༄༅། །ཕྱི་ལོ་ ༢༠༢༤ ཟླ་བ་ ༠༤ ཚེས་ ༢༨ ཉིན་གྱི་སྔ་དྲོ་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་སུད་སིའི་གྲོང་ཁྱེར་ཛུ་རིག་གནམ་ཐང་དུ་ཕེབས་འབྱོར་བྱུང་ཡོད་པ་དང་། སྐབས་དེར་སུད་སིའི་སྐུ་ཚབ་དོན་གཅོད་འཕྲིན་ལས་ཆོས་སྐྱིད་ལགས་དང་། སུད་སི་དང་ལེག་ཀྲིན་ཚིན་བོད་རིགས་ཚོགས་པའི་ཚོགས་གཙོ་ཚོགས་གཞོན། ས་གནས་བོད་མི་བཅས་ནས་ཕེབས་བསུ་གཟབ་རྒྱས་ཞུས་ཡོད།
དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་བཅུ་དང་ཕྱེད་ཀའི་ཐོག་དཔལ་ལྡན་སྲིད་སྐྱོང་མཆོག་རི་ཀོན་ཆོས་འཁོར་དགོན་དུ་ཆེད་ཕེབས་ཀྱིས་རི་ཀོན་ཆོར་འཁོར་དགོན་གྱི་ཚོགས་གཙོ་འབུམ་རམས་པ་ཀརྨ་སྒྲོལ་མ་བློ་བཟང་ལགས་དང་། འཛིན་སྐྱོང་འགན་འཛིན་པི་ཊར་ཨོ་བར་ཧོལ་ཛར་ལགས། དགོན་སྡེ་ཁག་གི་སྐུ་ཚབ་བླ་མ་བསྟན་འཛིན་ལགས། མཁན་པོ་དགེ་བཤེས་བསྟན་འཛིན་བྱང་ཆུབ་ལགས། དེ་བཞིན་ས་གནས་མི་མང་དང་མཇལ་འཕྲད་གནང་ཡོད་པ་རེད།
དེ་རྗེས་སུད་སིའི་ས་གནས་ཊ་ཧི་ཊི་ཀོན་དུ་ས་གནས་བོད་མི་དང་ཐུག་འཕྲད་ཀྱིས་བོད་དོན་འཐབ་རྩོད་དང་། བོད་མིའི་སྒྲིག་འཛུགས་སྐོར་ལམ་སྟོན་གསུང་བཤད་གནང་ཡོད། སྐབས་དེར་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་བོད་མི་རྣམས་བཙན་བྱོལ་དུ་གྱར་རྗེས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཡང་དག་པའི་དབུ་ཁྲིད་ལམ་སྟོན་དང་བཀའ་དྲིན་ལ་བརྟེན་ནས་འབུར་དུ་ཐོན་པའི་བཙན་བྱོལ་བའི་སྤྱི་ཚོགས་ཤིག་ཆགས་ཡོད་པ་མ་ཟད། མང་གཙོའི་ཆ་ལག་ཡོངས་སུ་འཛོམས་པའི་སྒྲིག་འཛུགས་ཤིག་ཀྱང་གྲུབ་ཡོད་པས། བོད་མི་ཡིན་ནོ་ཅོག་ནས་མགོན་པོ་མཆོག་གི་བཀའ་དྲིན་སྙིང་བཅངས་ཀྱིས་བོད་སྤྱི་པའི་དོན་དུ་ཞབས་འདེགས་ཞུ་དགོས་པའི་གཞེན་སྐུལ་དང་སྦྲགས། མི་རབས་རྒན་པ་རྣམས་ཀྱིས་བོད་ཀྱི་རང་དབང་འཐབ་རྩོད་དང་། བོད་སྤྱི་པའི་དོན་དུ་ཞབས་ཞུ་ལྷོད་མེད་བསྒྲུབས་ཡོད་པ་ལྟར། མི་རབས་ཕྱི་མ་རྣམས་ནས་ཀྱང་མི་རབས་གོང་མའི་མཛད་རྗེས་ལ་ཡི་རངས་དང་། མཇུག་སྐྱོང་རྒྱུན་སྲིང་དགོས་པའི་ལམ་སྟོན་གནང་ཡོད།
དེ་བཞིན་དཔལ་ལྡན་སྲིད་སྐྱོང་མཆོག་གིས། བཙན་བྱོལ་སྒྲིག་འཛུགས་ནང་ནས་ང་ཚོའི་སྒྲིག་འཛུགས་དེ་མི་འདྲ་བ་ཞིག་ཆགས་ཡོད་དུས། དབུས་ཀྱི་སྒྲིག་འཛུགས་དེ་མ་འོངས་པར་རྒྱུན་གནས་ཐུབ་པར་ཧྲ་ཏག་ཏག་བཟོ་ཐུབ་དགོས་རྒྱུ་དེ་ཧ་ཅང་གལ་ཆེན་པོ་རེད། ༸རྒྱལ་བ་རིན་པོ་ཆེ་དགུང་ལོ་ ༨༩ ལ་ཕེབས་ཀྱི་ཡོད། མ་འོངས་པར་ང་ཚོར་༸རྒྱལ་བ་རིན་པོ་ཆེ་ལྟ་བུའི་དབུ་ཁྲིད་ཅིག་བོད་མིའི་སྤྱི་ཚོགས་ནང་སླར་ཡོང་སྲིད་རྒྱུ་ཐེ་ཚོམ་རེད། སྲིད་ཀྱི་མ་རེད་ཅེས་ཞུ་ཐུབ་ཀྱི་མེད། འོན་ཀྱང་༸རྒྱལ་བ་རིན་པོ་ཆེ་ནང་བཞིན་མཁྱེན་ཡོན་དང་། མཚན་སྙན་གྲགས་སོགས་གང་ཅིའི་ཐད་ནས་ཡོང་ཐུབ་རྒྱུ་ཧ་ཅང་ཁག་པོ་རེད། དེ་ཡིན་དུས། ང་ཚོའི་སྒྲིག་འཛུགས་ཀྱིས་ལས་ཀ་གང་འདྲ་ཞིག་བྱས་ཀྱང་སྒྲིག་འཛུགས་དེ་གལ་ཆེ་བར་བརྩིས། གང་ཟག་དེ་གཉིས་པར་འཇོག་དགོས། ང་སྤེན་པ་ཚེ་རིང་གལ་ཆེན་པོ་མ་རེད། སྲིད་སྐྱོང་གི་གོ་གནས་དང་བཀའ་ཤག་གི་སྒྲིག་འཛུགས་དེ་དེ་གལ་ཆེན་པོ་རེད། བོད་མི་མང་སྤྱི་འཐུས་ལྷན་ཚོགས་ཀྱི་སྒྲིག་འཛུགས་དེ་གལ་ཆེན་པོ་རེད། ཁྲིམས་ལུགས་དབང་འཛིན་གྱི་སྒྲིག་འཛུགས་དེ་གལ་ཆེན་པོ་རེད། ཅེས་དང་།
གཞན་ཡང་། སྐབས་བཅུ་དྲུག་པའི་བཀའ་ཤག་གི་ལས་དོན་གནང་ཕྱོགས་སྤྱི་དང་། ཁྱད་པར་དུ་བཀའ་ཤག་འདིའི་ལས་ཡུན་ལོ་ལྔའི་ནང་དུ་བོད་མིའི་སྒྲིག་འཛུགས་ཀྱིས་སྲིད་བྱུས་གཏན་འབེབས་དང་ལས་འཆར་བཀོད་སྒྲིག་སོགས་ལ་ཕན་ནུས་ལྡན་པའི་བོད་མིའི་སྒྲིག་འཛུགས་དང་མི་མང་དང་འབྲེལ་བའི་གྲངས་ཐོ་ཚད་ལྡན་བཟོ་རྒྱུ་དང་། བོད་མིའི་སྒྲིག་འཛུགས་ཀྱི་ལས་དོན་ཚགས་ཚུད་ཕུགས་འཕེར་ཡོང་བར་སྤྱི་ཡོངས་སྒྲོམ་གཞི་ལེགས་བཅོས་གནང་རྒྱུ་མཚོན་པའི་ལས་དོན་ཇི་སྤེལ་ངོ་སྤྲོད་གནང་།
ཕྱོགས་མཚུངས་དཔལ་ལྡན་སྲིད་སྐྱོང་མཆོག་གིས་ཉེ་ལམ་རྒྱ་གར་གྱི་གསར་འགོད་པ་ཁག་ཅིག་ལ་བོད་མིའི་སྒྲིག་འཛུགས་དང་རྒྱ་ནག་བར་རྒྱབ་ཕྱོགས་ནས་གཞུང་འབྲེལ་མིན་པའི་རྣམ་པའི་ཐོག་ནས་འབྲེལ་བ་ཡོད་སྐོར་གསུངས་པར། རྒྱ་ནག་ཕྱི་སྲིད་ལྷན་ཁང་གི་མགྲིན་ཚབ་པས་རྒྱ་ནག་གཞུང་ནས་༸རྒྱལ་བ་རིན་པོ་ཆེ་ལྷན་དུ་མགོན་པོ་མཆོག་གི་མ་འོངས་གནད་དོན་སྐོར་གྲོས་མོལ་བྱ་རྒྱུ་ལས་བོད་མིའི་སྒྲིག་འཛུགས་ལྷན་དུ་གྲོས་མོལ་བྱ་རྒྱུ་མིན་ཚུལ་བཤད་པ་ནི་སྐད་ཆ་གསར་པ་གང་ཡང་མིན་པར་རྒྱ་གཞུང་གིས་རྒྱུན་ལྡན་ནས་ཤོད་བཞིན་པའི་གནས་ཚུལ་ཞིག་ཡིན་པ་གསལ་བཤད་དང་སྦྲགས། བོད་རྒྱའི་དཀའ་རྙོག་སེལ་དགོས་ན། རྒྱ་ནག་གཞུང་ལྷན་གྲོས་མོལ་དགོས་པས། ད་དུང་མུ་མཐུད་རྒྱ་ནག་གཞུང་གྲོས་མོལ་ལ་ཞུགས་པར་སྐུལ་དེད་གཏང་རྒྱུར་བོད་མིའི་སྒྲིག་འཛུགས་ནས་རྒྱལ་སྤྱིའི་སྲིད་གཞུང་དང་སྤྱི་ཚོགས་ལ་གོ་རྟོགས་ཞུ་གཏུག་ཆད་མེད་སྤེལ་ངེས་ཡིན་པ་སོགས་གསུངས།
དེ་དང་འབྲེལ་ཏེ་སྲིད་སྐྱོང་མཆོག་གིས། མཚམས་རེ་རྒྱ་ནག་ནས་ང་ལ་ཁྱོད་ཀྱིས་འདི་བྱེད་ཀྱི་འདུག་འདི་བྱེད་ཀྱི་མི་འདུག་ལྟ་བུའི་ལན་སྐུར་གྱི་འདུག ངས་འདི་ང་ལ་མ་ཤོད་ཅེས་བརྗོད་ཀྱི་ཡོད། ཁོ་ཚོས་བཤད་པ་དེ་ང་ཚོས་བདག་པོ་རྒྱག་དགོས་ན། དང་པོ་བོད་ནང་བཟང་ཕྱོགས་ཀྱི་འགྱུར་བ་ཞིག་ཐོངས་དང་། དེ་ནས་ང་ཚོས་བསམ་བློ་གཏང་རྒྱུ་ཡོད་པ་རེད། བོད་ནང་བཟང་ཕྱོགས་ཀྱི་འགྱུར་བ་གཏང་རྒྱུ་མེད་པར་ཁ་སང་ཕྱི་སྲིད་ལྷན་ཁང་གི་མགྲིན་ཚབ་པས་སྐད་ཆ་ཤོད་སྟངས་ལ་བལྟས་པ་ཡིན་ན། ང་ཚོའི་ལུང་པར་ཁོ་ཚོས་བཙན་གནོན་དབང་ཡོད་ཀྱིས་བཟུང་བསྡད་ཡོད་བཞིན་དུ། ད་དུང་༸རྒྱལ་བ་རིན་པོ་ཆེས་འདི་གནང་དགོས་འདི་གནང་ཆོག་གི་མ་རེད་ཅེས་བཤད་པ་དེ་གང་ཟེར་གྱི་ཡོད་པ་རེད། ཧམ་པའི་སྐད་ཆ་རེད། འདི་རིགས་ང་ཚོས་ཁས་ལེན་ཐུབ་རྒྱུ་མེད་ཅེས་སོགས་གསུངས་རྗེས་མང་ཚོགས་ཀྱི་དོགས་དྲི་ཁག་ལ་ལན་འདེབས་གསལ་བཤད་གནང་ཡོད། གཞན་ཡང་སྐབས་དེར་དཔལ་ལྡན་སྲིད་སྐྱོང་མཆོག་གིས་ས་གནས་གཟའ་མཇུག་སློབ་གྲྭའི་དགེ་རྒན་ལས་བྱེད་ལྷན་མཇལ་མོལ་གནང་ཡོད་པ་དང་། ཕྱི་ཚེས་ ༢༩ ཉིན་དཔལ་ལྡན་སྲིད་སྐྱོང་མཆོག་གི
