༄༅། །ཕྱི་ལོ་ ༢༠༢༤ ཟླ་བ་ ༠༤ ཚེས་ ༠༥ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་ཁེ་ན་ཊའི་གྲོང་ཁྱེར་ཊོ་རོན་ཊོའི་གནམ་དུ་ཕེབས་འབྱོར་བྱུང་ཞིང་། སྐབས་དེར་ཁེ་ན་ཊ་གངས་ལྗོངས་ཆོས་ལྡན་གླིང་རིག་གཞུང་བསྟི་གནས་ཁང་གི་ཚོགས་གཙོ་རྒྱུན་ལས་དང་། ས་གནས་ཚོགས་སྐྱིད་ཁག་གི་སྐུ་ཚབ། མི་མང་བཅས་ནས་ཕེབས་བསུ་གཟབ་རྒྱས་ཞུས་ཡོད།
ཕྱི་ཚེས་ ༠༦ ཉིན་དཔལ་ལྡན་སྲིད་སྐྱོང་མཆོག་གིས་ཊོ་རོན་ཊོའི་གངས་ལྗོངས་ཆོས་ལྡན་གླིང་གི་ཚོགས་ཁང་དུ་ས་གནས་མི་མང་ལ་བོད་མིའི་སྒྲིག་འཛུགས་དང་། རྒྱལ་སྤྱིའི་སྟེང་གི་བོད་དོན་འཐབ་རྩོད་སོགས་ཀྱི་སྐོར་གསུང་བཤད་དང་། མི་མང་གི་དོགས་དྲིར་ལན་འདེབས་གསལ་བཤད་གནང་ཡོད།
དེ་ཡང་ཐོག་མར་ཁེ་ན་ཊ་བོད་རིགས་ཚོགས་པའི་ཚོགས་གཙོ་བསོད་ནམས་ལགས་ནས་ཚོགས་པའི་ལས་བསྡོམས་སྙན་སྒྲོན་དང་། བྱང་ཨ་རིའི་སྐུ་ཚབ་དོན་གཅོད་རྣམ་རྒྱལ་ཆོས་གྲུབ་ལགས་ནས་ཕེབས་བསུའི་གསུང་བཤད་གནང་རྗེས་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་གསུང་བཤད་གནང་ཡོད་ཅིང་། སྐབས་དེར་དཔལ་ལྡན་སྲིད་སྐྱོང་མཆོག་གིས་བོད་མི་རྣམས་བཙན་བྱོལ་དུ་གྱར་ཏེ་ལོ་ངོ་བཅུ་ཕྲག་དྲུག་ལྷག་འདས་ཟིན་ནའང་། བཙན་བྱོལ་བ་གཞན་དང་མི་འདྲ་བར་མང་གཙོའི་སྒྲིག་འཛུགས་ཆ་ལག་ཚང་བའི་ཐོག་ནས་འཐབ་རྩོད་ཀྱི་ལས་འགུལ་མུ་མཐུད་སྤེལ་བཞིན་ཡོད་པ་དེ་ནི་གཙོ་བོ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་རྗེ་བཀའ་དྲིན་བརྟེན་ནས་བྱུང་བ་ཡིན་ཞིང་། བོད་མི་རྣམས་ནས་༸རྒྱལ་བའི་བཀའ་དྲིན་ཤེས་པའི་ཐོག མགོན་པོ་མཆོག་གི་བཀའ་དགོངས་ཇི་བཞིན་རྟོགས་ཏེ་ལག་བསྟར་གནང་དགོས་པའི་ལམ་སྟོན་གནང་ཡོད།
དེ་བཞིན་ཁོང་གིས་སྤྱིར་མི་སྒེར་སོ་སོར་ཁམས་དང་མོས་པ་མི་འདྲ་བ་ཡོད་ནའང་། ད་ལྟའི་དུས་སྐབས་འདིར་བོད་མི་རྣམས་ནི་རང་དབང་འཐབ་རྩོད་བྱེད་མཁན་གྱི་མི་རིགས་ཤིག་ཡིན་སྟབས། བསམ་ཚུལ་མཐུན་མིན་ལ་མ་ལྟོས་པར་བོད་མི་ཚང་མ་མཐུན་ལམ་རྡོག་རྩ་ཆིག་སྒྲིལ་དགོས་རྒྱུ་དང་། ལྷག་པར་སོ་སོའི་ཁ་གཏད་ངོ་མ་སུ་ཡིན་ངོས་འཛིན་གྱིས་འཐབ་རྩོད་བྱ་དགོས་པ་ལས་བོད་མི་ནང་ཁུལ་གྱི་མཐུན་ལམ་ལ་གནོད་གཞིའི་ལས་དོན་བརྩམ་ན་རང་གི་རྐང་པར་རང་གིས་སྟ་རེ་གཞུས་པ་དང་གཅིག་མཚུངས་ཡིན་པས་དོ་གཟབ་གནང་རྒྱུ་གལ་ཆེན་པོ་ཡིན་པའི་ལམ་སྟོན་གནང་རྗེས། གཞུང་འབྲེལ་དབུ་མའི་ལམ་གྱི་སྲིད་བྱུས་ཀྱི་ངོ་བོ་དང་། འཕེལ་རིམ་ངོ་སྤྲོད་གནང་བའི་ཐོག བོད་རྒྱའི་དཀའ་རྙོག་སེལ་དགོས་ན་རྒྱ་གཞུང་ལྷན་དུ་གྲོས་མོལ་བརྒྱུད་སེལ་དགོས་པ་ཡིན་ནའང་། ད་ལྟའི་རྒྱ་ནག་གི་སྲིད་འཛིན་ཞི་ཅིན་ཕིང་གི་སྲིད་དབང་གཅིག་འདུས་ཀྱི་ལམ་ལུགས་འོག་བོད་ཐེ་བའི་རྒྱ་ནག་སྤྱི་ཡོངས་སུ་མི་སེར་ཐོག་དམ་བསྒྲགས་སྔར་ལྷག་གཏོང་བཞིན་པའི་ཁར། མི་རིགས་དང་རིག་གཞུང་བཙན་སྒྱུར་བྱེད་བབ་ལ་བལྟས་ན། ད་ལྟའི་ཆར་བོད་རྒྱའི་དཀའ་རྙོག་སེལ་རྒྱུའི་རེ་བ་ཆེན་པོ་མེད་པ་གསལ་བཤད་གནང་།
རྒྱལ་སྤྱིའི་སྟེང་བོད་དོན་ཞུ་གཏུག་གནང་ཕྱོགས་དང་འབྲེལ་ཏེ། དཔལ་ལྡན་སྲིད་སྐྱོང་མཆོག་གིས་རྒྱལ་སྤྱིའི་རྒྱལ་ཁབ་ཆེ་ཁག་དང་། བྱེ་བྲག་ཏུ་དེ་སྔོན་བོད་དང་འབྲེལ་མཐུད་མ་བྱུང་བའི་རྒྱལ་ཁབ་ཁག་ཏུ་ཆེད་ཕེབས་ཀྱིས་ཞུ་གཏུག་གོ་རྟོགས་སྤེལ་སྐབས་རྒྱ་ནག་གི་བྱེད་བབ་སྐོར་གོ་རྟོགས་ཧ་ཅང་ཞན་པོ་ཡོད་པ་དངོས་གཟིགས་ཀྱིས་རྒྱ་ནག་དང་ཚོང་འབྲེལ་བྱེད་སྐབས་དོ་གཟབ་དགོས་རྒྱུ། སླད་མར་རྒྱ་ནག་ཐོག་ཉམས་ཞིབ་བྱེད་མཁན་བསམ་མཛོད་བསྟི་གནས་ཁང་རིགས་གསར་འཛུགས་དགོས་པའི་ལམ་སྟོན་གནང་སྐོར་དང་། ད་ལྟའི་རྒྱལ་སྤྱིའི་སྟེང་རྒྱ་ནག་གིས་ཧམ་བཤད་བཙན་འཛུལ་བྱེད་སྟངས་ལ་བརྟེན་ནས་རྒྱལ་ཁབ་མང་པོས་རྒྱ་ནག་ལ་ལྟ་ཚུལ་བཟང་པོ་མེད་པས་བོད་དོན་སྐོར་དོ་སྣང་བྱེད་མཁན་ཇེ་མང་དུ་འགྲོ་བཞིན་ཡོད་སྟབས་བོད་མི་རྣམས་ནས་གོ་སྐབས་དམ་འཛིན་གནང་རྒྱུ་གལ་ཆེན་པོ་ཡིན་པ་གསུངས་ཡོད།
དེ་དང་འབྲེལ་ཁོང་གིས་ཉེ་ལམ་ཨ་རིའི་གྲོས་ཚོགས་འོག་མའི་ནང་བོད་རྒྱའི་དཀའ་རྙོག་སེལ་ཐབས་ཀྱི་ཁྲིམས་འཆར་ལ་ཚད་མཐོའི་མང་མོས་ཀྱིས་རྒྱབ་སྐྱོར་གཏན་འབེབས་གནང་སྟེ། ཁྲིམས་འཆར་འདི་ཨ་རིའི་གྲོས་ཚོགས་གོང་མའི་ཕྱི་འབྲེལ་ལས་དོན་ཚོགས་ཆུང་དང་གྲོས་ཚོགས་གོང་མའི་ནང་གཏན་འབེབས་ཐུབ་སླད་ཐེངས་འདིར་བྱང་ཨ་རིར་གཞུང་འབྲེལ་ཕྱོགས་ཕེབས་གནང་རྒྱུ་ཡིན་པ་གསུངས་ཡོད།
གཞན་ཡང་དཔལ་ལྡན་སྲིད་སྐྱོང་མཆོག་གིས་ཁ་སང་རེས་གཟའ་ཉི་མའི་ཉིན། ཊོ་རོན་ཊོ་གངས་ལྗོངས་བོད་ཀྱི་སྐད་ཡིག་དང་རིག་གཞུང་སློབ་གྲྭའི་དགེ་སློབ་རྣམས་དང་མཇལ་འཕྲད་དང་། དེ་བཞིན་ཊོ་རོན་ཊོར་གནས་སྡོད་བོད་རིགས་གཞོན་སྐྱེས་རྣམས་དང་ལྷན་ཟུར་དུ་ཐུག་འཕྲད་ཀྱིས། བོད་མཐོ་སྒང་གི་ས་ཁམས་ཆབ་སྲིད་ཀྱི་གལ་གནད་དང་། འཛམ་གླིང་གི་སྣེ་གསུམ་པར་གྲགས་པའི་བོད་མཐོ་སྒང་གི་ཁོར་ཡུག་གི་གལ་གནད། བོད་ཀྱི་རང་བྱུང་ཁོར་ཡུག་དང་རྒྱུག་ཆུ་སོགས་ལྷོ་ཨེ་ཤི་ཡའི་རྒྱལ་ཁབ་མང་པོའི་འཚོ་རྟེན་ཆགས་ཡོད་པ་སོགས་ཀྱི་སྐོར་འགྲེལ་བརྗོད་གནང་ཡོད་པ་རེད།
དེ་རྗེས་དཔལ་ལྡན་སྲིད་སྐྱོང་མཆོག་ནས་མུ་མཐུད་ཕྱི་ཚེས་ ༡༡ བར་ཁེ་ན་ཌའི་གྲོང་ཁྱེར་ཊོ་རོན་ཊོ་དང་མོན་ཀྲེལ་ཁུལ་དུ་རང་རིགས་མང་ཚོགས་སོགས་ཐུག་འཕྲད་གནང་རྒྱུ་དང་། དེ་རྗེས་ཨ་རིར་ཕྱོགས་ཕེབས་གནང་གི་ཡོད་ཡོད་ལ། ཕྱོགས་ཕེབས་སྐབས་དཔལ་ལྡན་སྲིད་སྐྱོང་ལྷན་དུ་བྱང་ཨ་རིའི་སྐུ་ཚབ་དོན་གཅོད་རྣམ་རྒྱལ་ཆོས་གྲུབ་ལགས་ལྷན་བཅར་ཞུ་བཞིན་ཡོད་པ་བཅས།། 
