༄༅། །ཕྱི་ལོ་ ༢༠༢༤ ཟླ་བ་ ༠༤ ཚེས་ ༠༡ ཉིན་སོག་ཡུལ་གནས་འཁོད་དྷི་ལུབ་ཧུ་ཏུག་ཐུ་ཐེབས་རྩ་ཁང་དང་། བོད་ཀྱི་སྲིད་བྱུས་ཉམས་ཞིབ་ཁང་། རུ་སོག་སྐུ་ཚབ་དོན་ཁང་མཉམ་སྦྲེལ་གྱི་གོ་སྒྲིག་འོག་བཞུགས་སྒར་རྡ་རམ་ས་ལའི་བོད་ཀྱི་དཔེ་མཛོད་ཁང་གི་ཚོགས་ཁང་དུ་དུས་རབས་ཉི་ཤུ་པ་ནས་བཟུང་བོད་སོག་གི་འབྲེལ་ལམ་ཆད་པའི་རྒྱུ་རྐྱེན་དང་། བསྐྱར་གསོ་ཡོང་བའི་བརྒྱུད་རིམ། མ་འོངས་འཕེལ་ཕྱོགས་གླེང་བའི་བོད་སོག་འབྲེལ་ལམ་ཚོགས་འདུ་ཐེངས་དང་པོ་བསྐོང་ཚོགས་གནང་ཡོད། 

དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༡༡ པའི་ཐོག་ཚོགས་འདུའི་དབུ་འབྱེད་མཛད་སྒོའི་ཐོག་རུ་སོག་སྐུ་ཚབ་དོན་གཅོད་ཏི་ལོ་རིན་པོ་ཆེ་དང་། བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་ཟླ་བ་ཚེ་རིང་ལགས། བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་གཞོན་པ་བསྟན་པ་རྒྱལ་མཚན་ལགས། སོག་ཡུལ་དང་རྒྱ་གར་ས་གནས་ཁག་ནས་ཕེབས་པའི་མཁས་པ་རྣམ་པ། ཚོགས་བཅར་བ་སོགས་ཚང་འཛོམས་ཀྱི་ཐོག་མར་བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་ཟླ་བ་ཚེ་རིང་ལགས་ཀྱིས་ཕེབས་བསུའི་གསུང་བཤད་གནང་ཡོད།

སྐབས་དེར་ཁོང་གིས་ད་ལྟའི་དུས་སྐབས་སུ་བོད་སོག་གི་འབྲེལ་ལམ་སྐོར་གྱི་ཚོགས་འདུ་འདི་ལྟ་བུ་ཞིག་བསྐོང་ཚོགས་གནང་དགོས་པའི་དམིགས་ཡུལ་དང་། སླད་འཆར་མུ་མཐུད་གོ་སྒྲིག་གནང་འཆར། དེ་བཞིན་བོད་དང་སོག་པོ་གཉིས་བར་ཆོས་དང་རིག་གཞུང་ཐོག་ལོ་རྒྱུས་རང་བཞིན་ལྡན་པའི་འབྲེལ་ཇི་ཡོད་གསལ་སྟོན་གནང་སོང་། 

དེ་ནས་རུ་སོག་སྐུ་ཚབ་དོན་གཅོད་ཏི་ལོ་རིན་པོ་ཆེ་ནས་རང་ཉིད་སོག་པོའི་ཁྱིམ་ཚང་ཞིག་ཏུ་འཁྲུངས་ཤིང་། རྒྱ་གར་དུ་བོད་ཀྱི་དགོན་སྡེར་ནང་དོན་རིག་པར་བསླབ་པ་སློབ་གཉེར་གནང་རིམ། དེ་རྗེས་རུ་སོག་ཡུལ་དུ་སངས་རྒྱས་པའི་བསྟན་པ་རིན་པོ་ཆེ་དར་འཕེལ་གཏོང་བར་ཞབས་འདེགས་ཇི་ཞུས་དྲན་གསོ་དང་སྦྲགས། བར་ལམ་ཞིག་ནས་བོད་སོག་བར་གྱི་ལོ་རྒྱུས་རང་བཞིན་ལྡན་པའི་འབྲེལ་བ་དེ་བཞིན་ཆད་པ་ལྟ་བུར་གྱུར་ཡོད་པ་དེ་སླར་གསོ་གནང་རྒྱུ་གལ་ཆེ་ཡིན་པ་ནན་བརྗོད་དང་། ཐེངས་འདིའི་ཚོགས་འདུ་འདི་ལྟ་བུ་ནི་གནའ་བོའི་གྲོགས་འདྲིས་བསྐྱར་གསོ་བྱ་བར་གནད་འགག་ཆེན་པོ་ཆགས་ཡོད་པ་གསུངས། དེ་བཞིན་ཁོང་གིས་ད་ལྟ་སོག་ཡུལ་དེ་བཞིན་སྟོབས་ཆེན་རྒྱལ་ཁབ་གཉིས་ཀྱི་བར་དུ་འཚུད་པའི་རྒྱལ་ཁབ་ཆུང་ངུ་ཞིག་ཏུ་གྱུར་ཡོད་ནའང་། ལོ་རྒྱུས་ཐོག་ནས་སོག་ཡུལ་དེ་བཞིན་སྟོབས་ལྡན་རྒྱལ་ཁབ་ཅིག་ཡིན་པ་མ་ཟད། བོད་ཀྱི་ཡུན་རིང་གི་མཐུན་གྲོགས་ཤིག་ཀྱང་ཡིན་པས་བོད་མི་རྣམས་ནས་བོད་སོག་གི་འབྲེལ་ལམ་དེར་སྣང་མེད་གཏང་རྒྱུ་མེད་པ་གསལ་སྟོན་གནང་ཡོད། སྤྱིར་སོག་ཡུལ་གནས་འཁོད་དྷི་ལུབ་ཧུ་ཏུག་ཐུ་ཐེབས་རྩ་ཁང་དང་། བོད་ཀྱི་སྲིད་བྱུས་ཉམས་ཞིབ་ཁང་། རུ་སོག་སྐུ་ཚབ་དོན་ཁང་མཉམ་སྦྲེལ་གྱིས་གོ་སྒྲིག་ཞུས་པའི་བོད་སོག་འབྲེལ་ལམ་གྱི་ཚོགས་འདུ་དེ་བཞིན་ཕྱི་ལོ་ ༢༠༢༤ ཟླ་བ་ ༠༤ ཚེས་ ༠༡ ནས་ ༠༢ བར་ཉིན་གྲངས་གཉིས་རིང་འཚོག་གི་ཡོད་པ་དང་། སྐབས་དེར་སོག་ཡུལ་གྱི་མཁས་པ་ཁག་ཅིག་དང་། བོད་མི་མཁས་པ་ཁག་ཅིག་ལྷན་འཛོམས་ཀྱིས། ཕྱི་ལོ་ ༡༩༠༠ ནས་ ༡༩༡༣ བར་བོད་དང་སོག་པོ་གཉིས་རྒྱ་ནག་མན་ཇུའི་དབང་བསྒྱུར་འོག་ནས་རང་བཙན་ཐོབ་པའི་གནས་བབ། ཕྱི་ལོ་ ༡༩༡༡ ལོར་རྗེ་བཙུན་དམ་པས་སོག་ཡུལ་རང་བཙན་གསལ་བསྒྲགས་བསྐྱངས་བའི་གནས་སྟངས། ༸རྒྱལ་བ་སྐུ་ཕྲེང་བཅུ་གསུམ་པས་བོད་རང་བཙན་གྱི་གནས་བབ་ལ་ངོས་འཛིན་ཐོབ་ཐབས་མཛད་ཚུལ་དང་ཆུ་གླང་རྩ་ཚིག་གི་གལ་གནད་སྐོར། སེ་ར་བྱེས་ཀྱི་སོག་པོའི་གྲྭ་རྒྱུན་དང་ད་ལྟའི་གནས་བབ། ཕྱི་ལོ་ ༡༩༧༩ རྗེས་ཀྱི་འབྲས་སྤུངས་སྒོ་མང་གི་སོག་པོའི་གྲྭ་རྒྱུན་སྐོར། སོག་ཡུལ་མི་སེར་རྒྱལ་ཁབ་ཀྱིས་བོད་དང་གཞུང་འབྲེལ་འབྲེལ་བ་འཛུགས་ཐབས་སྐོར། ཕྱི་ལོ་ ༡༩༧༩ ནས་ ༢༠༡༦ བར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་སོག་ཡུལ་དུ་ཆིབས་བསྒྱུར་བསྐྱངས་བའི་གལ་གནད་སོགས་ཀྱི་སྐོར་གསུང་བཤད་དང་བགྲོ་གླེང་གནང་གི་ཡོད་པ་བཅས།།