༄༅། །འདི་གར་བྱང་ཨ་རིའི་སྐུ་ཚབ་དོན་ཁང་ནས་བཏང་གནས་ནང་འཁོད་དོན། ཀེ་ཎ་ཌ་ཨོན་ཏེ་རི་ཡོ་ (Ontario) བོད་རིགས་སྤྱི་མཐུན་ཚོགས་པ་ (གངས་ལྗོངས་ཆོས་ལྡན་གླིང་།) དང་།  བྱང་ཨ་རི་སྐུ་ཚབ་དོན་གཅོད་ལས་ཁུངས།  ཨེ་མོ་རི་མཐོ་སློབ་བཅས་ཐུན་མོང་གིས་ཕྱི་ལོ་ ༢༠༢༤ ཟླ་བ་ ༤ ཚེས་ ༢༦ ནས་ ༢༨ བར་ཨ་རིའི་ཤར་ཕྱོགས་ས་ཁུལ་གྱི་གཟའ་མཇུག་སློབ་གྲྭའི་དགེ་རྒན་དང་ལས་བྱེད་རྣམས་ཀྱི་ཆེད་དུ་སྤྱི་སེམས་བཟང་གསུམ་གྱི་ཤེས་ཡོན་སློབ་གསོའི་ (SEE Lerning ) ཟབ་སྦྱོང་ཞིག་གོ་སྒྲིག་ཞུ་གི་ཡོད།

ཐེངས་འདིའི་ཟབ་སྦྱོང་ནི།  ཕྱི་ལོ་ ༢༠༢༣ ལོར་ཀྲོ་རོན་ཊོར་བསྐོང་ཚོགས་བྱས་པའི་བོད་རིགས་སྤྱི་མཐུན་ཚོགས་པའི་ཚོགས་ཆེན་ཐེངས་ ༢༡ པའི་གྲོས་ཆོད་དགོངས་དོན་ལྟར་གྲ་སྒྲིག་བྱས་པ་ཞིག་ཡིན་ཞིང་།  ཟབ་སྦྱོང་ཚུགས་ཡུལ་གངས་ལྗོངས་ཆོས་ལྡན་གླིང་དུ་ཡིན།

ཟབ་སྦྱོང་སྐབས་སློབ་ཁྲིད་གནང་མཁན་ཕུལ་བྱུང་ཆེད་ལས་མི་སྣ་གསུམ་གདན་འདྲེན་ཞུས་ཡོད་པ་ནི།  ཨེ་མོ་རི་གཙུག་ལག་སློབ་གཉེར་ཁང་གི་སློབ་དཔོན་དགེ་བཤེས་བློ་བསྟན་འཛིན་ནལ་གྷེ་ལགས་དང་། སྤྱི་སེམས་བཟང་གསུམ་གྱི་ཤེས་ཡོན་སློབ་གསོའི་འགན་འཛིན་ལས་རོགས་བརྩོན་འགྲུས་བསམ་འཕེལ་ལགས། ཚན་རིག་ཉམས་ཞིབ་པ་བསྟན་འཛིན་བསོད་ནམས་ལགས་ཡིན། 

ཉིན་གྲངས་གསུམ་གྱི་ཟབ་སྦྱོང་ལ་ཨ་རིའི་ཤར་ཕྱོགས་ས་ཁུལ་དང་ཐག་ཉེ་ཡིན་པའི་གཟའ་མཇུག་སློབ་གྲྭའི་དགེ་རྒན་ལས་བྱེད་དང་ཕ་མ་བཅས་ཁྱོན་མི་གྲངས་ ༣༠ ལྷག་ཙམ་ནས་དེབ་སྐྱེལ་ཐོ་འགོད་ཀྱིས་མཉམ་ཞུགས་གནང་གི་ཡོད།  ཚེས་ ༢༦ ཉིན་གྱི་སྔ་དྲོ་ཆུ་ཚོད་བརྒྱད་དང་ཕྱེད་ཀ་ནས་དགུ་པ་བར་དབུ་འབྱེད་མཛད་སྒོ་ཡིན་པ་དང་།  དེ་ཉིན་དགོང་མོ་ཆུ་ཚོད་ ༦ དང་ཕྱེད་ཀ་ནས་ ༨ དང་ཕྱེད་ཀ་བར་ས་གནས་མང་ཚོགས་ལ་སཱི་ཤེས་ཡོན་སློབ་གསོའི་བྱུང་རིམ་དང་།  ད་ལྟའི་གནས་སྟངས་ངོ་སྤྲོད་ཞུ་རྒྱུ་དང་འབྲེལ།  དྲི་བ་ཁག་ལ་ལན་འདེབས་གནང་རྒྱུའི་ལས་རིམ་ཞིག་བང་སྒྲིག་ཡོད།

སྤྱི་སེམས་བཟང་གསུམ་གྱི་ཤེས་ཡོན་སློབ་གསོ་ནི།  འཛམ་གླིང་སྐྱེ་རྒུ་ཀུན་ལ་སྨན་པའི་༧གོང་ས་མཆོག་གི་རླབས་ཆེན་དགོངས་གཞི་ལས་བྱུང་ཞིང་།  གཟའ་མཇུག་སློབ་གྲྭའི་དགེ་རྒན་དང་ལས་བྱེད་ཙམ་མ་ཡིན་པར།  བོད་མི་ཚང་མས་དོ་སྣང་དགོས་པ་ཞིག་ཡིན་སྟབས།  ཉིན་གསུམ་གྱི་ཟབ་སྦྱོང་ཆ་ཚང་ Youtube དྲྭ་ཐག་འདི་བརྒྱུད་སྔ་དྲོ་ཕྱག་ཚོད་ ༨ དང་ཕྱེད་ཀ་ནས་ཐད་གཏོང་ཞུ་གི་ཡོད།    

གཟའ་མཇུག་སློབ་གྲྭའི་དགེ་རྒན་དང་ལས་བྱེད་རྣམས་ཀྱིས་ཐུགས་སྣང་ཆེན་པོས་ཐེངས་འདིའི་ཟབ་སྦྱོང་ལ་མཉམ་ཞུགས་གནང་བ་དང་།  ཀེ་ཎ་ཌ་ཨོན་ཏེ་རི་ཡོ་(Ontario)བོད་རིགས་སྤྱི་མཐུན་ཚོགས་པས་གྲ་སྒྲིག་གི་འགན་ཁུར་གཙོ་བོ་གནང་བ། བོད་ཀྱི་ཐེབས་རྩས་དཔལ་འབྱོར་གྱི་མཐུན་རྐྱེན་སྦྱོར་བ་བཅས་ལ་སྐུ་ཚབ་དོན་གཅོད་ལས་ཁུངས་ནས་གོ་སྐབས་འདི་བརྒྱུད་ཐུགས་རྗེ་ཆེ་ཞུ་རྒྱུ་ཡིན།  

ཟབ་སྦྱོང་འདི་དང་འབྲེལ་བའི་ཐོག་བཀའ་འདྲི་གནང་དགོས་བྱུང་ཚེ།  ཀེ་ཎ་ཌ་ཨོན་ཏེ་རི་ཡོ་(Ontario)བོད་རིགས་སྤྱི་མཐུན་ཚོགས་པ་དང་གངས་ལྗོངས་ཆོས་ལྡན་གླིང་གི་ཚོགས་གཙོ་བསོད་ནམས་གླང་དཀར་(༤༡༦ ༦༧༠ ༨༡༨༧)ལགས་སུ་འབྲེལ་བ་གནང་རོགས་ཞུ་རྒྱུ་ཡིན།  བྱང་ཨ་རི་སྐུ་ཚབ་དོན་གཅོད་ལས་ཁུངས་ནས་ཕྱི་ལོ་ ༢༠༢༤ ཟླ་བ་ ༤ ཚེས ༢༥ ཉིན་ཕུལ།།      །།