༄༅། །འདི་གར་ཐའེ་ཝན་སྐུ་ཚབ་དོན་ཁང་ནས་བཏང་གནས་ནང་འཁོད་དོན། ཕྱི་ལོ་ ༢༠༢༤ ཟླ་ ༤ ཚེས་ ༢༧ དང་ ༢༨ ཉིན་གཉིས་རིང་འདི་ག་ཐའེ་ཝན་དབྱེ་ལེན་རྫོང་དུ་རྟེན་གཞི་བྱས་པའི་རྒྱ་བརྒྱུད་རྨ་བྱ་རྒྱལ་པོའི་དགོན་པ་དབུ་འབྱེད་ཀྱི་མཛད་སྒོ་དང་། དེ་བཞིན་རྒྱལ་ས་ཐའེ་པེར་སྐྱབས་རྗེ་བཟོད་པ་རིན་པོ་ཆེ་དགོངས་པ་ཆོས་དབྱིངས་སུ་ཐིམ་ཚུལ་བསྟན་ཏེ་ལོ་གཅིག་འཁོར་བའི་མྱ་ངན་རྗེས་དྲན་ཆེ་མོ། དཔལ་ས་སྐྱའི་མཁན་ཆེན་ཀུན་དགའ་དབང་ཕྱུག་རིན་པོ་ཆེ་དགོངས་པ་ཆོས་དབྱིངས་སུ་ཐིམ་ཚུལ་བསྟན་ཏེ་ལོ་ ༡༦ འཁོར་བའི་རྗེས་དྲན་མཆོད་འབུལ་སྨོན་ལམ་འཚོགས་པ་བཅས་ལ་མགྲོན་ཤོག་ཕེབས་པ་ལྟར། སྐུ་ཚབ་དོན་གཅོད་འབའ་བ་སྐལ་བཟང་རྒྱལ་མཚན་ལགས་མཉམ་ཞུགས་ཞུས་ཡོད།
དེ་ཡང་དབྱེ་ལེན་རྫོང་དུ་རྟེན་གཞི་བྱས་པའི་རྨ་བྱ་རྒྱལ་པོ་དགོན་པའི་དབུ་འབྱེད་མཛད་སྒོ་ཕྱི་ཚེས་ ༢༧ སྔ་དྲོ་ཆུ་ཚོད་དགུ་པའི་ཐོག་གནང་ཡོད་ཅིང་། སྐུ་ཚབ་དོན་གཅོད་དང་། དོན་ཁང་གི་ལྟ་གྲུབ་སློབ་དཔོན་བསྟན་འཛིན་རྣམ་གྲོལ་རིན་པོ་ཆེ། ཐའེ་ཝན་རྒྱལ་སྤྱིའི་བོད་བརྒྱུད་ནང་བསྟན་མཐུན་ཚོགས་དབུ་འབྱེད་ཚོགས་གཙོ་དང་དོན་ཁང་གི་སློབ་སྟོན་པ་སྐུ་ཞབས་ཀྲུང་ཀྲི་ལགས། རྒྱལ་སྤྱིའི་བོད་བརྒྱུད་ནང་བསྟན་མཐུན་ཚོགས་ཀྱི་ཚོགས་གཙོ་སྐུ་ཞབས་ཧུའུ་མའོ་ཧྭ་ལགས་བཅས་རྒྱ་བརྒྱུད་དང་བོད་བརྒྱུད། ལྷོ་བརྒྱུད་གསུམ་གྱི་དགེ་འདུན་པ། དད་ལྡན་མང་ཚོགས་བཅས་ ༢༠༠༠ ལྷག་མཛད་སྒོར་མཉམ་ཞུགས་ཞུས་ཡོད།
དགོན་པའི་ཕྱོགས་ནས་རེ་འདུན་བཏོན་པ་ལྟར། སྐུ་ཚབ་དོན་གཅོད་ནས་ཆོས་ལུགས་དང་ཆོས་བརྒྱུད་ཕན་ཚུན་མཐུན་སྒྲིལ་བྱས་ཏེ་ཞི་བདེའི་སྤྱི་ཚོགས་ཤིག་སྐྲུན་དགོས་པ་ནི་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་ཐུགས་ཀྱི་བཞེད་དགོངས་གལ་ཆེན་ཞིག་ཡིན་ཅིང་། དེ་རིང་དགོན་པ་འདིའི་མཁན་པོ་ཚེ་རྗེ་ལགས་ནས་རྒྱ་བརྒྱུད་ཙམ་མ་ཟད། བོད་བརྒྱུད་དང་ལྷོ་བརྒྱུད་ལའང་སློབ་སྦྱོང་དང་དངོས་སུ་ཉམས་ལེན་བྱས་ཏེ་མགོན་པོ་གང་གི་དགོངས་པ་དངོས་སུ་སྒྲུབ་པའི་མཛད་སྒོར་བཅར་ཐུབ་པར་དགའ་པོ་ཞེ་དྲགས་བྱུང་། དེར་བརྟེན་དགོན་པའི་མཁན་རིན་པོ་ཆེ་དང་ལས་ཀྱི་སྣེ་མོ་བ་ཡོངས་ལ་འཚམས་འདྲིའི་བཀྲ་ཤིས་བདེ་ལེགས་ཞུས་པ་དང་ཆབས་ཅིག མ་འོངས་པར་དགོན་པ་འདི་ཆོས་བརྒྱུད་འདྲ་མིན་ཕན་ཚུན་སློབ་སྦྱོང་དང་། ཉམས་མྱོང་སྤེལ་རེས་བྱེད་སའི་བསྟི་གནས་ཤིག་ཏུ་འགྱུར་བའི་རེ་བ་དང་། དེའི་ཐོག་དོན་གཅོད་ལས་ཁུངས་ནས་མཐུན་འགྱུར་གང་དགོས་ན་སྦྱར་གྱི་ཡིན་ཞེས་གསུང་བཤད་གནང་། 
དབུ་འབྱེད་མཛད་སྒོ་དེ་བཞིན་རྒྱ་བརྒྱུད་ཀྱི་ལུགས་དང་། བོད་བརྒྱུད་ཀྱི་འདོན་པ། འཆམ་རྒྱག་པ་སོགས་མཉམ་བསྲེས་བྱས་ཏེ་སྤེལ་ཡོད་ཅིང་། དགོན་པའི་མཁན་པོ་ཚེ་རྗེ་རིན་པོ་ཆེ་ནམ་རྒྱུན་རྡ་སར་བཅར་ཏེ་སྐྱབས་མགོན་རིན་པོ་ཆེའི་གསུང་ཆོས་ཞུ་བཞིན་པ་མ་ཟད། དགོན་སྡེ་ཁག་དང་རྒྱུད་སྒྲ་སྟོད་སྨད་བཅས་ཀྱི་སྔགས་ལུགས་སྐོར་ལའང་གང་ཐུབ་སློབ་སྦྱོང་བྱེད་བཞིན་ཡོད་སྟབས། མཛད་སྒོར་ཁྱོན་བོད་བརྒྱུད་ཆོས་བརྒྱུད་ཁག་གི་དགེ་འདུན་པ་ ༥༠ ཙམ་མཉམ་ཞུགས་གནང་ཡོད།
ཕྱི་ཚེས་ ༢༧ ཉིན་རྒྱབ་ཆུ་ཚོད་གཉིས་པའི་ཐོག་རྒྱལ་ས་ཐའེ་པེར་སྐྱབས་རྗེ་བཟོད་པ་རིན་པོ་ཆེའི་སློབ་མ་དང་དད་ལྡན་རྗེས་འཇུག་པ་བརྒྱ་ཕྲག་མང་པོ་འཛོམས་ཏེ། རིན་པོ་ཆེ་དགོངས་པ་ཆོས་དབྱིངས་སུ་བཞེས་ཚུལ་བསྟན་ཏེ་ལོ་གཅིག་འཁོར་བའི་མྱ་ངན་རྗེས་དྲན་ཆེན་པོ་ཞིག་ཚོགས་ཡོད་པ་དང་། མྱ་ངན་རྗེས་དྲན་གྱི་ཚོགས་ཆེན་དེར་སྐུ་ཚབ་དོན་གཅོད་དང་། ལྟ་གྲུབ་སློབ་དཔོན་སོགས་གདན་འདྲེན་ལྟར་མཉམ་ཞུགས་ཞུས་པ་དང་། སློབ་མ་ཚོས་རིན་པོ་ཆེ་མཆོག་གི་མི་ཚེའི་མཛད་པ་སེམས་འགུལ་ཐེབས་པ་ངོ་སྤྲོད་ཞུས་པ་མ་ཟད། སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་དང་། ཡོངས་འཛིན་གླིང་རིན་པོ་ཆེ། འོད་ཟེར་རིན་པོ་ཆེ་བཅས་ནས་ཀྱང་བརྙན་ཐུང་བརྒྱུད་སློབ་མ་ཚོར་གསུང་བཤད་གནང་ཡོད་པ་རེད།
ཕྱི་ཚེས་ ༢༨ ཉིན་གྱི་སྔ་དྲོ་ཆུ་ཚོད་ ༡༠ པའི་ཐོག་ཐའེ་ཝན་དུ་རྟེན་གཞི་བྱས་པའི་ས་སྐྱའི་ཆོས་ཚོགས་དང་། ཐའེ་ཝན་དུ་ཡོད་པའི་རྫོང་ས་བཤད་གྲྭའི་དགེ་འདུན་པ་རྣམས་ནས་རྫོང་གསར་མཁན་ཆེན་ཀུན་དགའ་དབང་ཕྱུག་རིན་པོ་ཆེ་མཆོག་དགོངས་པ་ཆོས་དབྱིངས་སུ་བཞེས་ཚུལ་བསྟན་ཏེ་ལོ་ ༡༦ འཁོར་བའི་རྗེས་དྲན་སྨོན་ལམ་དང་རིང་བསྲེས་མཇལ་རྒྱུའི་མཛད་སྒོ་ཞིག་ཉིན་འཁྱོངས་འཚོགས་ཡོད་ཅིང་། སྐུ་ཚབ་དོན་གཅོད་འབའ་བ་སྐལ་བཟང་རྒྱལ་མཚན་ལགས་རྗེས་དྲན་སྨོན་ལམ་ལ་བཅར་ཏེ་མཁན་ཆེན་མཆོག་གི་སྐུ་པར་མཐོང་གྲོལ་རིན་པོ་ཆེར་མཇལ་དར་ཕུལ་བ་དང་། མཛད་སྒོའི་ཐོག་མཁན་ཆེན་མཆོག་གི་དངོས་སློབ་ལྕམ་ཧུའང་རུས་རུབ་ལགས་ནས་རིན་པོ་ཆེ་མཆོག་གི་སྐུའི་མཛད་པ་འཕྲིན་ལས་དང་། དད་ལྡན་ཐའེ་ཝན་སྦྱིན་བདག་གཙོ་བོ་ཚོ་རིན་པོ་ཆེ་དང་འབྲེལ་བ་བྱུང་ཚུལ་ངོ་མཚར་ཅན་གྱི་སྒྲུང་གཏམ་ངོ་སྤྲོད་ཞུས་པ་དང་། རིན་པོ་ཆེ་མཆོག་གི་དངོས་སློབ་དང་ཐའེ་ཝན་དུ་གདན་འདྲེན་དང་པོ་ཞུ་མཁན་རྗེ་བཙུན་མ་ནས་སྐུ་ཚབ་དོན་གཅོད་ལ་རིན་པོ་ཆེའི་རིང་བསྲེས་སྤྱན་འབུལ་ཞུས་ཡོད་པ་བཅས།།
