༄༅། །རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་བབ་ལ་རྟོགས་ཞིབ་གནང་མཁན་ཉི་འོང་གྲོས་ཚོགས་འཐུས་མིའི་ཚོགས་ཆུང་ནས་ཨ་ཀྱཱ་རིན་པོ་ཆེ་མཆོག་གྲོས་ཚོགས་སུ་གདན་ཞུས་ཀྱིས་ཁོང་གི་མི་ཚེའི་ཉམས་མྱོང་དང་། བོད་ནང་རྒྱ་གཞུང་གིས་ཆོས་ལུགས་ཐོག་དྲག་གནོན་གཏོང་བཞིན་པའི་གནས་སྟངས་ངོ་སྤྲོད་གནང་སྐྱོང་ཡོང་བའི་རེ་སྐུལ་ཞུས་དོན་ལྟར་རིན་པོ་ཆེ་མཆོག་ནས་གནས་སྟངས་འགྲེལ་བརྗོད་གནང་ཡོད།
དེ་ཡང་ཐོག་མར་རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་བབ་ལ་རྟོགས་ཞིབ་གནང་མཁན་ཉི་འོང་གྲོས་ཚོགས་འཐུས་མིའི་ཚོགས་ཆུང་གི་ཚོགས་གཙོ་སྐུ་ཞབས་ཕུ་རུ་ཡ་ཀེ་ཇི་ལགས་ནས་ཨ་ཀྱཱ་རིན་པོ་ཆེར་ཕེབས་བསུ་དང་སྦྲགས། བོད་ནང་ཆོས་དད་རང་དབང་ལ་རྡོག་རོལ་ཚབས་ཆེན་གཏོང་བཞིན་པའི་སྐོར་དང་། རྒྱ་དམར་གྱི་བཙན་གནོན་འོག་བླ་ཆེན་གྱི་ཉམས་མྱོང་སྐོར་གྲོས་ཚོགས་འཐུས་མི་ཚོར་གསལ་བཤད་གནང་རོགས་ཞེས་རེ་སྐུལ་ཞུས།
ཨ་ཀྱཱ་རིན་པོ་ཆེ་མཆོག་གིས་གྲོས་ཚོགས་འཐུས་མི་ཚོར་གྲོས་ཚོགས་ཚོགས་ཁང་དུ་གསུང་བཤད་གནང་རྒྱུའི་གོ་སྐབས་གནང་བར་ཐུགས་རྗེ་ཆེ་ཞུས་པ་དང་ཆབས་ཅིག ཁོང་གིས་གྲོས་ཚོགས་འཐུས་མི་རྣམས་དང་། ལས་བྱེད་པ། གསར་འགོད་པ་བཅས་ལ་རྒྱ་ནག་གིས་བོད་ལ་བཙན་འཛུལ་ཇི་ལྟར་བྱས་པ་དང་། དགོན་པ་དང་ཆོས་ཕྱོགས་ཀྱི་དངོས་རྫས་གཏོར་བཤིག་ཇི་ལྟར་བཏང་བ། དེ་བཞིན་ཁོང་ཉིད་འཚུད་པའི་གྲྭ་བཙུན་ཚོར་ཆོས་ཕྱོགས་ཀྱི་སློབ་སྦྱོང་སྤྲོད་རྒྱུར་དམ་བསྒྲགས་དང་། གཟན་ཤམ་ཕུད་འཇུག་དགོས་པའི་བཙན་སྐུལ་ཇི་ལྟར་བྱས་པ། ༸གོང་ས་མཆོག་གིས་ངོས་འཛིན་མཛད་པའི་པཎ་ཆེན་སྐུ་ཕྲེང་བཅུ་གཅིག་པ་བཙན་ཁྲིད་བྱས་ཏེ། པཎ་ཆེན་སྐུ་ཕྲེང་རྫུན་མ་ཞིག་ངོས་འཛིན་བསྐོ་བཞག་བྱས་ཚུལ་སོགས་ཀྱི་སྐོར་ལ་གསུང་བཤད་གནང་། དེ་བཞིན་རིན་པོ་ཆེ་མཆོག་གིས་ཁོང་ལ་རྒྱ་ནག་གཞུང་གིས་ཆོས་ཕྱོགས་ཀྱི་གོ་གནས་མཐོན་པོ་སྤྲད་པ་དེ་དམར་ཤོག་གི་འགོ་ཁྲིད་ཚོས་སྟངས་འཛིན་དང་བེད་སྤྱོད་གཏོང་ཆེད་ཁོ་ན་ཡིན་པ་དང་། ཁོང་ལ་པཎ་ཆེན་རིན་པོ་ཆེ་རྫུན་མ་དེའི་ཡོངས་འཛིན་བྱེད་དགོས་པའི་རེ་སྐུལ་ཞུས་པ་མ་ཟད། རང་གི་ཆོས་ལུགས་ཀྱི་ལྟ་བ་དང་འགལ་བའི་ལས་དོན་སྤེལ་བཅུག་སྐབས་ཁོང་བོད་ནས་བྲོས་བྱོལ་དུ་ཕེབས་རྒྱུའི་ཐག་གཅོད་གནང་བ་ཡིན་ཞེས་གསལ་བཤད་གནང་ཡོད།
ཉི་འོང་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་ཤི་མ་མུ་ར་ཧ་ཀུ་བུ་ནི་ལགས་ནས་ཨ་ཀྱཱ་རིན་པོ་ཆེ་མཆོག་ནས་དངོས་ཡོད་གནས་ཚུལ་འགྲེལ་བརྗོད་གནང་བར་ཐུགས་རྗེ་ཆེ་ཞུས་པ་དང་ཆབས་ཅིག གྲོས་ཚོགས་འཐུས་མི་རྣམས་ལ་རྒྱ་དམར་གྱིས་བོད་ནང་ཆོས་ཕྱོགས་ཀྱི་དྲག་སྤྱོད་བྱེད་བཞིན་པའི་གནས་ཚུལ་དངོས་སུ་ཤེས་རྟོགས་ཐུབ་པར་ཕན་ཐོགས་ཆེན་པོ་བྱུང་ཡོད་ཅེས་དང་། ཉི་འོང་གིས་བོད་དང་ལྷོ་སོག་ནང་རྒྱ་དམར་གྱིས་བཙན་གནོན་བྱེད་བཞིན་པའི་གནས་ཚུལ་ལ་གང་ཐུབ་ཀྱིས་གདོང་ལེན་བྱེད་རྒྱུ་ཡིན་ཞེས་གསུངས།
དེ་རྗེས་ཨ་ཀྱཱ་རིན་པོ་ཆེ་མཆོག་ནས་ཉི་འོང་གྲོས་ཚོགས་འཐུས་མི་རྣམས་ནས་ཉི་འོང་གིས་བོད་དོན་ལ་རྒྱབ་སྐྱོར་གནང་ཐབས་དང་། བོད་དང་ཉི་འོང་གི་དགོན་པའི་འབྲེལ་ལམ། བོད་མིའི་རང་དབང་སོགས་ཀྱི་སྐོར་དོགས་འདྲི་ཕུལ་བ་རྣམས་ལ་ལན་འདེབས་གསལ་བཤད་གནང་ཡོད། སྐབས་དེར་རིན་པོ་ཆེ་མཆོག་གིས་ཉི་འོང་གཞུང་དམངས་སྤྱི་ནས་བོད་དོན་ལ་རྒྱབ་སྐྱོར་ཡོད་པའི་གསལ་བསྒྲགས་སྤེལ་རོགས་ཞེས་དང་། ཉི་འོང་གི་དགོན་སྡེ་ཁག་དང་འབྲེལ་བའི་སྐོར་ལ་རིན་པོ་ཆེས་ཉི་འོང་གི་དགེ་འདུན་པ་ཚོས་༸གོང་ས་མཆོག་ལ་གུས་བཀུར་ཆེན་པོ་བྱེད་པ་དང་། བོད་བརྒྱུད་ནང་བསྟན་གྱི་ཆོས་སྡེ་ཁག་དང་འབྲེལ་བ་ཡག་པོ་གནང་བཞིན་ཡོད་ཅེས་གསུངས། བོད་ཀྱི་རང་དབང་དང་འབྲེལ་ཏེ་རིན་པོ་ཆེས་༸གོང་ས་མཆོག་གིས་གྲོས་འགོ་འདོན་གནང་མཛད་པའི་དབུ་མའི་ལམ་གྱི་སྲིད་བྱུས་ངོ་སྤྲོད་དང་དེར་ཉི་འོང་གྲོས་ཚོགས་ནས་རྒྱབ་སྐྱོར་གནང་སྐྱོང་ཡོང་བའི་རེ་སྐུལ་ཞུས་ཡོད།
ཨ་ཀྱཱ་རིན་པོ་ཆེ་ནི་སོག་པོའི་མི་རིགས་ཡིན་པ་དང་། ཕྱི་ལོ་ ༡༩༥༢ ལོར་༸པཎ་ཆེན་སྐུ་ཕྲེང་བཅུ་པས་ཨ་ཀྱཱ་རིན་པོ་ཆེ་སྐུ་ཕྲེང་བརྒྱད་པར་ངོས་འཛིན་གནང་།
སྐབས་དེར་རིན་པོ་ཆེ་ལྷན་དུ་ཉི་འོང་སྐུ་ཚབ་དོན་གཅོད་འབུམ་རམས་པ་ཨ་རྱ་ཚེ་དབང་རྒྱལ་པོ་ལགས་དང་། ཤི་ཛོ་ཀ་གཙུག་ལག་སློབ་གཉེར་ཁང་གི་སློབ་དཔོན་ཨ་ཀི་རོ་ཨོ་ནོ་ལགས་ཕེབས་ཞུགས་གནང་ཞིང་། སྐུ་ཞབས་ཇེབ་ལགས་ཀྱིས་རིན་པོ་ཆེའི་གསུང་སྒྱུར་གནང་ཡོད། གཞན་ཡང་སྐབས་དེར་རིན་པོ་ཆེས་ལྗགས་རྩོམ་གནང་བའི་དཔེ་དེབ་ (Surviving the Dragon) ཞེས་པ་ཉི་འོང་སྐད་དུ་བསྒྱུར་བ་དེ་ཉིད་གྲོས་ཚོགས་འཐུས་མི་རྣམས་ལ་བགོ་འགྲེམས་གནང་ཡོད་པ་བཅས།།
