༄༅། །ཕྱི་ལོ་ ༢༠༢༤ ཟླ་བ་ ༠༤ ཚེས་ ༠༨ ནས་ ༡༢ བར་ཉིན་གྲངས་ལྔའི་རིང་བོད་ཀྱི་བཙུན་མའི་ལས་འཆར་དང་། བོད་མིའི་སྒྲིག་འཛུགས་དཔལ་འབྱོར་ལས་ཁུངས་ཁྱབ་ཁོངས་བུད་མེད་ནུས་སྟོབས་ཚན་པའི་གོ་སྒྲིག་འོག་བཞུགས་སྒར་ཉེ་འདབས་སུ་ཆགས་པའི་སྒྲོལ་མ་གླིང་བཙུན་དགོན་དུ་སྒྲོལ་མ་གླིང་དགེ་བཤེས་མའི་ཐབས་བྱུས་དང་འཆར་སྣང་ཟབ་སྦྱོང་ཞིག་འཚོགས་ཡོད་པ་རེད།
ཟབ་སྦྱོང་དེའི་དམིགས་ཡུལ་ནི་དགེ་བཤེས་རྣམས་ཀྱི་མ་འོངས་པའི་ཕུགས་བསམ་ལ་དཔྱད་ཞིབ་བྱ་རྒྱུ་དང་། ཁོང་ཚོའི་ད་ལྟའི་ནུས་རྩལ་དང་ཤེས་ཡོན་ལ་ནུས་ཤུགས་སྤེལ་བའི་ཐོག་སྤྱི་ཚོགས་ཀྱི་ཁྱབ་ཁོངས་ཆེན་པོའི་ནང་མཉམ་ཞུགས་བྱེད་རྒྱུར་རྒྱབ་སྐྱོར་དང་། དགེ་བཤེས་རྣམས་འགོ་ཁྲིད་ཀྱིས་ལས་འགན་སྣ་ཚོགས་བརྒྱུད་ནས་སྤྱི་ཚོགས་ལ་ཞབས་འདེགས་ཞུ་རྒྱུར་ནུས་ཤུགས་སྤེལ་རྒྱུ་དེ་རེད།
ཉིན་ལྔ་རིང་གི་ཟབ་སྦྱོང་ནང་ཚོགས་བཅར་བ་རྣམས་ཀྱིས་ཕན་ནུས་ལྡན་པའི་འབྲེལ་ལམ་དང་། དཀའ་ངལ་སེལ་ཐབས། ཕོ་མོ་དང་འགོ་ཁྲིད་ཀྱི་ཁྱད་ཆོས། རུ་ཁག་འཛུགས་སྐྲུན་གྱི་སྦྱོང་བརྡར། འཆར་སྣང་གི་སྦྱོང་བརྡར་སོགས་བརྗོད་གཞི་སྣ་ཚོགས་ཐོག་ལ་གྲོས་བསྡུར་གནང་ཞིང་། སྐབས་དེར་དགེ་བཤེས་རྣམ་པས་སྤྲོ་སེམས་ཆེན་པོས་མཉམ་ཞུགས་ཀྱིས་མཉམ་ལས་གནང་ཐབས་སོགས་ཀྱི་སྐོར་བློ་སྐྱེད་གང་ལེགས་ཐོབ་ཡོད།
ཟབ་སྦྱོང་ཐོག་དགེ་བཤེས་མ་བདུན་དང་། ཐོན་ལ་ཉེ་བའི་དགེ་བཤེས་མ་ལྔ་མཉམ་ཞུགས་གནང་ཡོད། ཟབ་སྦྱོང་གི་ཉིན་དང་པོར་བཀའ་ཟུར་རིན་ཆེན་མཁའ་འགྲོ་མཆོག་ཆེད་ཕེབས་ཀྱིས་དགེ་བཤེས་མའི་འཕེལ་རིམ་སྤྱི་དང་། བྱེ་བྲག་ཏུ་དགེ་བཤེས་མ་རྣམས་ཀྱིས་བོད་མིའི་སྤྱི་ཚོགས་དང་། ནང་དོན་རིག་པར་ཞབས་འདེགས་ཇི་ཞུས་སྐོར་གསལ་སྟོན་གནང་ཡོད་པ་བཅས།།
