༄༅། །འདི་གར་བྱང་ཨ་རིའི་སྐུ་ཚབ་དོན་ཁང་ནས་བཏང་གནས་ནང་འཁོད་དོན། ནུབ་བྱང་བོད་མིའི་རིག་གཞུང་ཚོགས་པ་ (NWTCA པོ་ཊི་ལན་ཌ་བོད་རིགས་སྤྱི་མཐུན་ཚོགས་པ།) དང་།  བྱང་ཨ་རི་སྐུ་ཚབ་དོན་གཅོད་ཁང་ཐུན་མོང་གིས་ཕྱི་ལོ་ ༢༠༢༤ ཟླ་བ་ ༤ ཚེས་ ༡༢ ནས་ ༡༤ བར་ཨ་རིའི་ནུབ་ཕྱོགས་ས་ཁུལ་གྱི་གཟའ་མཇུག་སློབ་གྲྭའི་དགེ་རྒན་དང་ལས་བྱེད་རྣམས་ཀྱི་ཆེད་དུ་སྤྱི་སེམས་བཟང་གསུམ་གྱི་ཤེས་ཡོན་སློབ་གསོའི་ (SEE Lerning) ཟབ་སྦྱོང་ཞིག་གོ་སྒྲིག་ཞུ་གི་ཡོད།

ཐེངས་འདིའི་ཟབ་སྦྱོང་ནི།  སྔ་ལོ་ཀྲོ་རོན་ཊོར་བསྐོང་ཚོགས་བྱས་པའི་བོད་རིགས་སྤྱི་མཐུན་ཚོགས་པའི་ཚོགས་ཆེན་ཐེངས་ ༢༡ པའི་གྲོས་ཆོད་དགོངས་དོན་ལྟར་གྲ་སྒྲིག་བྱས་པ་ཞིག་ཡིན་ཞིང་།  ཟབ་སྦྱོང་ཚོགས་ས་ནི་ནུབ་བྱང་བོད་མིའི་རིག་གཞུང་ཚོགས་པའི་ཚོགས་ཁང་དུ་ཡིན།

ཟབ་སྦྱོང་སླད་སློབ་ཁྲིད་གནང་མཁན་ཕུལ་བྱུང་ཆེད་ལས་མི་སྣ་གསུམ་གདན་འདྲེན་ཞུས་ཡོད་པ་ནི།  ཨེ་མོ་རི་གཙུག་ལག་སློབ་གཉེར་ཁང་གི་སློབ་དཔོན་དགེ་བཤེས་བློ་བཟང་བསྟན་འཛིན་ནེ་གི་ལགས་དང་། སྤྱི་སེམས་བཟང་གསུམ་གྱི་ཤེས་ཡོན་སློབ་གསོའི་འགན་འཛིན་ལས་རོགས་བརྩོན་འགྲུས་བསམ་འཕེལ་ལགས། ཚན་རིག་ཉམས་ཞིབ་པ་བསྟན་འཛིན་བསོད་ནམས་ལགས་ཡིན། 

ཉིན་གྲངས་གསུམ་གྱི་ཟབ་སྦྱོང་ལ་ཨ་རིའི་ཤར་ཕྱོགས་ས་ཁུལ་དང་ཐག་ཉེ་ཡིན་པའི་གཟའ་མཇུག་སློབ་གྲྭའི་དགེ་རྒན་ལས་བྱེད་དང་ཕ་མ་བཅས་ཁྱོན་མི་གྲངས་ ༥༠ ཙམ་མཉམ་ཞུགས་གནང་གི་ཡོད་པ་དང་།  ཉིན་དང་པོའི་དབུ་འབྱེད་མཛད་སྒོར་ (Camas) གྲོང་ཁྱེར་གྱི་གྲོང་ཁྱེར་སྤྱི་ཁྱབ་པ་སྐུ་ཞབས་ (Steve Hogan) མཉམ་ཞུགས་གནང་གི་ཡོད།

སྤྱི་སེམས་བཟང་གསུམ་གྱི་ཤེས་ཡོན་སློབ་གསོ་ནི།  འཛམ་གླིང་སྐྱེ་རྒུ་ཀུན་ལ་སྨན་པའི་༧གོང་ས་མཆོག་གི་རླབས་ཆེན་དགོངས་གཞི་ཞིག་ཡིན་སྟབས།  གཟའ་མཇུག་སློབ་གྲྭའི་དགེ་རྒན་དང་ལས་བྱེད་ཙམ་མ་ཡིན་པར།  བོད་མི་ཚང་མས་དོ་སྣང་དགོས་པ་གལ་ཆེ་ཡིན་པར་ངོས་འཛིན་ཞུ་གི་ཡོད།  དེར་བརྟེན་ཉིན་གསུམ་གྱི་ཟབ་སྦྱོང་ཆ་ཚང་ Youtube དྲྭ་ཐག་འདི་བརྒྱུད་སྔ་དྲོ་ཆུ་ཚོད་ ༨ དང་སྐར་མ་ ༡༥ ནས་ཐད་གཏོང་ཞུ་གི་ཡོད།    

གཟའ་མཇུག་སློབ་གྲྭའི་དགེ་རྒན་དང་ལས་བྱེད་རྣམས་ཀྱིས་ཐུགས་སྣང་ཆེན་པོས་ཐེངས་འདིའི་ཟབ་སྦྱོང་ལ་མཉམ་ཞུགས་གནང་བ་དང་།  ནུབ་བྱང་བོད་མིའི་རིག་གཞུང་ཚོགས་པས་གྲ་སྒྲིག་གི་འགན་ཁུར་གཙོ་བོ་གནང་བ། བོད་ཀྱི་ཐེབས་རྩས་དཔལ་འབྱོར་གྱི་མཐུན་རྐྱེན་སྦྱོར་བ་བཅས་ལ་སྐུ་ཚབ་དོན་གཅོད་ལས་ཁུངས་ནས་གོ་སྐབས་འདི་བརྒྱུད་ཐུགས་རྗེ་ཆེ་ཞུ་རྒྱུ་ཡིན།  

ཟབ་སྦྱོང་འདི་དང་འབྲེལ་བའི་ཐོག་བཀའ་འདྲི་གནང་དགོས་བྱུང་ཚེ།  ནུབ་བྱང་བོད་མིའི་རིག་གཞུང་ཚོགས་པའི་ཚོགས་གཙོ་སྐལ་བཟང་གདོང་ཐོགས་ (༢༥༣ ༢༩༣ ༢༣༩༨) ལགས་དང་།  ཤེས་ཡོན་འགན་འཛིན་མཁའ་འགྲོ་རྒྱལ་ (༣༠༣ ༢༥༠ ༤༧༣༣) ལགས་སུ་འབྲེལ་བ་གནང་རོགས་ཞུ་རྒྱུ་ཡིན།།