༄༅། །འདི་གར་བྱང་ཨ་རི་སྐུ་ཚབ་དོན་གཅོད་ལས་ཁུངས་ནས་བཏང་གནས་ནང་འཁོད་དོན། གནས་ཚུལ་ཐོན་པར་གཞིགས་ན།  ཕྱི་ལོ་ ༢༠༢༤ ཟླ་བ་ ༤ ཚེས་ ༡༦ ཉིན་ཨ་རིའི་གྲོས་ཚོགས་གོང་མའི་ཕྱི་འབྲེལ་ལས་དོན་ཚོགས་ཆུང་ནང་བོད་རྒྱའི་དཀའ་རྙོག་སེལ་ཐབས་ཀྱི་ཁྲིམས་འཆར་ཨང་ (S.138) ངོ་སྤྲོད་གནང་བའི་རྗེས་སུ་སྤྱི་མོས་ཀྱི་རྒྱབ་སྐྱོར་གཏན་འབེབས་བྱུང་ཡོད།  

ཤེས་རྟོགས་བྱུང་བར་གཞིགས་ན།  ཨ་རིའི་གྲོས་ཚོགས་གོང་མའི་ཕྱི་འབྲེལ་ལས་དོན་ཚོགས་ཆུང་གི་ཚོགས་གཙོ་དང་།  ཁྲིམས་འཆར་དེ་ལ་རྒྱབ་སྐྱོར་གནང་མཁན་གཙོ་བོ་སྐུ་ཞབས་བྷེན་ཁར་ཌིན་ (Ben Cardin) ལགས་ཀྱིས་གསར་འགོད་པར་གནས་ཚུལ་འགྲེལ་བརྗོད་གནང་སྐབས།  “ཁྲིམས་འཆར་འདི་ཚེས་ ༡༦ ཉིན་ཚོགས་ཆུང་གིས་སྤྱི་མོས་གཏན་འབེབས་བྱུང་སོང་།  ཁྲིམས་འཆར་འདི་དང་འབྲེལ་བའི་ཐབས་བྱུས་སྒྲིག་སྟངས་ཐད་བོད་མིའི་སྲིད་སྐྱོང་མཆོག་མཇལ་སྐབས་བཀའ་མོལ་བྱུང་།  ཁྲིམས་འཆར་འདི་གྲོས་ཚོགས་གོང་མའི་ནང་འོས་བསྡུའི་ཆེད་འདོན་རྒྱུ་ཡིན་པ་དང་།  ལས་དོན་མཇུག་སྐྱོང་ཡོང་ཐབས་ཐད་བཀའ་བསྡུར་ཞུས་པ་ཡིན།  ཁྲིམས་འཆར་གྱི་ཚིག་བརྗོད་ཐད།  གྲོས་ཚོགས་འོག་མའི་ནང་གཏན་འབེབས་གང་བྱུང་བ་དང་གཅིག་མཚུངས་ཡིན་པ་ལས།  འགྱུར་བ་གང་ཡང་ཕྱིན་མེད།” ཅེས་གསུང་འདུག  བོད་སྐད་རླུང་འཕྲིན་ཁང་ནས་གནས་ཚུལ་སྤེལ་བར་གཞིགས་ན།  ཁྲིམས་འཆར་ལ་སྤྱི་མོས་ཀྱི་རྒྱབ་སྐྱོར་བྱུང་མ་ཐག་གྲོས་ཚོགས་གོང་མའི་མང་གཙོ་ཚོགས་པའི་འཐུས་མི་ཇེཕ་མར་ཀི་ལི་ (Jeff Merkley) ལགས་དང་། གྲོས་ཚོགས་གོང་མའི་སྤྱི་མཐུན་ཚོགས་པའི་འཐུས་མི་ཀྲོཊ་ཡོང་ (Todd Young) ལགས་རྣམ་གཉིས་ཀྱིས།  ཨ་རིའི་གྲོས་ཚོགས་གོང་མའི་ཕྱི་འབྲེལ་ལས་དོན་ཚོགས་ཆུང་ནང་བོད་རྒྱའི་རྩོད་རྙོག་སེལ་ཐབས་ཀྱི་ཁྲིམས་འཆར་ལ་སྤྱི་མོས་རྒྱབ་སྐྱོར་བྱུང་བ་ནི་བོད་རྒྱའི་དཀའ་རྙོག་སེལ་བར་རྒྱ་ནག་གཞུང་དང་༧གོང་ས་ཏཱ་ལའི་བླ་མ་མཆོག་དབར་ཞི་བའི་གྲོས་མོལ་གནང་དགོས་པའི་ཨ་རིའི་གཞུང་གི་སྲིད་བྱུས་ལངས་ཕྱོགས་སྲ་བརྟན་དུ་བཏང་བ་ཞིག་ཡིན།  ཁྲིམས་འཆར་འདི་ཨ་རིའི་གྲོས་ཚོགས་འོག་མའི་ནང་གཏན་འབེབས་བྱུང་ཟིན་པ་དང་།  ད་ཆ་གྲོས་ཚོགས་གོང་མའི་ནང་གཏན་འབེབས་འོས་བསྡུའི་ཆེད་འབུལ་གནང་རྒྱུ་ཡིན་པ་གསལ་སྟོན་གནང་ཡོད། བྱང་ཨ་རི་སྐུ་ཚབ་དོན་གཅོད་འབུམ་རམས་པ་རྣམ་རྒྱལ་ཆོས་གྲུབ་ལགས་ནས།  དེ་རིང་དགོང་མོ་ཆུ་ཚོད་ལྔ་པ་ཙམ་ལ་བོད་རིགས་སྤྱི་མཐུན་ཚོགས་པ་ཁག་དང་། སྐུ་ཚབ་དོན་གཅོད་ལས་ཁུངས་དབར་གྱི་ (WhatseApp) གླེང་སྟེགས་བརྒྱུད་  “ ཨ་རིའི་ནང་གི་སྤྱི་མཐུན་ཚོགས་པ་ཚང་མར་གཏམ་བཟང་པོ་དེ་མཉམ་སྤྱོད་དང་འབྲེལ་ཉེ་ཆར་སྤྱི་མཐུན་ཚོགས་པ་ཁག་གིས་སོ་སོའི་ཁྱབ་ཁོངས་གྲོས་ཚོགས་གོང་མའི་འཐུས་མི་རྣམས་ལ་ཕྱག་བྲིས་བཏང་བ་དེས་ཕན་ཐོགས་ཆེན་པོ་བྱུང་སོང་།  ད་དུང་མུ་མཐུད་ཧུར་ཐག་གནང་རོགས།  དོན་གཅོད་ལས་ཁུངས་དང་རྒྱལ་སྤྱིའི་བོད་དོན་ལས་འགུལ་ཁང་གི་ངོས་ནས་བྱེད་དགོས་པ་ཁག་འཐུས་ཤོར་མེད་པར་སྒྲུབ་བཞིན་ཡོད་ལ།  དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་དེང་སང་ཝ་ཤིང་ཊོན་སྒྲི་སི་རུ་གཞུང་འབྲེལ་འཚམས་འདྲི་གནང་བཞིན་པའི་སྐུ་དོན་གཙོ་བོ་ཡང་ཁྲིམས་འཆར་དེ་རང་གི་ཐོག་ལ་ཤུགས་རྒྱག་རྒྱུ་དེ་ཡིན།” ཞེས་དང་།  སྐུ་ཚབ་དོན་གཅོད་མཆོག་གིས་ད་དུང་།  ཁ་ས་དགོང་མོ་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་ལྷན་ཚོགས་ཀྱི་གཙོ་འཛིན་རི་ཆ་ཊི་གྷིར་དང་ལྷན་དུ་གྲོས་ཚོགས་གོང་མའི་ཕྱི་འབྲེལ་ལས་དོན་ཚོགས་ཆུང་གི་ཚོགས་གཙོ་བྷེན་ཁར་ཌིན་ (Ben Cardin) ལགས་དང་མཇལ་མོལ་གྱི་མཛད་རིམ་དེ་ཧ་ཅང་ཡག་པོ་བྱུང་ཞིང་།  བྷེན་ཁར་ཌིན་ལགས་ཀྱིས་ཁྲིམས་འཆར་འདི་གོམ་པ་མདུན་སྤོས་ཡོང་ཐབས་སུ་ཁོང་གི་ངོས་ནས་ནུས་ཤུགས་ཡོད་ཚད་འདོན་རྒྱུའི་ཞལ་བཞེས་གཙང་མ་གནང་སོང་།  ཞེས་འགྲེལ་བརྗོད་གནང་ཡོད་པ་རེད།  བོད་དོན་ཁྲིམས་འཆར་དེའི་ནང་།  རྒྱ་ནག་གཞུང་གིས་བོད་འདི་ལོ་རྒྱུས་ཐོག་རྒྱ་ནག་གི་ཆ་ཤས་ཡིན་ཚུལ་བརྗོད་བཞིན་པ་དེ་བདེན་པ་མིན་པ་དང་།  རྒྱ་ནག་གཞུང་གིས་བོད་ཀྱི་ལོ་རྒྱུས་ལ་འཁྱོག་བཤད་དང་།  ༧གོང་ས་ཏཱ་ལའི་བླ་མ་མཆོག་དང་། བོད་མིའི་སྒྲིག་འཛུགས་ལ་འགྲེལ་ལོག་འཁྱོག་བཤད་བྱེད་བཞིན་པར་ཨ་རི་སྲིད་གཞུང་ནས་གདོང་ལེན་བྱེད་རྒྱུ།  སོགས་ཀྱི་གལ་ཆེའི་ནང་དོན་འཁོད་ཡོད་པ་རེད།