༄༅། །འདི་གར་ཆོས་རིག་ལས་ཁུངས་ནས་བཏང་གནས་ནང་འཁོད་དོན། བཙན་བྱོལ་བོད་མིའི་ཆོས་ཚོགས་ཐེངས་ ༡༤ པའི་གྲོས་གཞི་དོན་ཚན་དང་པོའི་གྲོས་ཆོད་ཨང་ ༡༣ པ། རྒྱ་བལ་འབྲུག་གསུམ་གྱི་དགོན་སྡེ་ཁག་ལ་ཆོས་རིག་ལས་ཁུངས་ནས་ཚོགས་ཆུང་ཆེད་འཛུགས་ཀྱིས་ཆོས་བརྒྱུད་སྤྱིའི་ཐོག་ཉམས་ཆག་གང་ཕྱིན་པ་རྣམས་ལ་ཞིབ་འཇུག་མཐིལ་ཕྱིན་གནང་རྒྱུ། ཞེས་པའི་གྲོས་ཆོད་དགོངས་དོན་ལྟར། བོད་མིའི་སྒྲིག་འཛུགས་ཆོས་རིག་ལས་ཁུངས་ནས་གཡུང་དྲུང་བོན་དང་བཅས་པའི་བོད་ཀྱི་ཆོས་བརྒྱུད་ཁག་གི་དབུ་ཁྲིད་བླ་ཆེན་རྣམ་པར་ཚོགས་ཆུང་གི་ཚོགས་མི་རུ་ཆོས་བརྒྱུད་སོ་སོ་ནས་སྐུ་ཚབ་གཉིས་རེ་བསྐོ་གནང་ཡོང་བ་ཇི་ལྟར་གསོལ་འདེབས་ཞུས་པ་བཞིན། ཆོས་བརྒྱུད་སོ་སོ་ནས་སྐུ་ཚབ་ཚོགས་མི་གཉིས་རེ་བསྐོ་གཞག་གིས་ཚོོགས་མི་ ༡༢ ལས་གྲུབ་པའི་ཆེད་བཙུགས་ཞིབ་འཇུག་ཚོགས་ཆུང་བསྐོ་འཛུགས་གནང་།
ཕྱི་ལོ་ ༢༠༢༤ ཟླ་ ༤ ཚེས་ ༩ དང་ ༡༠ ཉིན་གཉིས་རིང་ཆོས་རིག་ལས་ཁུངས་སུ་ཆེད་བཙུགས་ཞིབ་འཇུག་ཚོགས་ཆུང་གི་ཚོགས་མི་རྣམས་ལྷན་ཚོགས་ཀྱིས་འདི་གའི་ཁྱབ་ཁོངས་ཆོས་སྡེ་ཁག་ཏུ་བཤད་སྒྲུབ་འཆད་ཉན། འདུལ་ཁྲིམས། ཤེས་ཡོན། འཕྲོད་བསྟེན། ཚན་རིག་སློབ་ཁྲིད་བཅས་དོན་ཚན་ལྔའི་ཐོག་ཞིབ་འཇུག་གནང་རྒྱུ་ཐུགས་གཏན་ཁེལ་བ་དང་། དེ་འབྲེལ་ཞིབ་འཇུག་གི་འགེངས་ཤོག་གཏན་འབེབས་གནང་།
སྐོར་སྐྱོད་གནང་ཚུལ་དེ་ཡང་ཚོགས་མི་གསུམ་ལྡན་གྱི་སྡེ་ཚན་བཞིར་ཆ་བགོས་དང་། སྡེ་ཚན་སོ་སོར་རྒྱ་བལ་ཁུལ་གྱི་དགོན་སྡེ་ཁག་ས་བགོས་བཞིན་ཟླ་ ༤ ཚེས་ ༡༡ ནས་ཟླ་ ༥ ཚེས་ ༢༤ བར་འདི་གའི་ཁྱབ་ཁོངས་རྒྱ་བལ་ནང་གི་རིས་མེད་ཆོས་བརྒྱུད་ཁག་གི་མ་དགོན་དང་བཤད་གྲྭ་ཆེ་གྲས་གྲངས་ ༧༦ ལ་ངོ་བཅར་ཐོག་ཞིབ་འཇུག་གནང་།
ཕྱི་ཟླ་ ༥ ཚེས་ ༢༥ ནས་ ༣༠ བར་སླར་ཡང་ཆོས་རིག་ལས་ཁུངས་སུ་ལྷན་འཛོམས་ཀྱིས་ཚོགས་ཆུང་སོ་སོའི་ཁྱབ་ཁོངས་དགོན་སྡེ་ཁག་གི་འགེངས་ཤོག་ཞིབ་བཤེར་དང་། འཛིན་སྐྱོང་། དགེ་བསྐོས། དཔེ་ཁྲིད་དགེ་རྒན། སློབ་གཉེར་བཅས་ཀྱི་གོང་གསལ་དོན་ཚན་ཐོག་དགོངས་ཚུལ་ཇི་ཡོད་བཅས་ཀྱི་གྲུབ་དོན་ཁག་ཕྱོགས་བསྒྲིགས་ཀྱིས་སྙན་ཐོ་བཟོ་འབུལ་ཟིན། ཕྱི་ཟླ་ ༥ ཚེས་ ༣༡ ཉིན་བཞུགས་སྒར་རྒྱལ་བའི་ཕོ་བྲང་དུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་མཇལ་ཁ་དང་སྦྲགས་ཆེད་བཙུགས་ཞིབ་འཇུག་ཚོགས་ཆུང་གི་ལས་བསྡོམས་སྙན་སྒྲོན་ཞུ་རྒྱུའི་སྐལ་བཟང་གོ་སྐབས་ཐོབ་ཡོད་པ་བཅས།། 
