༄༅། །ཕྱི་ལོ་ ༢༠༢༤ ཟླ་བ་ ༠༤ ཚེས་ ༠༧ འཛམ་གླིང་འཕྲོད་བསྟེན་ཉིན་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་གོ་སྒྲིག་དང་། རྡ་ས་ས་གནས་འགོ་འཛིན་གྱི་མཐུན་འགྱུར་འོག་འཕྲོད་བསྟེན་གོ་རྟོགས་སྤེལ་རྒྱུར་དམིགས་ཏེ་བུ་དང་བུ་མོའི་རྒྱང་རྒྱུག་འགྲན་བསྡུར་གོ་སྒྲིག་ཞུས་ཡོད།
དེ་ཡང་གོང་ཚེས་ཉིན་གྱི་སྔ་དྲོ་བཞུགས་སྒར་རྡ་སའི་མེག་གྷན་ཐེག་ཆེན་ཆོས་གླིང་གཙུག་ལག་ཁང་ནས་རྡ་རམ་ས་ལའི་སྐོར་སྲུང་པ་ཡ་དབ་ཀུ་མཱར་ལགས་དང་། གྲོང་སྡེའི་སྤྱི་ཁྱབ་ཟུར་པ་ཨོན་ཀར་ནེ་རི་ཡ་ལགས། ཧིན་བོད་མཛའ་འབྲེལ་ཚོགས་པའི་ཚོགས་གཙོ་སྐུ་ཞབས་ཨ་ཇིཊ་ནེ་རི་ཡ་ལགས། འཕྲོད་བསྟེན་དྲུང་ཆེ་ཟླ་བ་ཚུལ་ཁྲིམས་ལགས་བཅས་ནས་རྒྱང་རྒྱུག་འགྲན་བསྡུར་དབུ་འབྱེད་གནང་།
ལས་འགུལ་དེ་དང་འབྲེལ་ཏེ་འཕྲོད་བསྟེན་དྲུང་ཆེ་ཟླ་བ་ཚུལ་ཁྲིམས་ལགས་ཀྱིས་འཛམ་གླིང་ཁྱོན་ཡོངས་སུ་འཕྲོད་བསྟེན་ཉིན་མོར་འཕྲོད་བསྟེན་དང་འབྲེལ་བའི་གོ་རྟོགས་ལས་འགུལ་སྤེལ་བཞིན་ཡོད་པ་ལྟར། བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ནས་ཀྱང་བོད་མིའི་སྤྱི་ཚོགས་ཁྲོད་འཕྲོད་བསྟེན་གོ་རྟོགས་སྤེལ་རྒྱུར་དམིགས་ཏེ་རྒྱང་རྒྱུག་འགྲན་བསྡུར་གོ་སྒྲིག་གནང་ཡོད་པ་འགྲེལ་བརྗོད་གནང་ཡོད།
ཐེངས་འདིའི་རྒྱང་རྒྱུག་འགྲན་བསྡུར་སྐབས་བགྲེས་ཡོལ་ལ་ཕེབས་ཟིན་པའི་མི་སྣ་དང་། སློབ་ཕྲུག མི་མང་དཀྱུས་མ་སོགས་མཉམ་ཞུགས་གནང་ཡོད་པ་དང་། སྐབས་དེར་གྷོ་པལ་པུར་བོད་ཁྱིམ་སློབ་གྲྭའི་སློབ་ཕྲུག་འཇིགས་མེད་ཕུན་ཚོགས་བུའི་སྡེ་ཚན་གྱི་ཨང་རིམ་རྩེར་སོན་གྱི་དཔེ་བཟང་ཧིན་སྐོར་ལྔ་སྟོང་དང་། བུ་མོའི་སྡེ་ཚན་ནས་བསོད་ནམས་བུ་ཁྲིད་ལགས་ལ་ཨང་རིམ་རྩེར་སོན་གྱིས་བྱ་དགའ་ཧིན་སྒོར་ ༥༠༠༠ ཐོབ་ཡོད།
དེ་བཞིན་རྒྱ་གར་ནང་གི་བོད་མིའི་གཞིས་ཆགས་ཁག་ཏུ་འཕྲོད་བསྟེན་གོ་རྟོགས་གཏམ་བཤད་དང་། ནད་གཞི་རྟག་དཔྱད། རྩེད་རིགས་འགྲན་བསྡུར། རྒྱང་རྒྱུག་འགྲན་བསྡུར། ཡོ་ག ཁོར་ཡུག་གཙང་བཟོ་སོགས་ཀྱི་ལམ་ནས་འཛམ་གླིང་འཕྲོད་བསྟེན་ཉིན་མོ་སྲུང་བརྩི་ཞུས་ཡོད་པ་བཅས།།
