༄༅། །ཕྱི་ལོ་ ༢༠༢༤ ཟླ་ ༠༤ ཚེས་ ༢༤ ཉིན་བོད་མིའི་སྒྲིག་འཛུགས་ཀྱི་ཕྱི་དྲིལ་བོད་ཀྱི་འགྲེམས་སྟོན་ཁང་གི་སུད་སི་གྲོང་ཁྱེར་དུ་གཞུང་འབྲེལ་ཕྱོགས་སྐྱོད་ལེགས་པར་མཇུག་སྒྲིལ་ཡོད་པ་རེད།

དེ་ཡང་ཕྱི་ཚེས་ ༡༦ ཉིན་ནས་ཇི་ནི་ཝའི་ Place Des Nations དུ་ ( Biography of HHDL & Long Look Homeward) ཞེས་པའི་འགྲེམས་སྟོན་ལས་འགོ་བཙུགས། སུད་སི་སྐུ་ཚབ་དོན་ཁང་དང་རྒྱལ་སྤྱིའི་བོད་དོན་ཚོགས་པ་ GSFT གཉིས་ཟུང་སྦྲེལ་གྱིས་རྒྱལ་སྤྱིའི་སྡིངས་ཆའི་ཐོག་བོད་ཀྱི་རིག་གཞུང་དང་བོད་དོན་ཞུ་གཏུག་གི་ལས་འགུལ་སྤེལ་ཡོད། སྐབས་དེར་སུད་སི་སྐུ་ཚབ་དོན་གཅོད་འཕྲིན་ལས་ཆོས་སྐྱིད་ལགས་དང་། ཐའི་ཝན་གྱི་སྐུ་ཚབ་ནི་ཀོལ་སུ་ལགས། དེ་བཞིན་མི་སྣ་གལ་ཆེན་ཁག་ཅིག་ཕེབས་ཞུགས་གནང་ཡོད།

དེ་བཞིན་ཕྱི་ཚེས་ ༢༠ དང་ ༢༡ བཅས་ཉིན་གཉིས་རིང་ཛུ་རིག་ཏུ་འགྲེམས་སྟོན་དང་བོད་དོན་ཞུ་གཏུག་ལས་འགུལ་མུ་མཐུད་དེ་སྤེལ་ཡོད། སྐབས་དེར་སྐུ་མགྲོན་གཙོ་བོར་ཛུ་རིག་གི་སྲིད་བློན་སྐུ་ཞབས་མ་རི་ཡོ་མཆོག་དང་། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་ཚབ་ཟུར་པ་སྐལ་བཟང་རྒྱལ་མཚན་ལགས་རྣམ་གཉིས་ཕེབས་ཡོད་པ་དང་། དམིགས་བསལ་སྐུ་མགྲོན་དུ་འཕྲིན་ལས་ཆོས་སྐྱིད་ལགས་ཀྱང་ཕེབས་ཡོད། མཛད་སྒོའི་ཐོག་མར་མཁན་པོ་དགེ་བཤེས་བསྟན་འཛིན་བྱང་ཆུབ་ལགས་ནས་ཐུགས་སྨོན་གསུངས་རྗེས་ཛུ་རིག་གི་ Folklore Ensemble TCSL ནས་བཀྲ་ཤིས་ཞོལ་པ་འཁྲབ་སྟོན་གནང་ཡོད།

དེ་ཡང་( Biography of HHDL & Long Look Homeward) ཞེས་པའི་འགྲེམས་སྟོན་དེས་བོད་ཀྱི་ལོ་རྒྱུས་དང་། ད་ལྟའི་གནས་སྟངས། མ་འོངས་པའི་མངོན་འདོད་བཅས་ཀྱི་སྐོར་ལ་གོ་རྟོགས་སྤེལ་ཡོད། འགྲེམས་སྟོན་དེ་ནི་བཙན་བྱོལ་བོད་མིའི་སྐུ་ཚབ་དོན་གཅོད་བཅུ་གཅིག་གིས་བཀོད་སྒྲིག་བྱས་ཤིང་། དེར་སྒེར་གྱི་ལོ་རྒྱུས་དང་རྒྱལ་ཁབ་ཀྱི་ལོ་རྒྱུས་གཉིས་མཉམ་བསྲེས་ཀྱིས་མི་མང་རྣམས་ལ་ཚོར་བ་ཤུགས་ཆེན་པོ་སྤྲོད་ཐུབ་པ་བྱུང་ཡོད།

ཕྱི་དྲིལ་བོད་ཀྱི་འགྲེམས་སྟོན་ཁང་ནས་ཇི་ནི་ཝ་སྐུ་ཚབ་དོན་ཁང་དང་། བོད་དང་སུད་སིའི་མཛའ་འབྲེལ་ཚོགས་པ། སུད་སི་དང་ Liechtenstein གྱི་བོད་རིགས་མཐུན་ཚོགས་བཅས་ཀྱིས་རྒྱབ་སྐྱོར་གནང་བར་ཐུགས་རྗེ་ཆེ་ཞུས་པ་དང་སྦྲགས། འཛམ་གླིང་མཉམ་འབྲེལ་རྒྱལ་ཚོགས་ཀྱི་ཐང་ཆེན་དུ་འགྲེམས་སྟོན་བྱེད་རྒྱུའི་གོ་སྐབས་ཐོབ་པ་འདིས་བོད་ནང་གི་འགྲོ་བ་མིའི་ཐོབ་ཐང་ལ་རྡོག་རོལ་གཏོང་བའི་བོད་མིའི་སྐད་སྒྲ་ཇེ་ཆེར་གཏོང་བ་མ་ཟད། བོད་ཀྱི་འགྲེམས་སྟོན་ཁང་གི་ཆེད་དུ་གོམ་པ་མདུན་སྐྱོད་ཞིག་ཏུ་གྱུར་ཡོད་པ་བཅས།།