༄༅། །ཕྱི་ལོ་ ༢༠༢༤ ཟླ་བ་ ༠༤ ཚེས་ ༢༠ ཉིན་བེལ་ཇ་ཡམ་གནས་འཁོད་འོག་མིན་ཆོས་ཀྱི་གྲོང་ཆོས་ཚོགས་ཕྱག་བཏབ་ནས་ལོ་ངོ་ ༡༧ འཁོར་བའི་དུས་ཆེན་སྲུང་བརྩིའི་མཛད་སྒོར་བེལ་ཇ་ཡམ་སྐུ་ཚབ་དོན་ཁང་གི་དྲུང་ཆེ་འཕྲིན་ལས་དབང་འདུས་ལགས་ལྷན་ཞུགས་གནང་ཡོད།

སྐབས་དེར་རྫོགས་ཆེན་ར་ཉག་དཔལ་སྤྲུལ་རིན་པོ་ཆེ་དང་། ལོ་པཎ་བྱམས་པ་ནོར་རྒྱས་ལགས། ལོ་པཎ་ཚེ་རིང་མགོན་པོ་ལགས། ས་གནས་ཡེ་ཤུའི་ལྷ་ཁང་གི་མཆོད་དཔོན་ཅ་ནོ་ནི་(Chanoine Philipppe Masson) ལགས། ས་གནས་གྲོང་སྡེའི་སྤྱི་ཁྱབ་ཕོ་རེན་ནེ་སི་ (Florennes Commune) ལགས། ས་གནས་ཀྱི་ཆོས་ཚོགས་ཁག་གི་སྐུ་ཚབ། དེ་བཞིན་ས་གནས་བོད་མི་སོགས་མཉམ་ཞུགས་ཀྱིས་རིག་གཞུང་འཁྲབ་སྟོན་དང་གསུང་བཤད་ལས་རིམ་སྤེལ་ཏེ་དུས་ཆེན་སྲུང་བརྩི་ཞུས་ཡོད་པ་རེད།ཐོག་མར་ལོ་པཎ་ཚེ་རིང་མགོན་པོ་ལགས་ཀྱིས་ཆོས་ཚོགས་ཀྱི་དམིགས་ཡུལ་དང་། ལས་དོན་བྱེད་ཕྱོགས་ངོ་སྤྲོད། དེ་ནས་ཆོས་ཚོགས་དབུ་འཛུགས་གནང་མཁན་རྫོགས་ཆེན་ར་ཉག་དཔལ་སྤྲུལ་རིན་པོ་ཆེ་ནས་སྐུ་མགྲོན་རྣམས་ལ་ཕེབས་བསུ་དང་སྦྲགས། དབུ་འབྱེད་གསུང་བཤད་གནང་ཡོད། སྐབས་དེར་ཁོང་གིས་ཆོས་ཚོགས་ཀྱི་ལས་གཞི་ཁག་དང་། དམིགས་བསལ་བོད་ཀྱི་ཆོས་དང་རིག་གཞུང་མི་ཉམས་རྒྱུན་འཛིན། བོད་མིའི་སྤྱི་ཚོགས་ཁྲོད་སྤྱི་ཚོགས་ཞབས་ཞུ་ཇི་ཞུས་སོགས་ཀྱི་སྐོར་ངོ་སྤྲོད་གནང་རྗེས་བེལ་ཇ་ཡམ་སྐུ་ཚབ་དོན་ཁང་གི་དྲུང་ཆེ་འཕྲིན་ལས་དབང་འདུས་ལགས་ཀྱིས་དུས་ཆེན་དང་འབྲེལ་ཏེ་གསུང་བཤད་གནང་ཡོད། སྐབས་དེར་ཁོང་གིས་རིན་པོ་ཆེ་མཆོག་ནས་བོད་བརྒྱུད་ནང་བསྟན་འཛམ་གླིང་ཁྱོན་ཡོངས་སུ་དར་འཕེལ་གཏོང་བར་མཛད་འཕྲིན་རླབས་ཆེན་བསྐྱངས་བར་བསྔགས་བརྗོད་དང་། འབྲེལ་ཡོད་ལས་བྱེད་དང་དང་བླངས་བ་རྣམས་ནས་ཆོས་ཚོགས་ཆེད་སྐུ་ལས་སྐྱོན་པར་ཐུགས་རྗེ་ལེགས་འབུལ་ཞུས་ཡོད། སྔ་དྲོའི་མཛད་རིམ་ནང་དཔལ་སྤྲུལ་རིན་པོ་ཆེས་ཕེབས་བསུའི་གསུང་བཤད་དང་། ས་གནས་བོད་མི་ཚོས་གླུ་གར་འཁྲབ་སྟོན། ཆོས་ཚོགས་སུ་གཟིགས་སྐོར་གྱི་མཛད་སྒོ་སྤེལ། ཉིན་རྒྱབ་བོད་ཀྱི་ཞབས་བྲོ་དང། བོད་ཀྱི་ཞལ་ཟས། བྱིས་པ་ཚོའི་མཛེས་བཟོ། བོད་ཀྱི་ཡིག་གཟུགས། གློག་བརྙན། ཚོང་ཁང་། སྒོམ་ངོ་སྤྲོད། གཅོད་ཀྱི་ཉམས་ལེན་ལ་སོགས་པའི་ཚོགས་འདུ་དང་བྱེད་སྒོ་སྣ་ཚོགས་སྤེལ་ཡོད།

རྫོགས་ཆེན་དགེ་ལེགས་སྤེལ་འབར་གླིང་ཆོས་ཚོགས་འདི་བཞིན་རྫོགས་ཆེན་ར་ཉག་དཔལ་སྤྲུལ་རིན་པོ་ཆེས་ཕྱི་ལོ་ ༢༠༠༧ ལོར་ཕྱག་བཏབ་ཅིང་། དེ་ཉིད་བེལ་ཇ་ཡམ་གྱི་རྒྱལ་ས་བྷ་རུ་སིལ་ནས་སྤྱི་ལེ ༨༩ ཙམ་གྱི་སར་ཆགས་ཡོད་ལ། དེ་ལ་ས་གནས་ཡུལ་མི་རྣམས་ཀྱིས་དགའ་བསུ་ཆེན་པོ་བྱེད་ཀྱི་ཡོད། ཆོས་ཚོགས་འདིས་ལོ་ལྟར་ས་གནས་གཟའ་མཇུག་སློབ་གྲྭའི་སློབ་མ་ཚོར་དབྱར་དུས་བོད་ཡིག་འཛིན་གྲྭ་གོ་སྒྲིག་གནང་གི་ཡོད་པ་བཅས།།