༄༅། །ཕྱི་ལོ་ ༢༠༢༤ ཟླ་བ་ ༠༤ ཚེས་ ༢༦ ཉིན་ཕྱི་དྲིལ་བོད་ཀྱི་འགྲེམས་སྟོན་ཁང་གི་ཇར་མ་ནིའི་གྲོང་ཁྱེར་ཧྤེ་རེང་ཕོཊ་ཀྱི་བསྐོར་བསྐྱོད་འགྲེམས་སྟོན་ལེགས་པར་མཇུག་སྒྲིལ་ཡོད།
དེ་ཡང་བོད་ཀྱི་འགྲེམས་སྟོན་ཁང་གིས་ཕྱི་ལོ་ ༢༠༢༤ ཟླ་བ་ ༠༤ ཚེས་ ༢༡ ནས་དབུ་འཛུགས་ཀྱིས་ཧྤེ་རེང་ཕོཊ་དུ་བོད་ཀྱི་རིག་གཞུང་དང་། བོད་ཀྱི་ཆབ་སྲིད་གནས་བབ་གསལ་སྟོན་གྱི་བསྐོར་བསྐྱོད་འགྲེམས་སྟོན་གནང་ཞིང་། ཕྱི་ཚེས་ ༢༣ ཉིན་འགྲེམས་སྟོན་དངོས་གཞི་དབུ་འཛུགས་སྐབས་ཧྤེ་རེང་ཕོཊ་བོད་ཁང་གི་ངེས་སྟོན་པ་ཨིལ་ཀི་ཧེ་སལ་ (Elke Hessel) ལགས་དང་། ཐོས་བསམ་རིན་པོ་ཆེ་ཕེབས་ཞུགས་ཀྱིས་ཐོག་མར་བོད་ཀྱི་འགྲེམས་སྟོན་ཁང་གི་འགན་འཛིན་བསྟན་འཛིན་སྟོབས་ལྡན་ལགས་ཀྱིས་བོད་ཀྱི་འགྲེམས་སྟོན་ཁང་དང་། བསྐོར་བསྐྱོད་འགྲེམས་སྟོན་གྱི་ངོ་སྤྲོད་དང་། དེ་བཞིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་མཛད་རྣམ་དང་འབྲེལ་བའི་འགུལ་གཟུགས་གློག་བརྙན་ཞིག་གཟིགས་འབུལ་ཞུས།
ཕྱི་ཚེས་ ༢༤ ཉིན་ཧུམ་བོལ་སློབ་གྲྭའི་སློབ་ཕྲུག་ ༤༥ ཙམ་བོད་ཁང་དུ་འགྲེམས་སྟོན་གཟིགས་པར་ཕེབས་ཤིང་། སྐབས་དེར་ཁོང་རྣམས་ནས་བོད་ཀྱི་འགྲེམས་སྟོན་ཁང་གི་འགན་འཛིན་ལྷན་དུ་བོད་ནང་གི་ཛ་དྲག་གནས་སྟངས་སྐོར་གྲོས་མོལ་གནང་།
ཐེངས་འདིའི་བསྐོར་བསྐྱོད་འགྲེམས་སྟོན་དང་འབྲེལ་ཏེ་བོད་ཀྱི་འགྲེམས་སྟོན་ཁང་གིས། ཧྤེ་རེང་ཕོཊ་དུ་ཀྱི་བསྐོར་བསྐྱོད་འགྲེམས་སྟོན་འདི་ནི་བོད་དོན་ཞུ་གཏུག་དང་། བོད་ཀྱི་རིག་གཞུང་བསྟན་སའི་སྟེགས་བུ་གཙོ་བོ་ཞིག་ཏུ་གྱུར་ཡོད། འགྲེམས་སྟོན་ལ་ལྟ་སྐོར་བྱེད་མཁན་དང་། གསར་འགྱུར་བརྒྱུད་ལམ། ལས་བྱེད་པ་བཅས་ཀྱི་རྒྱབ་སྐྱོར་དང་མཉམ་ཞུགས་ཀྱིས་ལས་གཞི་འདིའི་གལ་གནད་གསལ་པོར་བསྟན་ཡོད། ཅེས་བཀོད་འདུག་པ་བཅས།། 
