༄༅། །བེལ་ཇ་ཡམ་སྐུ་ཚབ་དོན་གཅོད་འགན་ཁང་རིག་འཛིན་ཆོས་སྒྲོན་ལགས་ཀྱིས་ནེ་ཐར་ལེནྚ་ཕྱི་སྲིད་ལྷན་ཁང་གི་འགྲོ་བ་མིའི་ཐོབ་ཐང་གི་གཞུང་ཚབ་སྐུ་ཞབས་ཝིམ་གྷི་རིག་ (Wim Geerts) ལགས་དང་མཇལ་འཕྲད་གནང་ཡོད།

དེ་ཡང་མཇལ་མོལ་སྐབས་སྐུ་ཚབ་དོན་གཅོད་རིག་འཛིན་ཆོས་སྒྲོན་ལགས་ནས་གཞུང་ཚབ་གྷི་རིག་ལགས་ཀྱིས་ཉེ་ལམ་བོད་ཁམས་སྡེ་དགེའི་ཛ་དྲག་གནས་སྟངས་ཐོག་ཐུགས་འཚབ་དང་། སྐབས་དེར་རྒྱ་ནག་གཞུང་གིས་འཛིན་བཟུང་བཙོན་འཇུག་བྱས་པའི་བོད་མི་རྣམས་གྲོད་བཀྲོལ་གཏོང་དགོས་པའི་འབོད་སྐུལ་གནང་བར་ཐུགས་རྗེ་ཆེ་ཞུས་ཡོད།

དེ་བཞིན་ཁོང་མོས་བོད་ནང་གི་ཛ་དྲག་གནས་སྟངས་སྤྱི་དང་། ཡང་སྒོས་རྒྱ་ནག་གཞུང་གིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཡང་སྲིད་ངོས་འཛིན་གནང་སྒོར་ཐེ་བྱུས་བྱེད་བཞིན་པ། མི་སེར་སྤེལ་ཡུལ་གཏན་འཇགས་སློབ་གྲྭ་ཁག་བརྒྱུད་བོད་མིའི་ཆོས་དང་རིག་གཞུང་ངོ་བོ་རྩ་མེད་གཏོང་བཞིན་པའི་གནས་སྟངས་ངོ་སྤྲོད་ཞིབ་ཕྲ་གནང་ཡོད།

གཞུང་ཚབ་ཆེན་མོ་གྷི་རིག་ལགས་ནས་བོད་དོན་ལ་མུ་མཐུད་རྒྱབ་སྐྱོར་གནང་རྒྱུའི་ནན་བརྗོད་དང་སྦྲགས། ནི་ཐར་ལེནྚ་གྱི་སྲིད་བློན་རུ་ཊི་མཆོག་ཉེ་ལམ་ཕྱི་ཟླ་གསུམ་པའི་ནང་རྒྱ་ནག་ཏུ་ཕེབས་སྐབས་རྒྱ་ནག་གི་དབུ་ཁྲིད་ལྷན་བོད་དོན་གླེང་སློང་གནང་ཡོད་པ་གསུངས།

གཞུང་ཚབ་གྷེ་རིག་ལགས་ནི་དེ་སྔོན་རྒྱ་ནག་གནས་འཁོད་ནི་ཐར་ལེནྚ་གཞུང་ཚབ་གནང་མྱོང་ཡོད་པས་བོད་ནང་གི་གནས་སྟངས་སྐོར་རྒྱུས་མངའ་གང་ལེགས་ཡོད་པ་བཅས།།