༄༅། །ཕྱི་ལོ་ ༢༠༢༤ ཟླ་བ་ ༠༤ ཚེས་ ༡༦ ཉིན་ཨ་རིའི་གྲོས་ཚོགས་གོང་མའི་ཕྱི་འབྲེལ་ལས་དོན་ཚོགས་ཆུང་གིས་བོད་རྒྱའི་དཀའ་རྙོག་སེལ་ཐབས་ཀྱི་ཁྲིམས་འཆར་ཨང་ ༡༣༨ ལ་བཀའ་འཁྲོལ་རྒྱབ་གཉེར་གནང་བར་བོད་མིའི་སྒྲིག་འཛུགས་ནས་དགའ་བསུ་ཞུ་རྒྱུ་ཡིན།
ཁྲིམས་འཆར་འདིས་ཨ་རིའི་སྲིད་བྱུས་ནང་བོད་རྒྱའི་དཀའ་རྙོག་སེལ་བར་རྒྱ་ནག་མི་མང་སྤྱི་མཐུན་རྒྱལ་ཁབ་དང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་སྐུ་ཚབ་བམ། ཡང་ན། མང་གཙོའི་ལམ་ནས་བདམས་ཐོན་བྱུང་བའི་བོད་མིའི་དབུ་ཁྲིད་དབར་ལ་སྔོན་འགྲོའི་ཆ་རྐྱེན་གང་ཡང་མེད་པར་ཐད་ཀར་གྲོས་མོལ་བྱེད་རྒྱུར་རྒྱབ་སྐྱོར་བསྐྱར་ནན་དང། རྒྱ་ནག་གཞུང་གིས་བོད་ཀྱི་ལོ་རྒྱུས་དང་། རིག་གཞུང་། མི་རིགས། དགའ་ལྡན་ཕོ་བྲང་ཐེ་བའི་སྒྲིག་འཛུགས་ཁག་གི་གནས་ཚུལ་རྫུན་སྤེལ་འཁྱོག་བཤད་བྱེད་བཞིན་པར་གདོང་ལེན་བྱེད་ཀྱི་ཡོད།
གྲོས་ཚོགས་གོང་མའི་ཕྱི་འབྲེལ་ལས་དོན་ཚོགས་ཆུང་གིས་རྒྱབ་གཉེར་གནང་བའི་ཁྲིམས་འཆར་འདི་ནི། དེ་སྔོན་ཨ་རིའི་གྲོས་ཚོགས་གོང་མའི་ནང་དུ་གྲོས་ཚོགས་འཐུས་མི་ཇེབ་མར་ཀི་ལི་(Jeff Merkley)ལགས་དང་། ཀྲོཊ་ཡོང་(Todd Young)ལགས་ཀྱིས་ངོ་སྤྲོད་དང། གྲོས་ཚོགས་འོག་མའི་ནང་གྲོས་ཚོགས་འཐུས་མི་ཇིམ་མེག་གྷོ་ཧན་(Jim McGovern)ལགས། མ་ཧི་ཀལ་མེ་ཀོལ་(Michael McCaul)ལགས་ནས་ངོ་སྤྲོད་ཀྱིས་གཏན་འབེབས་ཟིན་པའི་ཁྲིམས་འཆར་དེ་ཡིན་ཞིང་། ཁྲིམས་འཆར་དེ་ཉིད་གྲོས་ཚོགས་གོང་མའི་ཕྱི་འབྲེལ་ལས་དོན་ཚོགས་ཆུང་གིས་རྒྱབ་གཉེར་གནང་རྗེས་གྲོས་ཚོགས་གོང་མའི་ནང་འོས་བསྡུ་གཏན་འབེབས་གནང་གི་ཡོད།
ཁྲིམས་འཆར་འདི་ངོ་སྤྲོད་གནང་སྐབས་གྲོས་ཚོགས་འཐུས་མི་མར་ཀི་ལི་ལགས་ཀྱིས། རྒྱ་ནག་མི་མང་སྤྱི་མཐུན་རྒྱལ་ཁབ་ཀྱིས་མུ་མཐུད་ནས་བོད་མིའི་གཞི་རྩའི་ཐོབ་ཐང་ལ་སྣང་མེད་གཏོང་གི་ཡོད་པ་དང་། ད་ལྟའི་གནས་བབ་དེ་རང་ལ་རྒྱུན་རིང་པོ་གནས་ཐབས་མེད། བོད་རྒྱའི་དཀའ་རྙོག་སེལ་ཐབས་ཀྱི་ཁྲིམས་འཆར་འདི་བརྒྱུད་ནས་རྒྱ་ནག་གཞུང་གིས་བོད་དང་བོད་ཀྱི་ལོ་རྒྱུས་སྐོར་ལ་རྫུན་བཤད་མཚམས་འཇོག་དགོས་པ་དང་། བོད་ཀྱི་གནས་བབ་སྐོར་ལ་ལྷག་བསམ་རྣམ་དག་གིས་གྲོས་མོལ་བྱེད་དགོས་པའི་བརྡ་ལན་ཐད་ཀར་གཏོང་གི་ཡོད། ང་ཚོས་སྲིད་དོན་ཚོགས་པ་ཟུང་སྦྲེལ་གྱི་ཁྲིམས་འཆར་འདི་ངེས་པར་དུ་མཇུག་སྐྱེལ་ཐུབ་པ་དགོས། གང་ཡིན་ཞེ་ན། བོད་མི་མང་ལ་རང་སོ་སོ་ཇི་ལྟར་འཛིན་སྐྱོང་བྱེད་མིན་ཐད་བཤད་རྒྱུའི་ཐོབ་ཐང་ཡོད་དགོས་ངེས་རེད། ཅེས་གསུངས།
གྲོས་ཚོགས་གོང་མའི་འཐུས་མི་ཀྲོཊ་ཡོང་ལགས་ཀྱིས། རྒྱ་ནག་དམར་ཤོག་ཚོགས་པས་བོད་ལ་བཙན་འཛུལ་བྱས་པ་ནི་རང་ཉིད་ཁེ་ཕན་ཆེད་ཡིན་པ་མ་ཟད། ཁོ་ཚོས་བོད་ཅེས་པའི་འགྲེལ་བརྗོད་ཀྱང་རྒྱ་ནག་དམར་ཤོག་ཚོགས་པའི་འདོད་པ་ལྟར་རྒྱག་གི་ཡོད། ང་ཚོས་ངེས་པར་དུ་ཨ་རིས་བོད་ཐོག་འཛིན་པའི་སྲིད་བྱུས་ལ་བསྐྱར་ཞིབ་གནང་སྟེ། བོད་མི་རྣམས་ཀྱི་རང་དབང་དང་། ༸གོང་ས་ཏཱ་ལའི་བླ་མ་དང་རྒྱ་ནག་བར་གྱི་དཀའ་རྙོག་སེལ་ཐབས་སུ་རྒྱ་ནག་གཞུང་གྲོས་མོལ་ལ་ཞུགས་ཐབས་སུ་སྐུལ་དེད་གཏོང་དགོས། དེ་རིང་འོས་བསྡུ་འདིར་ང་རང་དགའ་པོ་བྱུང་། ངས་གྲོས་ཚོགས་གོང་མའི་འཐུས་མི་རྣམས་ལ་སྲིད་དོན་ཚོགས་པ་ཟུང་སྦྲེལ་གྱི་ཁྲིམས་འཆར་འདི་གཏན་འབེབས་གནང་སྟེ། རྒྱ་ནག་གཞུང་གི་ད་ལྟ་བོད་གཙོས་པའི་ཡུལ་གྲུ་གཞན་ཁག་ཏུ་བྱེད་སྟངས་འདིར་ངོས་ལེན་བྱེད་ཐབས་མེད་པ་གསལ་སྟོན་གནང་བའི་རེ་སྐུལ་ཞུ་གི་ཡོད། ཅེས་གསུངས།
ཁྲིམས་འཆར་འདི་དང་འབྲེལ་ཏེ་བྱང་ཨ་རིའི་སྐུ་ཚབ་དོན་གཅོད་རྣམ་རྒྱལ་ཆོས་གྲུབ་ལགས་ཀྱིས། བོད་མི་ཚོས་ཨ་རིའི་གྲོས་ཚོགས་ལ་བརྩི་མཐོང་ཆེན་པོ་བྱེད་ཀྱི་ཡོད་ལ། ཨ་རིའི་མི་མང་གིས་བོད་དོན་ལ་རྒྱབ་སྐྱོར་གནང་བར་རྟག་ཏུ་བཀའ་དྲིན་ཆེ་ཞུ་བཞིན་ཡོད། དེ་རིང་གི་འོས་ཤོག་གི་ཐག་གཅོད་འདིས་སླར་ཡང་ཨ་རི་ནི་བོད་དོན་ཐོག་རྒྱབ་སྐྱོར་ཚད་མཐོ་ཤོས་གནང་མཁན་ཡིན་པ་བསྟན་ཡོད། ཨ་རིའི་གྲོས་ཚོགས་གོང་མའི་ཕྱི་འབྲེལ་ལས་དོན་ཚོགས་ཆུང་ངོས་ནས་བོད་རྒྱའི་དཀའ་རྙོག་སེལ་ཐབས་ཀྱི་ཁྲིམས་འཆར་ལ་རྒྱབ་གཉེར་གནང་བར་ཐུགས་རྗེ་ཆེ་ཞུས་པ་སྦྲགས། གྲོས་ཚོགས་འོག་མའི་འཐུས་མི་རྣམས་ནས་གང་མགྱོགས་ཁྲིམས་འཆར་འདི་གཏན་འབེབས་གནང་སྐྱོང་ཡོང་བའི་རེ་སྐུལ་ཞུ་རྒྱུ་ཡིན། ཞེས་གསུངས།
བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་ཕྱི་ལོ་ ༢༠༢༤ ཟླ་བ་ ༠༤ ཚེས་ ༡༥ རེས་གཟའ་ཟླ་བ་ནས་ཨ་རིའི་རྒྱལ་ས་ཝ་ཤིང་ཀྲོན་དུ་ཆེད་ཕེབས་ཀྱིས་བོད་རྒྱའི་དཀའ་རྙོག་སེལ་ཐབས་ཀྱི་ཁྲིམས་འཆར་དེ་བཞིན་ཨ་རིའི་གྲོས་ཚོགས་གོང་མའི་ནང་གཏན་འབེབས་གནང་ཐུབ་སླད་འབྲེལ་ཡོད་གྲོས་ཚོགས་འཐུས་མི་དང་གནད་ཡོད་ལས་བྱེད་རྣམས་དང་མཇལ་འཕྲད་ཀྱིས་ཞུ་སྐུལ་གནང་དང་གནང་མུས་ཡིན་པ་རེད།།
