༄༅། །ཕྱི་ལོ་ ༢༠༢༤ ཟླ་བ་ ༠༥ ཚེས་ ༠༧ ཉིན་ཉི་འོང་སྐུ་ཚབ་དོན་ཁང་གིས་ཉི་འོང་གྲོས་ཚོགས་འོག་མའི་རྒྱལ་སྤྱིའི་ཚོགས་ཁང་དུ་ཉི་འོང་གི་གྲོས་ཚོགས་འཐུས་མི་ཚོའི་ཆེད་དུ་བོད་དོན་སྐོར་གྱི་ཟབ་སྦྱོང་ཞིག་གོ་སྒྲིག་ཞུས་ཡོད་པ་དང་། ཟབ་སྦྱོང་དེར་བོད་དོན་རྒྱབ་སྐྱོར་བ་དང་གསར་འགྱུར་བརྒྱུད་ལམ་ཁག་གི་མི་སྣ་ཡང་མཉམ་ཞུགས་གནང་ཡོད།
ཟབ་སྦྱོང་གི་བརྗོད་གཞི་ནི་བོད་ནང་གི་འགྲོ་བ་མིའི་ཐོབ་ཐང་དང་ཆོས་དད་རང་དབང་རྡོག་རོལ་གཏོང་བའི་སྐོར་ཡིན་ཞིང་། རང་དབང་མང་གཙོ་ཚོགས་པའི་ཚོགས་མི་ཨི་ཤི་པ་ཤི་རིན་ཏ་རོ་ལགས་ཀྱིས་ཟབ་སྦྱོང་གི་གཙོ་སྐྱོང་གནང་སྟེ། ཁོང་གིས་ཐོག་མར་གྲོས་ཚོགས་འཐུས་མི་རྣམས་ལ་པཎ་ཆེན་རིན་པོ་ཆེའི་གནད་དོན་དང་། ལོ་ངོ་སུམ་ཅུ་ཙམ་གྱི་རྗེས་སུ་ཡང་ཁོང་གི་བཞུགས་གནས་མ་ཤེས་པར་ལུས་པའི་སྐོར་གྱི་གནས་ཚུལ་ངོ་སྤྲོད་གནང་།
ཉི་འོང་སྐུ་ཚབ་དོན་གཅོད་ཨརྱ་ཚེ་དབང་རྒྱལ་པོ་ལགས་ཀྱིས་གྲོས་ཚོགས་འཐུས་མི་རྣམ་པ་དང་། བོད་དོན་རྒྱབ་སྐྱོར་བ། གསར་འགོད་པ་བཅས་ལ་ཚོགས་འདུ་འདིར་མཉམ་ཞུགས་གནང་བར་ཐུགས་རྗེ་ཆེ་ཞུས་པ་དང་སྦྲགས། ཁོང་གིས་གཟིག་རྒྱབ་རིན་པོ་ཆེ་ངོ་སྤྲོད་གནང་ནས་བོད་ཀྱི་གནས་སྟངས་ཇེ་སྡུག་ཏུ་ཇི་ལྟར་སོང་བ་དང་། རྒྱ་ནག་དམར་ཤོག་ཚོགས་པས་མི་སེར་སྤེལ་ཡུལ་གྱི་གཏན་སློབ་ཁག་བརྒྱུད་ནས་བོད་ཀྱི་ཆོས་དང་རིག་གཞུང་གཏོར་བཤིག་གཏོང་ཐབས་བྱེད་བཞིན་ཡོད་པ། དེ་བཞིན་བོད་ཀྱི་མཐོ་རིམ་བླ་སྤྲུལ་རྣམ་པའི་ཡང་སྲིད་ངོས་འཛིན་གནང་སྒོར་རྒྱ་གཞུང་གིས་ཐེ་བྱུས་བྱེད་བཞིན་པའི་གནས་ཚུལ་འགྲེལ་བརྗོད་གནང་ཡོད།
རྒྱ་གར་ལྷོ་ཕྱོགས་བཀྲ་ཤིས་ལྷུན་པོ་དགོན་པའི་མཁན་པོ་གཟིག་རྒྱབ་རིན་པོ་ཆེ་མཆོག་གིས་པཎ་ཆེན་རིན་པོ་ཆེ་སྐུ་ཕྲེང་བཅུ་གཅིག་པ་དངོས་གནས་དེ་གར་སོང་ཆ་མེད་དུ་གྱུར་པ་དང་། རྒྱ་ནག་གིས་བོད་ཀྱི་ཆོས་ཕྱོགས་ལ་ཐེ་ཇུས་མུ་མཐུད་བྱེད་ཀྱི་ཡོད་པའི་སྐོར་ལ་གསུང་བཤད་གནང་དོན། ངོས་ནས་བོད་ནང་གི་ཛ་དྲག་གི་གནས་སྟངས་དང་འབྲེལ་ནས་སེམས་གཏིང་ནས་ཞུ་བ་འཐེན་བཞིན་ཡོད། བོད་མི་རྣམས་ལ་བཙན་གནོན་ཚབས་ཆེན་དང་མི་ཆོས་ལས་འགལ་བའི་བཀག་སྡོམ་བཙན་འགེལ་དང་། བོད་མིའི་རང་དབང་ཐོག་མུ་མཐུད་དམ་བསྒྲགས་ཆེ་རུ་གཏོང་བཞིན་ཡོད་པས། བོད་མི་རྣམས་ཁུ་སིམ་མེར་སྡུག་བསྔལ་མྱོང་གི་ཡོད། དེ་རིང་ང་རང་གི་ཞུ་བ་གཙོ་བོ་ནི། ཁྱེད་རྣམ་པས་པཎ་ཆེན་སྐུ་ཕྲེང་བཅུ་གཅིག་པ་དེ་འཕྲལ་དུ་གློད་གྲོལ་གཏོང་བ་དང་། བོད་ནང་གི་བོད་མི་རྣམས་ཀྱི་དཀའ་ངལ་སེལ་ཐབས་གནང་རོགས་ཞེས་ཞུ་རྒྱུ་དེ་ཡིན། ཞེས་གསུངས།
དེ་བཞིན་རིན་པོ་ཆེ་མཆོག་གིས་རྒྱ་ནག་དམར་ཤོག་ཚོགས་པས་བོད་ཐོག་བཙན་གནོན་དང་མི་སེར་སྤེལ་བའི་སྲིད་བྱུས་ལག་བསྟར་བྱེད་བཞིན་པའི་སྐོར་དང་འབྲེལ་ཏེ། གྲོས་ཚོགས་འཐུས་མི་དང་བོད་དོན་རྒྱབ་སྐྱོར་བ་ཚོར་གནད་དོན་གསུམ་ཐོག་འབོད་སྐུལ་ཞུས་པ་རེད།
༡ ༽ ཉི་འོང་གྲོས་ཚོགས་འཐུས་མི་རྣམ་པས་རྒྱ་ནག་གཞུང་ལ་གནོན་ཤུགས་སྤྲད་དེ་པཎ་ཆེན་སྐུ་ཕྲེང་བཅུ་གཅིག་པ་གང་དུ་བཞུགས་མིན་དང་། ཁོང་གློད་བཀྲོལ་ཡོང་བའི་གསལ་བསྒྲགས་སྤེལ་འཇུག་དགོས་པ།
༢ ༽ རྒྱ་ནག་གཞུང་གིས་འགྲོ་བ་མིའི་ཐོབ་ཐང་རྩིས་མེད་རྡོག་རོལ་བཏང་བ་དང་། བོད་ཀྱི་ཆོས་སྲིད་གཉིས་ཀྱི་ལས་དོན་ཐོག་ཐེ་བྱུས་བྱས་པ། དེ་བཞིན་༸གོང་ས་མཆོག་གི་ཡང་སྲིད་ངོས་འཛིན་གནང་སྒོར་ཐེ་བྱུས་བྱེད་བཞིན་པར་སྐྱོན་བརྗོད་ཀྱི་གྲོས་ཆོད་ཅིག་གཏན་འབེབས་བྱ་རྒྱུ།
༣ ༽ ༸གོང་ས་མཆོག་གི་དགོངས་པ་ལྟར་བོད་འདི་ཞི་བའི་བསྟི་གནས་ཤིག་ཏུ་བསྒྱུར་རྒྱུ་དང་། བོད་ཀྱི་གནད་དོན་དེ་གྲོས་མོལ་དང་དབུ་མའི་ལམ་བརྒྱུད་ནས་ཐག་གཅོད་བྱེད་རྒྱུ་བཅས་ལ་རྒྱབ་སྐྱོར་བྱ་རྒྱུ།
རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་བབ་ལ་ཞིབ་འཇུག་བྱེད་མཁན་གྲོས་ཚོགས་ཀྱི་ཚོགས་ཆུང་གི་ཚོགས་གཙོ་སྐུ་ཞབས་ཕུ་རུ་ཡ་ཀི་ཇི་ལགས་ཀྱིས། གཟིག་རྒྱབ་རིན་པོ་ཆེ་ནས་གསུང་བཤད་གནང་བར་ཐུགས་རྗེ་ཞུས་པ་དང་འབྲེལ། བོད་ནང་གི་ཆོས་དད་རང་དབང་ལ་རྒྱབ་སྐྱོར་ཆ་ཚང་ཞུ་རྒྱུའི་ཞལ་བཞེས་དང། གྲོས་ཚོགས་འཐུས་མི་རྣམ་པས་རིན་པོ་ཆེའི་འབོད་སྐུལ་དོན་ཚན་གསུམ་པོ་དེར་རྒྱབ་སྐྱོར་བྱེད་དགོས་པའི་རེ་སྐུལ་ཞུས་པའི་ཐོག ༸གོང་ས་མཆོག་གི་ཡང་སྲིད་ངོས་འཛིན་ལ་རྒྱ་ནག་ཕྱོགས་ནས་ཐེ་བྱུས་བྱེད་མི་ཉན་པའི་བསྒྲགས་གཏམ་སྤེལ་དགོས་པའི་དགོངས་ཚུལ་གསུངས།
ཉི་འོང་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་ཤི་མོ་མུ་ར་ཧ་ཀུ་བུན་ལགས་ཀྱིས་རྒྱལ་ཁབ་དང་སྤྱི་ཚོགས་ནང་ཞི་བདེ་དང་འཆམ་མཐུན་ཡོང་བར་ནང་ཆོས་ཀྱིས་ཞབས་འདེགས་ཞུ་ཚུལ་དང་། ཉི་འོང་གྲོས་ཚོགས་ཀྱིས་ཕྱི་ལོ་ ༢༠༢༢ ལོར་བོད་དང་བཙན་བཟུང་བྱས་པའི་ས་ཁུལ་གཞན་དུ་རྒྱ་ནག་གིས་འགྲོ་བ་མིའི་ཐོབ་ཐང་རྡོག་རོལ་བཏང་བར་སྐྱོན་བརྗོད་ཀྱི་གྲོས་ཆོད་བཞག་པའི་སྐོར། བོད་མིའི་སྒྲིག་འཛུགས་ཀྱི་སྲིད་སྐྱོང་སྔ་ཕྱི་གཉིས་ཉི་འོང་དུ་ཕེབས་ནས་གྲོས་ཚོགས་འཐུས་མི་རྣམས་དང་འབྲེལ་ལམ་ཇི་ལྟར་བྱུང་བའི་སྐོར་སོགས་གསུངས་ཡོད།
ཚོགས་བཅར་བ་གྲོས་ཚོགས་འཐུས་མིའི་ཁྲོད་ནས་ད་ལྟའི་བོད་ཀྱི་གནས་སྟངས་དང་། བོད་ནང་གི་གནས་ཚུལ་ཇི་ལྟར་སྦས་སྐུང་བྱས་པའི་སྐོར་ལ་བཀའ་འདྲི་ཞུས་པར། གཟིག་རྒྱབ་སྐྱབས་རིན་པོ་ཆེ་དང་སྐུ་ཚབ་དོན་གཅོད་ཨརྱ་ཚེ་དབང་རྒྱལ་པོ་ལགས་གཉིས་ཀྱིས་རྒྱ་ནག་གཞུང་གིས་མི་སེར་སྤེལ་ཡུལ་གྱི་གཏན་སློབ་ཁག་དང་། བླ་རུང་སྒར་དང་ཡ་ཆེན་སྒར་གྱི་གནས་སྟངས། བྲག་མགོའི་སངས་རྒྱས་ཀྱི་སྐུ་བརྙན་དང་འཁོར་ལོ་རྣམས་གཏོར་བཤིག་གཏོང་སྟངས། བོད་མི་ ༡༥༧ ནས་རང་ལུས་མེར་སྲེག་བཏང་བ། ཉེ་ཆར་བོད་མི་རྣམས་ཆུ་རགས་ཀྱི་ཆེད་དུ་བཙན་ཤེད་ཀྱིས་གནས་སྤོ་བྱེད་བཅུག་པ་སོགས་ཀྱི་གནས་ཚུལ་འགྲེལ་བཤད་ཞིབ་ཕྲ་གནང་ཡོད།
ཉི་འོང་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་དྲུང་ཆེ་དང་ཉེ་འོང་གཞུང་གི་འཛིན་སྐྱོང་དང་འཕྲུལ་རིག་ལྷན་ཁང་གི་བློན་ཆེན་གཞོན་པ་ཨི་ཤི་ཀ་བ་ཨ་ཀི་མ་ས་ལགས་ཀྱིས། ཉི་འོང་གི་ཡིག་ཆའི་ནང་ནས་བཀླགས་པའི་བཀྲ་ཤིས་ལྷུན་པོ་དགོན་པའི་སྐོར་དང་། བཀྲ་ཤིས་ལྷུན་པོ་དགོན་པ་དང་པཎ་ཆེན་རིན་པོ་ཆེས་བོད་ཀྱི་ཆོས་དང་རིག་གཞུང་ལ་ཞབས་འདེགས་ཇི་ཞུས་སྐོར་ངོ་སྤྲོད་གནང་ཡོད་པ་བཅས།།
