུས་མི་ཁྲིན་ཕེལ་ཡུས་ཀྱི་ཡིག་ཚང་དུ་བཅར་ཏེ་བོད་དོན་ངོ་སྤྲོད་དང་འབྲེལ། ཤོག་ནོད་པདྨའི་ཤེལ་རྡོ་སྒང་གསལ་བའི་ཨ། ཀ མ་ཡིག་འབྲུ་གསུམ་གྱི་ཡ་མཚན་དངོས་བྱུང་ལོ་རྒྱུས་གོང་བཞིན་ངོ་སྤྲོད་ཞུས་པ་དང་། གཞན་ཡང་གྲོས་ཚོགས་འཐུས་མིའི་དྲི་བ་ལས་སྐུ་ཚབ་དོན་གཅོད་ལགས་ནས་རྒྱ་གཞུང་གིས་སྐུའི་ཡང་སྲིད་སྐོར་གྱི་འཁྱོག་བཤད་དང་། སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ནས་ཕྱི་ལོ་ ༢༠༡༡ ལོར་སྐུའི་ཡང་སྲིད་སྐོར་གྱི་ཡོངས་ཁྱབ་གསལ་བསྒྲགས། ད་ལྟའི་བཀའ་ཤག་གི་སྐུའི་ཡང་སྲིད་སྐོར་གྱི་སྲིད་བྱུས་སོགས་ཀྱང་ངོ་སྤྲོད་ཞུས།
གྲོས་ཚོགས་འཐུས་མི་ཁོང་ནི་སློབ་གྲྭའི་སློབ་གསོ་སྐོར་ལ་དོ་སྣང་ཆེན་པོ་ཡོད་མཁན་ཞིག་དང་། དམིགས་བསལ་༧གོང་ས་༧སྐྱབས་མགོན་ཆེན་པོ་མཆོག་གི་དགོངས་གཞི་སྤྱི་ཚོགས་སེམས་ཚོར་གྱི་སློབ་གསོའི་སྐོར་ལ་དོ་སྣང་ཡོད་པས། ཨ་རིའི་ཨེ་མེ་རོ་གཙུག་ལག་སློབ་གཉེར་ཁང་དུ་དགེ་བཤེས་བློ་བཟང་བསྟན་འཛིན་རུ་ཁག་གི་ལག་བསྟར་བྱེད་བཞིན་པའི་ལས་གཞི་དེ་ད་ལྟ་ཐའེ་ཝན་ལི་རིན་ཐེབས་རྩ་ཁང་དང་གན་ཡིག་ཇི་འཇོག་དང་། དགེ་རྒན་ཁག་ལ་ཟབ་སྦྱོག་ཕུལ་སྟངས། མ་འོངས་ཕན་ཚུན་ངོ་ཐུག་བྱས་ཏེ་ལས་གཞི་དེ་ཐའེ་ཝན་གྱི་སློབ་གྲྭ་ཁག་ཏུ་སྤེལ་ཐབས་བཅས་སྐོར་ལ་བཀའ་མོལ་ལྷུག་པོ་ཞུས།
གྲོས་ཚོགས་བོད་དོན་རྒྱབ་སྐྱོར་ཚོགས་པ་དེ་བཞིན་ཆབ་སྲིད་ཚོགས་པ་འདྲ་མིན་གྱི་འཐུས་མི་མཉམ་ཞུགས་དགོས་སྟབས། ཕྱི་ཟླ་ ༤ ཚེས་ ༡༥ ཉིན་ཐའེ་ཝན་མང་ཚོགས་ཚོགས་པའི་གྲོས་ཚོགས་འཐུས་མི་ལྕམ་ཁྲིན་ཀྲའོ་ཙེ་ལགས་དང་མཇལ་འཕྲད་ཞུ་རྒྱུའི་གོ་སྐབས་ལྷོད་པོ་བྱུང་བ་དང་། གྲོས་ཚོགས་འཐུས་མི་ཁོང་ནི་ནམ་རྒྱུན་ནས་བོད་དོན་ལ་དོ་སྣང་དང་རྒྱབ་སྐྱོར་གནང་མཁན་ཞིག་ཡིན་པ་མ་ཟད། མ་འོངས་པར་མུ་མཐུད་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ནང་འཛུལ་ཞུགས་བྱ་རྒྱུ་དང་། བོད་དོན་དང་བོད་མི་ཚོར་རོགས་པ་ཇི་དགོས་ག་དུས་ཡིན་ནའང་གྲ་སྒྲིག་ཨང་གསར་ཡོད་པའི་བཀའ་མོལ་ཞིབ་ལྷུག་བྱུང་།
གྲོས་ཚོགས་འཐུས་མི་རྙིང་གྲས་ཆུའུ་དབྱེ་ཡུན་ལགས་ནི་དབང་ནུས་ཅན་གྱི་གྲོས་ཚོགས་འཐུས་མི་ཞིག་ཡིན་ཅིང་། ཕྱི་ཟླ་ ༤ ཚེས་ ༡༧ ཉིན་མོ་རང་གི་ཡིག་ཚང་དུ་བཅར་ཏེ་གོང་གསལ་ཡིག་ཆ་ཁག་ཕུལ་བ་མ་ཟད། སྤྱི་ཡོངས་བོད་ཕྱི་ནང་གི་གནས་སྟངས་དང་། ཡང་སྒོས་ཐའེ་བོད་བར་གྱི་འབྲེལ་ལམ་དང་འབྲེལ་བའི་དཀའ་ངལ་སེལ་དགོས་ཁག་ཞིབ་ཅིང་ཕྲ་བ་ཞུ་རྒྱུའི་གོ་སྐབས་ལྷོད་པ་བྱུང་ཡོད་པ་རེད།
གྲོས་ཚོགས་འཐུས་མི་ཧྥང་ཡུན་ལགས་ནི་བོད་དོན་རྒྱབ་སྐྱོར་བ་རྙིས་གྲས་ཤིག་དང་། གཙོ་བོ་ཤེས་ཡོན་སློབ་གསོའི་སྡེ་ཚན་དང་འབྲེལ་བ་ཆགས་ཀྱི་ཡོད་པ་དང་། ཕྱི་ཟླ་ ༤ ཚེས་ ༢༣ ཉིན་གྲོས་ཚོགས་འཐུས་མི་ཁོང་གི་ཡིག་ཚང་དུ་བཅར་ཏེ་གོང་གསལ་ལྟར་གནས་ཚུལ་ཆ་ཚང་འགྲེལ་བརྗོད་ཞུས་པ་དང་། གྲོས་ཚོགས་འཐུས་མི་ཁོང་གིས་ཀྱང་མ་འོངས་མུ་མཐུད་རོགས་པ་གང་དགོས་གནང་རྒྱུ་ཡིན་པའི་བཀའ་མོལ་ཞིབ་ལྷུག་ཞུས་ཡོད་པ་རེད།
ད་ཐེངས་ཞུ་གཏུག་གི་ལས་འགུལ་ཁྲོད་དུ་ད་དུང་ཆབ་སྲིད་ཚོགས་པ་གོ་མིང་ཏང་དང་། མང་ཚོགས་ཚོགས་པའི་ཁོངས་གྲོས་ཚོགས་འཐུས་མི་ཡང་ཐུག་ཡོད་ཅིང་། ཕྱི་ཟླ་ ༥ ཚེས་ ༣ སྔ་དྲོ་སླར་ཡང་གྲོས་ཚོགས་འཐུས་མི་ཧུང་ཧྲིན་ཧན་མཆོག་གི་ཡིག་ཚང་དུ་འཛོམས་ཏེ། ཕྱི་ཟླ་ ༥ ཚེས་ ༡༧ ཉིན་ཐའེ་ཝན་གྲོས་ཚོགས་བོད་དོན་རྒྱབ་སྐྱོར་ཚོགས་པ་སླར་གསོའི་མཛད་སྒོ་དང་། དགོང་མོ་དགའ་སྟོན་གསོལ་ཚིགས གཞན་ཡང་མཛད་རིམ་གཞན་བཅས་གོ་བསྡུར་ཞིབ་ཕྲ་ཞུས་ཏེ་གཏན་འབེབས་ཁ་གསལ་ཞུས་ཡོད་པ་དང་། སྔ་རྗེས་གྲོས་ཚོགས་འཐུས་མི་ ༣༠ ལྷག་ནས་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ནང་དུ་ཞུགས་རྒྱུའི་མོས་པ་ཡོད་པ་དང་བཅས། །
