༄༅། །ཕྱི་ལོ་ ༢༠༢༤ ཟླ་བ་ ༠༤ ཚེས་ ༢༥ ཉིན་༸ཀུན་གཟིགས་པཎ་ཆེན་སྐུ་ཕྲེང་བཅུ་གཅིག་པ་བསྟན་འཛིན་དགེ་འདུན་ཡེ་ཤེས་འཕྲིན་ལས་མཆོག་དགུང་གྲངས་ ༣༥ ལ་ཕེབས་པའི་འཁྲུངས་སྐར་ཉིན་བེལ་ཇ་ཡམ་མངའ་སྡེའི་གྲོས་ཚོགས་ཀྱི་ཕྱི་འབྲེལ་ལས་དོན་ཚོགས་ཆུང་གི་ཚོགས་གཙོ་ཨིལ་སི་ཝན་ཧུབ་ (Els Van Hoof) མཆོག་དང་། ཚོགས་གཞོན་སེ་མུལ་ཀོ་གོ་ལ་ཊི་ (Samuel Cogolati) མཆོག་ནས་ཟུང་སྦྲེལ་བསྒྲགས་གཏམ་ཞིག་སྤེལ་ཡོད།

དེ་ཡང་བསྒྲགས་གཏམ་ནང་རྒྱ་ནག་གཞུང་གིས་ཀུན་གཟིགས་པཎ་ཆེན་སྐུ་ཕྲེང་བཅུ་གཅིག་བསྟན་འཛིན་དགེ་འདུན་ཡེ་ཤེས་འཕྲིན་ལས་མཆོག་གར་སོང་ཆ་མེད་དུ་བཏང་ནས་ལོ་ངོ་ ༢༩ འཁོར་བར་སྐྱོན་བརྗོད་དང་སྦྲགས། རྒྱ་གཞུང་ནས་པཎ་ཆེན་རིན་པོ་ཆེ་གཙོས་པའི་ཁོང་གི་སྐུ་འཁོར་ནང་མི་དང་། བོད་མི་ཆབ་སྲིད་བཙོན་པ་རྣམས་འཕྲལ་དུ་གློད་བཀྲོལ་གཏོང་དགོས་པའི་འབོད་སྐུལ་གནང་ཡོད།

དེ་བཞིན་བསྒྲགས་གཏམ་དུ་རྒྱ་ནག་གཞུང་ནས་བོད་མིའི་རང་དབང་ལ་གུས་བརྩི་དང་། ཁྱད་པར་བོད་མི་རྣམས་ལ་རྒྱ་གཞུང་གི་ཐེ་བྱུས་མེད་པར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཐེ་བའི་བོད་ཀྱི་བླ་སྤྲུལ་རྣམ་པའི་ཡང་སྲིད་ངོས་འཛིན་ཞུ་རྒྱུའི་རང་དབང་སྤྲོད་དགོས་པ་གསུངས་ཡོད།

གྲོས་ཚོགས་འཐུས་མི་རྣམ་པས་རྒྱབ་སྐྱོར་གནང་བའི་བསྒྲགས་གཏམ་འདི་ལྟ་བུ་ནི་གལ་གནད་ཧ་ཅང་ཆེན་པོ་ཡིན། གང་ཡིན་ཞེ་ན། ཀུན་གཟིགས་པཎ་ཆེན་བསྟན་འཛིན་དགེ་འདུན་ཡེ་ཤེས་འཕྲིན་ལས་མཆོག་གི་གྱོད་གཞི་དེ་ཡིས་རྒྱ་གཞུང་གི་བཙན་གནོན་འོག་བོད་མི་མང་གིས་མུ་མཐུད་ནས་སྡུག་བསྔལ་མྱོང་གི་ཡོད་པ་དང་། རྒྱ་ནག་གཞུང་གིས་གཞི་རྩའི་འགྲོ་བ་མིའི་ཐོབ་ཐང་ལ་རྡོག་རོལ་གཏོང་གི་ཡོད་པ་གསལ་པོར་མཚོན་གྱི་ཡོད།

ཕྱི་ལོ་ ༡༩༩༥ ལོར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་པཎ་ཆེན་རིན་པོ་ཆེའི་ཡང་སྲིད་ངོས་འཛིན་གསལ་བསྒྲགས་གནང་ནས་ཉིན་གསུམ་སོང་མཚམས་ཡང་སྲིད་རིན་པོ་ཆེ་རྒྱ་དམར་འགོ་ཁྲིད་ཀྱིས་བཙན་ཁྲིད་བྱས་ཏེ་གར་སོང་ཆ་མེད་དུ་གྱུར་ཡོད་པ་རེད།།