༄༅། །འདི་གར་ཨོསྟྲེ་ལི་ཡཱའི་སྐུ་ཚབ་དོན་གཅོད་ནས་བཏང་གནས་ནང་འཁོད་དོན། ཕྱི་ལོ་ ༢༠༢༤ ཟླ་ ༤ ཚེས་ ༢༥ ཉིན་ཨོསྟྲེ་ལི་ཡཱའི་སིཌ་ཎི་ནུབ་ཕྱོགས་ཁེམ་བྷེལ་ཊོན་བོད་རིགས་མང་ཚོགས་ཀྱི་གོ་སྒྲིག་འོག་ཁུལ་དེའི་བོད་ཕྲུག་རྣམས་ལ་བོད་ཀྱི་སྐད་ཡིག་དང་། རིག་གནས་བཅས་སློབ་ཁྲིད་ཆེད་གཟའ་མཇུག་བོད་ཡིག་འཛིན་གྲྭ་ཞིག་དངོས་སུ་ (Campbelltown Public School) ནང་གསར་འཛུགས་གནང་བའི་རྟེན་འབྲེལ་གྱི་དབུ་འབྱེད་མཛད་སྒོའི་སྐུ་མགྲོན་གཙོ་བོར་ཨོ་གླིང་སྐུ་ཚབ་དོན་གཅོད་ཀརྨ་སེང་གེ་ལགས་མགྲོན་འབོད་གནང་བ་ལྟར་ཆེད་ཕེབས་གནང་ཡོད།

དེ་ཡང་མཛད་སྒོ་དབུ་འཛུགས་ཀྱི་ཐོག་མར་སྐུ་ཚབ་དོན་གཅོད་ནས་སྣང་གསལ་ཞལ་ཕྱེ་གནང་རྗེས་སྐུ་མགྲོན་རྣམ་པ་དང་། དགེ་ལས། ཕ་མ་རྣམས་ནས་༸རྒྱལ་བའི་སྐུ་པར་མཐོང་གྲོལ་རིན་པོར་མཇལ་དར་སྒྲོན་འབུལ་ཞུས་། དེ་རྗེས་བོད་རྒྱལ་ཁབ་དང་་ཨོསྟྲེ་ལི་ཡཱའི་རྒྱལ་གླུ་བཏང་རྗེས་བོད་རྒྱལ་ཁབ་དང་མི་རིགས་ཆེད་སྐུ་སྲོག་བློས་གཏོང་མཁན་གྱི་རྒྱལ་གཅེས་དཔའ་བོ་དཔའ་བོ་རྣམས་དང། ད་ལྟ་བཙོན་འོག་ཏུ་དཀའ་སྡུག་མྱོང་བཞིན་པའི་རྒྱལ་གཅེས་དཔའ་བོ་དཔའ་མོ་ཡོངས་ལ་གདུང་སེམས་མཉམ་བསྐྱེད་མཚོན་ཕྱིར་མྱ་ངན་གུས་འདུད་དུས་ཡུན་སྐར་མ་གཅིག་རིང་ཞུས།དེ་ནས་སྐྱབས་གནས་དགེ་འདུན་པ་རྣམས་དང་མང་ཚོགས་བཅས་ནས་༸རྒྱལ་བའི་ཞབས་བརྟེན་གསོལ་འདེབས་དང་། བོད་རྒྱལ་ཁབ་དང་མི་རིགས་ཆེད་སྐུ་སྲོག་བློས་གཏོང་མཁན་གྱི་རྒྱལ་གཅེས་དཔའ་བོ་དཔའ་བོ་རྣམས་ཀྱི་ཆེད་དུ་རྗེས་དྲན་སྨོན་ལམ་གསུང་འདོན་གནང་གྲུབ་རྗེས་གསོལ་ཇ་དང་འབྲས་སིལ་འདེགས་འབུལ་ཞུས། དེ་རྗེས་ཁེམ་བྷེལ་ཊོན་བོད་རིགས་མང་ཚོགས་ཀྱི་ཚོགས་གཙོ་ཚེས་བཅུ་ལྷ་མོ་ལགས་དང་རིག་གཞུང་འགན་འཛིན་གཅིག་ལྕོགས་ཡེ་ཤེས་ཚེ་རིང་ལགས་ནས་སློབ་གྲྭའི་ངོ་སྤྲོད་གསུང་བཤད་གནང་རྗེས་སྐུ་ཚབ་དོན་གཅོད་ཀརྨ་སེང་གེ་ལགས་ནས་གཟའ་མཇུག་སློབ་གྲྭའི་དགེ་རྒན་དང་། ཕ་མ། ཕྲུ་གུ་བཅས་ལ་འཚམས་འདྲི་དང་འབྲེལ་ཕྱི་རྒྱལ་རང་དབང་ལུང་པའི་ནང་གནས་སྡོད་བྱེད་བཞིན་པའི་བོད་པའི་མི་རབས་གསར་པ་ཚོས་བོད་མི་རིགས་ཀྱི་ཐུན་མོང་མ་ཡིན་པའི་ཆོས་དང་། རིག་གཞུང་། སྐད་ཡིག བོད་མིའི་གོམས་གཤིས་ཡ་རབས་སྤྱོད་བཟང་བཅས་མི་ཉམས་རྒྱུན་འཛིན་དང་སྲུང་སྐྱོབ་བྱེད་རྒྱུ་གལ་འགངས་ཤིན་ཏུ་ཆེན་པོ་ཡིན་པས།  ས་གནས་ཀྱི་བོད་རིགས་མང་ཚོགས་སྤྱི་དང་། ལྷག་པར་འབྲེལ་ཆགས་དོ་བདག་ཕ་མ་སོ་སོའི་ངོས་ནས་རང་ཉིད་ཀྱི་ཕྲུག་གུར་བོད་ཀྱི་སྐད་ཡིག་དང། བོད་མིའི་གོམས་གཤིས་ཡ་རབས་བཟང་སྤྱོད་སློབ་འཁྲིད་བྱ་རྒྱུར་འགན་ཁུར་དམིགས་བསལ་གནང་དགོས་པའི་སྐོར་དང་།

དེ་བཞིན་ས་གནས་ཀྱི་འགོ་མང་ཡོངས་ནས་གཙོ་བོ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་དགོངས་སྤང་བླང་མ་འཇོལ་བའི་ཐོག་བོད་བསྟན་སྲིད་སྤྱི་དང་།   ལྷག་པར་བོད་མི་རིགས་ཆགས་འཇིག་ཀྱི་དུས་སྐབས་འདིར་བོད་མི་ནང་ཁུལ་སྔར་ལྷག་མཐུན་སྒྲིལ་རྡོག་རྩ་ཚིག་སྒྲིལ་དང་མཛའ་མཐུན་མཉམ་གནས་དགོས་རྒྱུ་གལ་ཆེ་ཡིན་པ་བཅས་ལམ་སྟོན་ཞིབ་རྒྱས་གནང་། དེ་རྗེས་དམིགས་བསལ་སྐུ་མགྲོན་གདུང་རྒྱུད་སྤྲུལ་སྐུ་རིན་པོ་ཆེ་མཆོག་ནས་མང་ཚོགས་ལ་བླང་དོར་བཀའ་སློབ་གནང་གྲུབ་གྲུབ་རྗེས་དང་བླངས་དགེ་ལས་རྣམས་ལ་ཐུགས་རྗེ་ལེགས་འབུལ་མཚོན་བྱེད་མཇལ་དར་སྒྲོན་ཏེ་མཛད་སྒོ་ལེགས་གྲུབ་ངང་གྲོལ། །