༄༅། །འདི་གར་བྱང་ཨ་རིའི་སྐུ་ཚབ་དོན་ཁང་ནས་བཏང་གནས་ནང་འཁོད་དོན། སྤྱི་ཚོགས་དང་།  སེམས་མྱོང་།  བཟང་སྤྱོད་ (སྤྱི་སེམས་བཟང་གསུམ།) བཅས་ཀྱི་ཤེས་ཡོན་སློབ་གསོ་ནི་ཨིན་སྐད་ནང་ SEE Lerning (སཱི་ཤེས་ཡོན་སློབ་གསོ།) ཞེས་པ་དེ་ཡིན།  ཕྱི་ལོ་ ༢༠༢༤ ཟླ་བ་ ༤ ཚེས་ ༡༢ ཉིན་ཨ་རིའི་མངའ་སྡེ་ཨོ་རིན་གྷན་གྱི་གྲོང་ཁྱེར་པོ་ཊི་ལན་ཌ་ནང་སྤྱི་སེམས་བཟང་གསུམ་གྱི་ཤེས་ཡོན་སློབ་གསོའི་ཟབ་སྦྱོང་ཞིག་འགོ་འཛུགས་གནང་ཡོད།  ཟབ་སྦྱོང་དེ་ནི་ཨ་རིའི་ནུབ་བརྒྱུད་ས་ཁུལ་གྱི་གཟའ་མཇུག་སློབ་གྲྭའི་དགེ་རྒན་དང་།  ལས་བྱེད། ཕ་མ་བཅས་ལ་དམིགས་པ་ཞིག་ཡིན་ཞིང་། ཁོང་རྣམས་བརྒྱུད་གཟའ་མཇུག་སློབ་གྲྭའི་ཕྲུ་གུ་རྣམས་ལ་སཱི་ཤེས་ཡོན་གྱི་སློབ་གསོ་གཏོང་རྒྱུ་ནི་ཟབ་སྦྱོང་གོ་སྒྲིག་ཞུ་དགོས་པའི་དམིགས་ཡུལ་གཙོ་བོ་ཡིན།  དེང་གི་དུས་སུ་ཤིན་ཏུ་དགོས་མཁོ་ཆེ་བའི་ཟབ་སྦྱོང་འདི།  བྱང་ཨ་རིའི་བོད་རིགས་སྤྱི་མཐུན་ཚོགས་པའི་ཚོགས་ཆེན་ཐེངས་ ༢༡ གི་གྲོས་ཆོད་དགོངས་དོན་ལྟར།  ནུབ་བྱང་བོད་མིའི་རིག་གཞུང་ཚོགས་པ་ (NWTCA པོ་ཊི་ལན་ཌ་བོད་རིགས་སྤྱི་མཐུན་ཚོགས་པ།) དང་།  བྱང་ཨ་རི་སྐུ་ཚབ་དོན་གཅོད་ལས་ཁུངས།  ཨ་རིའི་ཨེ་མོ་རི་གཙུག་ལག་སློབ་གྲྭ་ཆེན་མོ་བཅས་ཀྱིས་ཐུན་མོང་ཐོག་གོ་སྒྲིག་ཞུས་པ་ཞིག་ཡིན།  ཨེ་མོ་རི་གཙུག་ལག་སློབ་གཉེར་ཁང་གི་སློབ་དཔོན་དགེ་བཤེས་བློ་བཟང་བསྟན་འཛིན་ནེ་གི་ལགས་དང་།  སཱི་ཤེས་ཡོན་སློབ་གསོའི་འགན་འཛིན་ལས་རོགས་བརྩོན་འགྲུས་བསམ་འཕེལ་ལགས།  ཚན་རིག་ཉམས་ཞིབ་པ་བསྟན་འཛིན་བསོད་ནམས་ལགས་བཅས་ཆེད་ལས་པ་གསུམ་གྱིས་དེང་དུས་དང་མཐུན་པའི་སྒོ་ནས་ཟབ་ཁྲིད་གནང་ཡོད།ཉིན་དང་པོའི་ཟབ་སྦྱོང་དབུ་འབྱེད་མཛད་སྒོའི་ཐོག  སྐུ་མགྲོན་ཁཱེལ་མ་སི་ (Camas) གྲོང་ཁྱེར་གྱི་གྲོང་ཁྱེར་སྤྱི་ཁྱབ་སྐུ་ཞབས་ (Steve Hogan) ལགས་དང་།  ས་གནས་བོད་རིགས་སྤྱི་མཐུན་ཚོགས་པའི་ཚོགས་གཙོ་གདོང་ཐོག་སྐལ་བཟང་ལགས།  ཨེ་མོ་རི་གཙུག་ལག་སློབ་གཉེར་ཁང་གི་སློབ་དཔོན་དགེ་བཤེས་བློ་བཟང་བསྟན་འཛིན་ནེ་གི་ལགས།  སཱི་ཤེས་ཡོན་སློབ་གསོའི་འགན་འཛིན་ལས་རོགས་བརྩོན་འགྲུས་བསམ་འཕེལ་ལགས།  དེ་བཞིན་བྱང་ཨ་རི་སྐུ་ཚབ་དོན་གཅོད་ཁང་གི་བོད་རིགས་འབྲེལ་མཐུད་པ་དྲུང་ཟུར་ཀུན་དགའ་བཀྲ་ཤིས་ལགས་བཅས་ནས་གསུང་བཤད་མདོར་བསྡུས་རེ་གནང་།དགེ་བཤེས་བློ་བཟང་བསྟན་འཛིན་ནེ་གི་ལགས་དང་།  བརྩོན་འགྲུས་བསམ་འཕེལ་ལགས་ནས་ཁག་སོ་སོར་སཱི་ཤེས་ཡོན་སློབ་གསོའི་བསམ་བློའི་འབྱུང་ཁུངས་ཡིན་པའི་སྤྱི་ནོར་༸གོང་ས་༸སྐྱབས་མགོན་ཆེན་པོའི་དགོངས་གཞི་དང་།  སཱི་ཤེས་ཡོན་སློབ་གསོའི་བྱུང་རིམ།  དེའི་གལ་ཆེའི་རང་བཞིན་བཅས་ངོ་སྤྲོད་སྙིང་བསྡུས་གནང་བ་དང་།  ཚོགས་གཙོ་གདོང་ཐོག་སྐལ་བཟང་ལགས་ནས་ནུབ་བྱང་བོད་མིའི་རིག་གཞུང་ཚོགས་པར་ཟབ་སྦྱོང་གོ་སྒྲིག་ཞུ་རྒྱུ་བྱུང་བ་ནི་སྐལ་པ་བཟང་པོ་ཡིན་པ་དང་།  སཱི་ཤེས་ཡོན་སློབ་གསོ་ནི་བོད་མིའི་སྤྱི་ཚོགས་ཙམ་མ་ཟད།  མིའི་རིགས་ཀྱི་སྤྱི་ཚོགས་ཁྱོན་ཡོངས་ལ་དགོས་མཁོ་ཡོད་པ་ཞིག་ཡིན་པའི་འགྲེལ་བརྗོད་གནང་།  བོད་རིགས་འབྲེལ་མཐུད་པ་ཀུན་དགའ་བཀྲ་ཤིས་ལགས་ཀྱིས་སྐུ་ཚབ་དོན་གཅོད་ལས་ཁུངས་ནས་ཟབ་སྦྱོང་འདི་གལ་ཆེར་བརྩི་ཡི་ཡོད་པ་དང་།  ཟབ་སྦྱོང་གོ་སྒྲིག་ཞུས་པའི་དམིགས་ཡུལ་དང་རེ་བ་ཇི་ཡིན་གསུང་པ་དང་འབྲེལ།  སྐུ་ཞབས་ (Steve Hogan) ལགས་ཀྱིས་དབུ་ཁྲིད་པའི་ཁཱེལ་མ་སི་གྲོང་ཁྱེར་ (Camas)  སྲིད་གཞུང་ནས་ནུབ་བྱང་བོད་མིའི་རིག་གཞུང་ཚོགས་པའི་རིག་གཞུང་སྲུང་སྐྱོབ་ཀྱི་ལས་དོན་ལ་སྔར་ལས་ཆེ་བའི་རྒྱབ་སྐྱོར་ཡོང་བའི་རེ་སྐུལ་གནང་ཡོད་པ་རེད།སྐུ་མགྲོན་གཙོ་བོ་གྲོང་ཁྱེར་སྤྱི་ཁྱབ་སྐུ་ཞབས་ (Steve Hogan) ལགས་ཀྱིས་གསུང་བཤད་གནང་སྐབས།  དབུ་འབྱེད་མཛད་སྒོར་གཏམ་བཤད་ཀྱི་གོ་སྐབས་གནང་བར་ཐུགས་རྗེ་ཆེ་ཞུས་པ་དང་ཆབས་ཅིག  ས་གནས་ས་ཐོག་གི་ད་ལྟའི་དངོས་ཡོད་གནས་སྟངས་ནས་བཤད་ན།  སཱི་ཤེས་ཡོན་སློབ་གསོ་ནི་དེང་སང་གི་སྤྱི་ཚོགས་ལ་ཧ་ཅང་དགོས་མཁོ་ཡོད་པའི་ཤེས་བྱ་ཞིག་ཡིན་པའི་རྣམ་འགྱུར་གསལ་སྟོན་གནང་ཡོད། ནུབ་བྱང་བོད་མིའི་རིག་གཞུང་ཚོགས་པའི་ཤེས་ཡོན་འགན་འཛིན་མཁའ་འགྲོ་རྒྱལ་ལགས་ནས་ཉིན་གསུམ་གྱི་ཟབ་སྦྱོང་གི་ལས་རིམ་ངོ་སྤྲོད་གནང་བའི་ཐོག་ནས་དབུ་འབྱེད་མཛད་སྒོ་མཇུག་སྒྲིལ། དེ་རྗེས་རྒན་ལགས་གསུམ་གྱིས་མཛད་རིམ་ནང་གསལ་ལྟར་སཱི་ཤེས་ཡོན་སློབ་གསོའི་སྒྲོམ་གཞི་ངོ་སྤྲོད་ནས་འགོ་བཙུགས་ཏེ་ཉིན་གསུམ་གྱི་ཟབ་སྦྱོང་དབུ་འཛུགས་གནང་།  ཐེངས་འདིའི་ཟབ་སྦྱོང་ཚེས་ ༡༤ ཉིན་མཇུག་སྡོམ་གནང་རྒྱུ་ཡིན་པ་དང་།  ཤར་ཕྱོགས་ས་ཁུལ་གྱི་གཟའ་མཇུག་སློབ་གྲྭའི་དགེ་རྒན་དང་ལས་བྱེད་རྣམས་ལ་དམིགས་པའི་སཱི་ཤེས་ཡོན་སློབ་གསོའི་ཟབ་སྦྱོང་དེ་ཟླ་བ་འདིའི་ཚེས་ ༢༦ ནས་ ༢༨ བར་ཁེ་ན་ཊའི་གྲོང་ཁྱེར་ཀྲོ་རོན་ཊོར་ཚོགས་རྒྱུའི་གཏན་འཁེལ་ཡོད་པ་རེད།  པོ་ཊི་ལན་ཌ་ (Portland) དང་།  ཡུ་ཊ། (Utah)  ནིའུ་མེག་སི་ཁོ། (New Mexico)  ཝན་ཁུ་ཝ་སྦི་སི། (Vancouver BC)  ཝ་ཤིང་ཊོན་སལ་ཌལ། (Seattle WA)  སན་ཕི་རན་སི་སི་ཁོ་(San Francisco)  ཁོ་ལོ་ར་ཌོ་ (Colorado) བཅས་ས་གནས་ཁག་ནས་དགེ་རྒན་དང་ལས་བྱེད་ ༥༠ ལྷག་ཙམ་ཟབ་སྦྱོང་ལ་ཐོ་འགོད་མཉམ་ཞུགས་གནང་ཡོད།  

སྤྱི་སེམས་བཟང་གསུམ་གྱི་ཤེས་ཡོན་སློབ་གསོ་ནི།  འཛམ་གླིང་སྐྱེ་རྒུ་ཀུན་ལ་སྨན་པའི་༸གོང་ས་མཆོག་གི་རླབས་ཆེན་དགོངས་གཞི་ཞིག་ཡིན་སྟབས།  གཟའ་མཇུག་སློབ་གྲྭའི་དགེ་རྒན་དང་ལས་བྱེད་ཙམ་མིན་པར།  བོད་མི་ཚང་མས་ཤེས་དགོས་པ་ཞིག་ཡིན་སྟབས་ཉིན་གསུམ་གྱི་ཟབ་སྦྱོང་ཆ་ཚང་ Youtube དྲྭ་ཐག་འདི་བརྒྱུད་ཐད་གཏོང་ཞུ་གི་ཡོད།  ནུབ་བྱང་བོད་མིའི་རིག་གཞུང་ཚོགས་པས་ཟབ་སྦྱོང་གྲ་སྒྲིག་གི་གཙོ་འགན་བཞེས་པ་དང་།  བོད་ཀྱི་ཐེབས་རྩས་དཔལ་འབྱོར་གྱི་མཐུན་རྐྱེན་སྦྱར་བ། བྱང་ཀེལ་བོད་རིགས་སྤྱི་མཐུན་ཚོགས་པའི་རྣམ་དཔྱོད་སྐྱེད་ཚལ་གཟའ་མཇུག་སློབ་གྲྭའི་བོད་ཡིག་དགེ་རྒན་བསོད་ནམས་ཚེ་རིང་ལགས་ནས་ཡོངས་སུ་རིན་མེད་ཐོག་ཟབ་སྦྱོང་ཆ་ཚང་ཐད་གཏོང་གནང་རོགས་གནང་བ་བཅས་ལ་སྐུ་ཚབ་དོན་གཅོད་ལས་ཁུངས་ནས་གོ་སྐབས་འདི་བརྒྱུད་ཐུགས་རྗེ་ཆེ་ཞུ་རྒྱུ་ཡིན།  །