༄༅། །ཕྱི་ལོ་ ༢༠༢༤ ཟླ་ ༠༥ ཚེས་ ༢༥ ཉིན་ཏེ་ནང་པའི་ལོ་ཐོའི་ནང་གི་དུས་ཆེན་རྩ་ཆེ་ཤོས་ས་ག་ཟླ་བའི་ཚེས་བཅོ་ལྔ་ཉིན་བོད་མི་དང་ཉི་འོང་གི་མི་མང་མཉམ་འཛོམས་ཀྱིས་ཉི་འོང་སྐུ་ཚབ་དོན་ཁང་དུ་སྨོན་ལམ་དང་། དུས་ཆེན་དང་འབྲེལ་བའི་གོ་རྟོགས་གསུང་བཤད་ཀྱི་ལས་རིམ་ཞིག་གོ་སྒྲིག་ཞུས་ཡོད།

དེ་ཡང་གོང་ཚེས་ཉིན་ཉི་འོང་སྐུ་ཚབ་དོན་ཁང་གི་དྲུང་ཆེ་བཀྲ་ཤིས་དབྱངས་འཛོམས་ལགས་ཀྱིས་ཕེབས་བསུའི་གསུང་བཤད་དང་འབྲེལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་པར་མཐོང་གྲོལ་རིན་པོ་ཆེར་མཇལ་དར་སྒྲོན་ཏེ་ས་ག་ཟླ་བ་ནི་བོད་བརྒྱུད་ནང་བསྟན་ཁྲོད་ཆེས་རྩ་ཆེ་བའི་ཟླ་བ་ཞིག་ཡིན་པ་ནན་བརྗོད་གནང་སྟེ་ཚོགས་བཅར་བ་དང་སྐུ་མགྲོན་རྣམས་ཕེབས་པར་ཐུགས་རྗེ་ཆེ་ཞུས།དེ་ནས་པོ་ཏ་ལ་མཐོ་སློབ་ཀྱི་དཀོན་མཆོག་སྲི་ཐར་ལགས་ཀྱིས་སྟོན་པའི་འཁྲུངས་རབས་མདོར་བསྡུས་ཤིག་གསུངས་ཏེ་ས་ག་ཟླ་བ་ནི་སངས་རྒྱས་ཤཱཀྱ་ཐུབ་པ་འཁྲུངས་ཤིང་སངས་རྒྱས་པ། མྱ་ངན་ལས་འདས་པ་བཅས་ཀྱི་དུས་ཆེན་གསུམ་འཛོམས་ཡིན་པ་དང་།  ཉིན་དེར་ཆོས་ཉམས་ལེན་གཙོས་པའི་བསོད་ནམས་གསོག་པའི་རྟེན་འབྲེལ་ཁྱད་པར་ཅན་ཡིན་པའི་སྐོར་འགྲེལ་བརྗོད་གནང་བ་དང་འབྲེལ། ཉིན་དེར་དགེ་བའི་ལས་བསྒྲུབས་ན་བསོད་ནམས་རྒྱ་ཆེར་འཕེལ་གྱི་ཡོད་པ་གསུངས།

དེ་རྗེས་ཚོགས་བཅར་བ་རྣམས་ནས་ཆུ་ཚོད་གཅིག་རིང་སྨོན་ལམ་གསུང་འདོན་གནང་གྲུབ་མཚམས་པོ་ཏ་ལ་མཐོ་སློབ་ཀྱི་དཀོན་མཆོག་སྲི་ཐར་ལགས་དང་། ཝ་སེ་ཌ་ (Waseda University) གཙུག་ལག་སློབ་གཉེར་ཁང་གི་ཡུ་མི་ཀོ་ཨི་ཤི་ཧ་མ་ལགས་རྣམ་གཉིས་ཀྱིས་ཚོགས་བཅར་བའི་དྲི་བ་ཁག་ལ་ལན་འདེབས་གནང་རྗེས་མཐར་ཚོགས་བཅར་བ་རྣམས་ལ་གསོལ་ཇ་དང་ཚོགས་སོགས་འདེགས་འབུལ་ཞུས་ཏེ་སྨོན་ལམ་ལེགས་པར་གྲུབ་ཡོད་པ་བཅས།།