༄༅། །ཕྱི་ལོ་ ༢༠༢༤ ཟླ་བ་ ༠༤ ཚེས་ ༢༥ ཉིན་ཀུན་གཟིགས་པཎ་ཆེན་སྐུ་ཕྲེང་བཅུ་གཅིག་པ་བསྟན་འཛིན་དགེ་འདུན་ཡེ་ཤེས་འཕྲིན་ལས་མཆོག་གི་སྐུའི་འཁྲུངས་སྐར་དང་སྟབས་བསྟུན་ནས་གཞུང་འབྲེལ་སྐུ་མགྲོན་ཨི་སི་ཏོ་ནི་ཡའི་གྲོས་ཚོགས་ཀྱི་འཐུས་མི་དང་བོད་དོན་རྒྱབ་སྐྱོར་བ་རྣམས་ནས་གསར་འགོད་གསལ་བསྒྲགས་ཤིག་སྤེལ་ཡོད་པ་རེད།
དེ་ཡང་སྐབས་དེར་ཨི་སི་ཏོ་ན་ཡའི་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་ཇུ་ཀོ་ཀེ་ལི་ (Juko Kalle Raid) མཆོག་གིས་འཚམས་འདྲི་དང་འབྲེལ་གསུང་དོན། དེ་རིང་གི་གསར་འགོད་གསལ་བསྒྲགས་འདི་ནི་ཨི་སི་ཏོ་ཡའི་རྒྱལ་ཁབ་དང་མི་རིགས་ཆེད་དུ་གལ་གནད་ཆེན་པོ་ཞིག་ཆགས་ཀྱི་ཡོད། གང་ཡིན་ཟེར་ན། ངས་དེ་སྔོན་གཏམ་བཤད་ནང་ཞུས་པ་ལྟར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཨི་སི་ཏོ་ནི་ཡར་ཐེངས་གསུམ་ཆིབས་བསྒྱུར་བསྐྱངས་ཡོད་པ་དང་། ཁོང་ཆིབས་བསྒྱུར་བསྐྱངས་སྐབས་ང་ཚོའི་རྒྱལ་སའི་ཞི་མདོར་མི་མང་གིས་ཁེངས་ཀྱི་ཡོད། ཨི་སི་ཏོ་ནི་ཡའི་མི་མང་ཚོར་བོད་དང་འབྲེལ་བ་ཤུགས་ཆེན་པོ་ཡོད་པའི་ཚོར་བ་ཡོད། འདི་ལྟ་བུའི་ཚོར་བ་དེ་རྒྱུན་ལྡན་རེད་བསམ་གྱི་ཡོད། བོད་དང་ཨི་སི་ཏོ་ནི་ཡའི་རྒྱལ་ཁབ་གཉིས་རྒྱལ་ཁབ་གཞན་གྱིས་བཙན་བཟུང་བྱས་ཡོད་པ་གཅིག་མཚུངས་ཡིན།
ད་ལྟ་ང་ཚོ་དུས་ཚོད་དཀའ་ངལ་འོག་སྡོད་བཞིན་ཡོད་ནའང་། ང་ཚོས་གོམ་པ་མདུན་བསྐྱོད་མ་གཏོགས་ཕྱིར་འཐེན་ནམ་ཡང་བྱ་རྒྱུ་མེད། རྒྱ་ནག་གིས་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པ་དང་། བཙན་ཤེད་ཀྱིས་བཙན་ཁྲིད་བྱས་པ་རྣམས་ལུགས་མཐུན་གྱི་བྱ་སྤྱོད་གང་ཡང་མིན།
དེ་རིང་ང་ཚོ་འདི་གར་མགྲོན་འབོད་གནང་བར་ཐུགས་རྗེ་ཆེ་ཞུ་རྒྱུ་ཡིན། གང་ཡིན་ཟེར་ན་སྡིངས་ཆ་འདིས་རྒྱུད་ང་ཚོའི་འབོད་སྒྲ་འདིར་ཐོས་ཀྱི་ཡོད་པ་དང་། ཁྱེད་ཚོའི་འབོད་སྒྲ་རྣམས་ཡུ་རོབ་ཀྱི་རྒྱལ་ཁབ་ནང་སྔར་ལས་ལྷག་ཐོས་རྒྱུ་ཡིན་པ་མ་ཟད། ངའི་རེ་བ་ལ་མ་འོངས་པར་ཡུ་རོབ་ཀྱི་རྒྱལ་ཁབ་ནང་བོད་གཙོས་པའི་བོད་མིའི་སྒྲིག་འཛུགས་ལ་ངོས་འཛིན་དང་སྦྲགས། བོད་དེ་ཐུན་མོང་མ་ཡིན་པའི་སྐད་ཡིག་དང་རིག་གཞུང་ཡོད་པའི་རང་བཙན་རྒྱལ་ཁབ་ཅིག་ཡིན་པ་ངོས་འཛིན་ཐུབ་པ་ཞིག་ཡོང་རྒྱུ་རེད། དེར་རྒྱ་ནག་གིས་ཐེ་བྱུས་བྱ་རྒྱུ་གང་ཡང་མེད། ཨི་སི་ཏོ་ནི་ཡ་དང་བོད་གཉིས་རྒྱལ་ཁབ་ཆུང་ཆུང་ཡིན་པས་ཕན་ཚུན་ཡིད་ཆེས་དགོས་རྒྱུ་གལ་ཆེན་པོ་ཡིན་ཅེས་གསུངས།
དེ་བཞིན་སྐུ་ཞབས་ཇུ་ཀོ་ (Juko Kalle Raid) མཆོག་གིས་པཎ་ཆེན་རིན་པོ་ཆེའི་གློད་བཀྲོལ་དང་འབྲེལ་བའི་དྲི་བར་ལན་འདེབས་གནང་དོན། དེ་རིང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་གསུངས་པ་བཞིན་གནས་ཚུལ་འདི་ནི་པཎ་ཆེན་རིན་པོ་ཆེ་ཙམ་མ་ཡིན་པར་འཛམ་གླིང་སྤྱིའི་གནད་དོན་ཞིག་ཆགས་ཀྱི་ཡོད། འདི་ནི་ཁྲིམས་མཐུན་མ་ཡིན་པའི་བྱ་སྤྱོད་དང་འབྲེལ་བ་ཆགས་ཀྱི་ཡོད། བཙན་ཁྲིད་དང་འབྲེལ་བ་ཆགས་ཀྱི་ཡོད། འགྲོ་བ་མིའི་ཐོབ་ཐང་རྡོག་རོལ་བཏང་བ་ཆགས་ཀྱི་ཡོད། ཡིན་ནའང་ང་ཚོས་མུ་མཐུད་ཡུ་རོབ་གྲོས་ཚོགས་ནང་དུ་གནད་དོན་འདིའི་སྐོར་གླེང་ངེས་ཡིན།
དེ་དང་ཕྱོགས་མཚུངས་ཡོང་འགྱུར་ཡུ་རོབ་གྲོས་ཚོགས་ཀྱི་འོས་བསྡུ་སླེབས་ལ་ཉེ་བ་ཡིན་དུས་ང་ཚོའི་ངོས་ནས་གནད་དོན་འདི་ལྟ་བུ་གླེང་རྒྱུའི་ནུས་པ་ཡོད་པའི་འཐུས་མི་རྣམས་འདེམས་རྒྱུ་ཡིན། སྐབས་དོན་རྒྱ་ནག་གི་ཁྲིམས་མཐུན་མ་ཡིན་པའི་བྱ་སྤྱོད་ཅེས་གླེང་བཞིན་ཡོད་མ་གཏོགས་པཎ་ཆེན་རིན་པོ་ཆེ་ཞེས་ལོགས་སུ་གླེང་གི་མེད། ཅེས་དང་། ང་རང་སུ་ཝེཊ་ (Soviet Union) ནང་འཚར་ལོངས་བྱས་པའི་མི་ཞིག་ཡིན་པའི་ཆ་ནས་རྒྱ་ནག་གཞུང་ལ་ཡིད་ཆེས་རྩ་བ་ནས་མེད་བཅས་འགྲེལ་བརྗོད་གནང་སོང་།
དེ་རྗེས་སྐུ་ཞབས་ཧེན་སི་ (Hanns) མཆོག་གིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་མཇལ་སྐབས་ཁོང་གིས་དམག་འཁྲུག་དང་འཚེ་བ་ནི་ནམ་ཡང་ཕན་ཐོགས་མེད་ཅེས་བཀའ་སློབ་གནང་སོང་། སྤྱིར་ཡུ་རོབ་མཐུན་ཚོགས་ནི་རྒྱལ་ཁབ་ ༢༧ ཚུད་པའི་མཐུན་ཚོགས་ཤིག་ཡིན་སྟབས་དལ་པོ་ཡོད། གནད་དོན་འདི་ལྟ་བུའི་ཐོག་གྲོས་མོལ་བྱུང་རྒྱུ་ལས་སླ་པོ་མེད། མ་འོངས་ཡུ་རོབ་མཐུན་ཚོགས་ཐུན་མོང་ནས་རྒྱ་ནག་གི་བྱ་སྤྱོད་ལ་བཀག་སྡོམ་བྱ་རྒྱུའི་རེ་བ་ཡོད་ཅེས་གསུངས་རྗེས་༸གོང་ས་མཆོག་གི་ཡང་སྲིད་དང་འབྲེལ་བའི་ཐོག་སྐུ་ཞབས་རོ་ཧི་ (Roy) མཆོག་གིས་རྒྱ་ནག་གི་དེར་ཐེ་བྱུས་བྱ་རྒྱུ་དེ་དགོད་བྲོ་བའི་གནས་ཚུལ་ཡིན། རྒྱ་ནག་ཙམ་མ་ཟད་གཞུང་གང་འདྲ་ཞིག་གིས་དེ་ལྟ་བུའི་གནད་དོན་ཐོག་ཐེ་བྱུས་བྱ་རྒྱུ་དེ་ཡ་མཚན་རེད། རྒྱ་ནག་གཞུང་ནས་པཎ་ཆེན་རིན་པོ་ཆེ་མཆོག་གི་ཡང་སྲིད་ལ་ཐེ་བྱུས་བྱས་པ་བཞིན་༸གོང་ས་མཆོག་གི་ཡང་སྲིད་ཐད་ཐེ་བྱུས་བྱ་ངེས་ཡིན། འོན་ཀྱང་རྒྱ་ནག་གིས་བསྐོ་བཞག་བྱས་པའི་པཎ་ཆེན་རིན་པོ་ཆེར་སུས་ཀྱང་བརྩི་གི་མ་རེད། དེར་དོ་སྣང་དང་སེམས་ཁྲལ་བྱེད་མི་དགོས་ཞེས་གསུངས་ཡོད་པ་བཅས།།
