༄༅། །ཕྱི་ལོ་ ༢༠༢༤ ཟླ་ ༠༤ ཚེས་ ༢༧ དང་ ༢༨ ཉིན་གཉིས་རིང་ལྷོ་ཨ་རིའི་སྐུ་ཚབ་དོན་ཁང་ནས་སྒོམ་ཉམས་ལེན་གྱི་ཟབ་སྦྱོང་ཞིག་གོ་སྒྲིག་ཞུས་ཤིང་། སྐབས་དེར་མཁན་པོ་བསམ་གྲུབ་རིན་པོ་ཆེ་མཆོག་གིས་ཤེས་རབ་དང་སྙིང་རྗེའི་ལམ་ནས་དྲན་པ་ཉེར་གཞག་སྐོར་ལམ་སྟོན་གནང་ཡོད།
དེ་ཡང་མཉམ་ཞུགས་པ་གྲངས་ ༦༥ དང་། དགེ་འདུན་པ་ ༡༥ ནས་སྒོམ་ཉམས་ལེན་ཐོག་རྒྱུས་ལོན་ཞུས་ཡོད། ཉིན་གཉིས་རིང་སེམས་ཀྱི་རང་བཞིན་དང་། མི་རྟག་པ། བྱམས་སྙིང་རྗེ། ཤེས་རབ་ཀྱི་ཉམས་ལེན་སོགས་ཀྱི་སྐོར་ལམ་སྟོན་ཟབ་རྒྱས་གནང་བ་མ་ཟད། མཉམ་ཞུགས་པ་རྣམས་ནས་གྲོས་བསྡུར་དང་། རང་ཉིད་ལ་དཔྱད་པའི་སྒོ་ནས་གོ་བ་གང་ལེགས་བྱུང་ཡོད།
ཚོགས་ཐེངས་ཀྱི་བར་སེང་རེར་ཨ་ན་ཀ་ལ་ར་ལགས་དང་། རེ་ན་ཊོ་ལགས། བེ་ནི་ལགས་བཅས་ཀྱིས་འགོ་ཁྲིད་པའི་རོལ་དབྱངས་རུ་ཁག་ནས་དབྱངས་དང་བཅས་པའི་གཟུངས་བསྔགས་གསུང་འདོན་གནང་བ་དེས་མི་མང་གི་ཉམས་མྱོང་གོང་མཐོར་བཏང་བར་ཕན་ཐོགས་བྱུང་ཡོད།
ཟབ་སྦྱོང་གི་མཐར་དྲི་བ་དྲིས་ལན་གྱི་ཚོགས་ཐེངས་སྐབས་མཉམ་ཞུགས་པ་རྣམས་ནས་མཁན་པོ་བསམ་གྲུབ་རིན་པོ་ཆེ་མཆོག་གིས་ལམ་སྟོན་གནང་བར་ཐུགས་རྗེ་ཆེ་ཞུས་ཏེ་ཟབ་སྦྱོང་གི་དུས་ཡུན་རིང་སྦྱང་བ་དེ་དག་སོ་སོའི་མི་ཚེའི་ནང་ཕན་རླབས་ཆེན་པོ་ཞིག་བྱུང་ངེས་ཡིན་བཅས་གསུངས་ཡོད།
མཁན་པོ་བསམ་གྲུབ་རིན་པོ་ཆེ་མཆོག་ནི་བོད་དུ་འཁྲུངས་ཤིང་། སྐྱབས་རྗེ་སྒར་ཆེན་རིན་པོ་ཆེའི་དྲུང་ནས་དགུང་ལོ་ ༧ སྐབས་སྐྱབས་འགྲོའི་སྡོམ་པ་ལེན་ནས་དགུང་ལོ་ ༡༢ སྐབས་དགེ་སློང་གྱུར། ཁོང་མཁན་པོ་མུན་སེལ་མཆོག་དང་། མཁན་པོ་འཇིགས་མེད་ཕུན་ཚོགས་མཆོག་བཅས་ནས་རྫོགས་ཆེན་གྱི་སློབ་གཉེར་གནང་རྒྱུའི་གོ་སྐབས་ཐོབ་ཡོད། མཁན་པོ་བསམ་གྲུབ་རིན་པོ་ཆེ་མཆོག་ནི་སྦིར་རྫོང་སར་བཤད་གྲྭ་སློབ་གཉེར་ཁང་ནས་བསླབ་པ་མཐར་སོན་ཏེ་སྡེ་ར་ལྡུན་འབྲི་གུང་བཀའ་བརྒྱུད་མཐོ་སློབ་ཏུ་ལོ་ལྔའི་རིང་བསླབ་པ་སློབ་སྟོན་གནང་ཡོད། ད་ལྟའི་ཆར་ཨ་རིའི་ཌེ་ཊོན་སྒར་སྒྲོལ་མ་བསྟི་གནས་ཁང་དུ་ཆོས་ཕྱོགས་ཀྱི་འགན་འཛིན་གནང་བཞིན་ཡོད་པ་བཅས།།
