༄༅། །འདི་གར་བྱང་ཨ་རི་སྐུ་ཚབ་དོན་གཅོད་ལས་ཁུངས་ནས་བཏང་གནས་ནང་འཁོད་དོན། བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་ཁེ་ན་ཊའི་གྲོང་ཁྱེར་ཀྲོ་རོན་ཊོ་དང་།  གྲོང་ཁྱེར་མོན་ཁྲེ་ཡོལ་ནང་གི་མཛད་རིམ་ཁག་གྲུབ་རྗེས།  མུ་མཐུད་ཨ་རིའི་མངའ་སྡེ་ལྦར་མོཎ་ཊ་དང་།  གྲོང་ཁྱེར་སྦོ་སི་ཊོན་ནང་མང་ཚོགས་ལ་གསུང་བཤད་དང་།  གཞོན་སྐྱེས་དང་གླེང་མོལ།  གྲོས་ཚོགས་འཐུས་མི་མཇལ་འཕྲད་སོགས་གནང་བའི་གནས་ཚུལ་ཕྱོགས་བསྡུས། དེ་ཡང་ཟླ་བ་ ༤ ཚེས་ ༡༢ ཉིན་གྱི་སྔ་དྲོ་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་ཨ་རིའི་གྲོས་ཚོགས་གོང་མའི་འཐུས་མི་བེ་ཀ་ (Becca Balint)  ལགས་ཀྱི་མངའ་སྡེའི་ལས་དོན་འགན་འཛིན་ (State Director David Scherr) ལགས་དང་།  གྲོས་ཚོགས་གོང་མའི་འཐུས་མི་ (Peter Welch) ལགས།  ཉེ་ཆར་གསར་དུ་བདམས་ཐོན་བྱུང་བའི་ལྦར་མོཎ་ཊ་མངའ་སྡེའི་གྲོང་ཁྱེར་  (Burlington) གྱི་གྲོང་ཁྱེར་སྤྱི་ཁྱབ་ (Emma Mulvaney) ལགས་ཀྱི་ལས་ཁུངས་ཀྱི་གནད་ཡོད་ལས་བྱེད་དང་མཇལ་མོལ་གནང་།  དཔལ་ལྡན་སྲིད་སྐྱོང་མཆོག་གིས་ཁོང་རྣམས་ལ་ཞུ་དོན་གཙོ་བོ་ནི།  རྒྱ་ནག་གཞུང་གིས་བོད་ནང་མི་རིགས་རྩ་མེད་ཀྱི་སྲིད་བྱུས་ལག་བསྟར་བྱེད་བཞིན་པའི་ད་ལྟའི་བོད་ནང་གི་ཛ་དྲག་གནས་སྟངས་འགྲེལ་བརྗོད་ངོ་སྤྲོད་དང་།  ཨ་རིའི་ནང་གི་བོད་པའི་གནས་སྟངས།  ད་རེས་ཨ་རིར་ཕེབས་དགོས་པའི་རྒྱུ་མཚན་ངོ་སྤྲོད་གནང་བ་མ་ཟད།    གྲོས་ཚོགས་གོང་མའི་འཐུས་མི་ (Peter Welch) ལགས་ཀྱིས་དུས་ཡུན་རིང་པོར་བོད་དང་བོད་མིར་རྒྱབ་སྐྱོར་གནང་བར་ཐུགས་རྗེ་ཆེ་ཞུས་ཡོད་པ་རེད།  ཁོང་རྣམས་ནས་ཀྱང་སྲིད་སྐྱོང་མཆོག་གི་ཞུ་སྐུལ་ལ་ཐུགས་སྣང་དང་འབྲེལ་བོད་ཀྱི་བདེན་དོན་འཐབ་རྩོད་ལ་མུ་མཐུད་རྒྱབ་སྐྱོར་གནང་རྒྱུའི་རྣམ་འགྱུར་གསལ་སྟོན་གནང་ཡོད་པ་རེད།  མཇལ་འཕྲད་གྲུབ་རྗེས་མ་འོངས་སོན་རྩ་ཡིན་པའི་བོད་རིགས་གཞོན་སྐྱེས་རྣམས་ཀྱི་བོད་དོན་ཤེས་བྱ་ཕུན་སུམ་ཚོགས་སུ་གཏོང་ཆེད་ས་གནས་སུ་ཡོད་པའི་བོད་རིགས་གཞོན་སྐྱེས་རྣམས་ལ་ཨིན་སྐད་ཐོག་ནས་བོད་ཀྱི་ལོ་རྒྱུས་གནས་བབ་དང་།  བོད་ཀྱི་ས་བབ་ཆགས་ཚུལ།  སྐྱེ་ཁམས་ཁོར་ཡུག་སོགས་ཨིན་སྐད་ཐོག་ནས་ངོ་སྤྲོད་གནང་། 

ཕྱི་དྲོ་ས་གནས་མང་ཚོགས་ནས་དཔལ་ལྡན་སྲིད་སྐྱོང་མཆོག་ལ་བོད་ལུགས་ཀྱི་ཕེབས་བསུའི་སྣེ་ལེན་དང་།  དཔལ་ལྡན་སྲིད་སྐྱོང་མཆོག་གིས་མང་ཚོགས་ལ་གསུང་བཤད་གནང་།  གསུང་བཤད་དབུ་འཛུགས་མ་གནང་གོང་ས་གནས་བོད་རིགས་སྤྱི་མཐུན་ཚོགས་པས་རིག་གཞུང་འཁྲབ་སྟོན་དང་།  སྤྱི་མཐུན་ཚོགས་པའི་ཚོགས་གཙོ་ཚེ་རིང་དབྱངས་སྐྱིད་ལགས་ནས་ས་གནས་ཀྱི་ལས་བསྡོམས་སྙིང་བསྡུས་སྙན་སེང་།  སྐུ་ཚབ་དོན་གཅོད་འབུམ་རམས་པ་རྣམ་རྒྱལ་ཆོས་གྲུབ་ལགས་ནས་འཚམས་འདྲིའི་གསུང་བཤད་གནང་རྗེས་དཔལ་ལྡན་སྲིད་སྐྱོང་མཆོག་གིས་གསུང་བཤད་གནང་།  དཔལ་ལྡན་སྲིད་སྐྱོང་མཆོག་གིས་གསུང་དོན།  དེ་རིང་ང་འདིར་སླེབས་སྐབས་དུས་ཚོད་ཐུང་ཐུང་ལས་གཏོང་ཐུབ་ཀྱི་མེད་ཀྱང་།  ས་གནས་བོད་རིགས་སྤྱི་མཐུན་ཚོགས་པས་གྲོས་ཚོགས་ཀྱི་འཐུས་མི་དང་།  གྲོང་ཁྱེར་སྤྱི་ཁྱབ་ལས་ཁུངས་ཀྱི་ལས་བྱེད་སོགས་ས་གནས་དཔོན་རིགས་ཐུག་འཕྲད་ཀྱི་མཛད་རིམ་བཟོ་རྒྱུས་མཚོན་གྲ་སྒྲིག་གནང་སྟངས་ནི།  ཐབ་ཆུང་ཆུང་མེ་ཚ་པོ་ནང་བཞིན་བྱུང་འདུག་པར་བསྔགས་བརྗོད་གནང་།   གཞན་ཡང་དཔལ་ལྡན་སྲིད་སྐྱོང་མཆོག་གིས།  དེ་རིང་ཨ་རིར་བཅར་དོན་གཙོ་བོ་གང་ཡིན་པའི་སྐོར་དང་།  བོད་མིའི་སྒྲིག་འཛུགས་ཀྱི་ལས་འགན་སྐོར།  བོད་ནང་ཆོས་དང་།  ཆབ་སྲིད།  སྐད་ཡིག་བཅས་གང་ཅིའི་ཐད་རྒྱ་ནག་གཞུང་གིས་བོད་མི་རིགས་རྩ་མེད་གཏོང་རྒྱུའི་སྲིད་བྱུས་ལག་བསྟར་བྱེད་བཞིན་ཡོད་པའི་ད་ལྟའི་བོད་ནང་གི་གནས་སྟངས་སྐོར་ངོ་སྤྲོད་གནང་།  རྒྱལ་ཁབ་མང་པོས་བོད་ཀྱི་གནད་དོན་ཐོག་ལ་འདས་པའི་ལོ་གཅིག་གཉིས་ནང་དོ་སྣང་ཆེན་པོ་བྱེད་ཀྱི་ཡོད་པ་ནི་༧གོང་ས་མཆོག་གི་ཐུགས་རྗེ་བྱིན་རླབས་ཡིན་པ།ད་ལྟའི་བཀའ་ཤག་གི་ཕྱག་ལས་གནང་སྟངས་བཅས་ལས་བསྡོམས་ཀྱི་ཚུལ་དུ་སྙན་སེང་ཞུས་རྗེས།  མང་ཚོགས་ཀྱི་དྲི་བ་ཁག་ལ་ལན་འདེབས་དང་གསལ་བཤད་གནང་། ཚེས་ ༡༣ ཉིན་སྦོ་སི་ཊོན་ཕེབས་འབྱོར་གྱིས་གོང་བཞིན་ས་གནས་མང་ཚོགས་ལ་བཀའ་སློབ་གསུང་བཤད་གནང་ཡོད་པ་མ་ཟད།  གཞོན་སྐྱེས་དང་ཡང་མཇལ་མོལ་གནང་ཡོད།   ས་གནས་བོད་རིགས་སྤྱི་མཐུན་ཚོགས་པའི་ཚོགས་ཁང་དུ་ཕེབས་འབྱོར་སྐབས་མང་ཚོགས་ནས་བོད་ལུགས་ཕེབས་བསུའི་སྣེ་ལེན་གནང་རྗེས།  བོད་རིགས་སྤྱི་མཐུན་ཚོགས་པའི་ཚོགས་གཙོ་ཡ་མ་ལགས་ནས་ས་གནས་ཀྱི་ལས་བསྡོམས་སྙིང་བསྡུས་སྙན་སེང་དང་།  སྐུ་ཚབ་དོན་གཅོད་མཆོག་ནས་འཚམས་འདྲིའི་གསུང་བཤད་གནང་།  དེ་ནས་སྲིད་སྐྱོང་མཆོག་གིས་གསུང་དོན།  འདས་པའི་ལོ་གཉིས་ནང་རྒྱལ་ཁབ་ ༢༤ ཙམ་ནང་གཞུང་འབྲེལ་འཚམས་གཟིགས་སུ་ཕེབས་སྐབས་ང་ཚོར་ཡོད་པའི་སྒྲིག་འཛུགས་ནང་བཞིན་བཙན་བྱོལ་བ་སུ་གཅིག་ལ་མེད་པ་དང་།  དེ་ནི་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་ཐུགས་རྗེ་བྱིན་རླབས་ལ་བརྟེན་ནས་བྱུང་བ་ཞིག་ཡིན་པའི་སྐོར།  ད་ལྟའི་བཀའ་ཤག་གི་ཕྱག་ལས་གནང་སྟངས།  བོད་མིའི་སྒྲིག་འཛུགས་ཀྱི་ལས་ཁུངས་ཁག་གི་སྒྲོམ་གཞི་སྲ་བརྟན་དུ་གཏོང་སྟངས།  དབུ་མའི་ལམ་གྱི་སྲིད་བྱུས་དང་ཐབས་ཇུས་སོགས་ཀྱི་སྐོར་གོང་བཞིན་བཀའ་སློབ་གནང་ཡོད།   དེ་ཉིན་དགོང་མོ་བོད་རིགས་སྤྱི་མཐུན་ཚོགས་པའི་དཔལ་འབྱོར་འདུ་འགོད་ཆེད་དགོང་དྲོའི་གསོལ་སྟོན་ཞིག་གྲ་སྒྲིག་གནང་བར་གདན་ཞུས་ལྟར་མཉམ་བཞུགས་གནང་།ཚེས་ ༡༤ ཞོགས་པ་ས་གནས་བོད་རིགས་གཞོན་སྐྱེས་རྣམས་ཀྱི་བོད་དོན་ཤེས་བྱ་ཕུན་སུམ་ཚོགས་སུ་གཏོང་ཆེད་ས་གནས་སུ་ཡོད་པའི་བོད་རིགས་གཞོན་སྐྱེས་རྣམས་ལ་བོད་ཀྱི་ལོ་རྒྱུས་གནས་བབ་དང་།  བོད་ཀྱི་ས་བབ་ཆགས་ཚུལ་སོགས་དབྱིན་སྐད་ཐོག་ནས་ངོ་སྤྲོད་དང་།  གཞོན་སྐྱེས་རྣམས་དྲི་བར་ལན་འདེབས་གྲུབ་རྗེས།  མཁའ་ལམ་བརྒྱུད་ཝ་ཤིང་ཊོན་སྒྲི་སི་རུ་ཕེབས་ཐོན་གནང་ནས་དེང་སྐབས་་སྒྲི་སི་རུ་ཨ་རིའི་ཕྱི་སྲིད་ལས་ཁུངས་དང་།  གྲོས་ཚོགས་ཀྱི་འཐུས་མི་སོགས་གནད་ཡོད་མི་སྣ་མཇལ་འཕྲད་ཀྱི་མཛད་རིམ་སྐྱོང་བཞིན་ཡོད་པ་རེད།།