༄༅། །ཕྱི་ལོ་ ༢༠༢༤ ཟླ་བ་ ༠༤ ཚེས་ ༢༥ ཉིན་ཀུན་གཟིགས་པཎ་ཆེན་སྐུ་ཕྲེང་བཅུ་གཅིག་པ་བསྟན་འཛིན་དགེ་འདུན་ཡེ་ཤེས་འཕྲིན་ལས་མཆོག་དགུང་གྲངས་ ༣༥ ལ་ཕེབས་པའི་འཁྲུངས་སྐར་དང་བསྟུན་བྱེས་ཀྱི་གདན་ས་བཀྲ་ཤིས་ལྷུན་པོའི་མཁན་པོ་གཟིག་རྒྱབ་རིན་པོ་ཆེ་མཆོག་དང་། ལ་དྭགས་ནང་པའི་ཚོགས་འདུའི་ཚོགས་གཙོ་ལས་ཚབ་རིག་འཛིན་རྡོ་རྗེ་ལགས། ཚེ་མཆོག་གླིང་རིན་པོ་ཆེ་ལྷན་ཞུགས་ཐོག་གདན་ས་བཀྲ་ཤིས་ལྷུན་པོ་དང་། ཧི་མ་ལ་ཡའི་དགོན་པ་དང་ཚོགས་པ་བཞི་ཐུན་མོང་ནས་བཞུགས་སྒར་རྡ་རམ་ས་ལར་ཀུན་གཟིགས་པཎ་ཆེན་པོ་རིན་པོ་ཆེ་འཕྲལ་དུ་གློད་བཀྲོལ་ཡོང་བར་ཞུ་འབོད་རེ་འདུན་དོན་ཚན་ལྔ་ཅན་ཞིག་གསལ་སྟོན་གྱི་གསར་འགོད་གསལ་བསྒྲགས་ཤིག་སྤེལ་ཡོད་པ་རེད།
དེ་ཡང་གསར་འགོད་གསལ་བསྒྲགས་ཐོག་གཟིག་རྒྱབ་རིན་པོ་ཆེ་མཆོག་གིས། དེ་རིང་ང་ཚོས་སེམས་འཚབ་ཆེན་པོའི་ཐོག་རྒྱལ་སྤྱིའི་གཞུང་དང་མཉམ་འབྲེལ་རྒྱལ་ཚོགས། དེ་བཞིན་རྒྱལ་སྤྱིའི་ཚོགས་སྡེ་ཁག་ལ་ང་ཚོའི་གདན་ས་བཀྲ་ཤིས་ལྷུན་པོ་དང་། ཧི་མ་ལ་ཡའི་དགོན་པ་དང་ཚོགས་པ་བཞི་ཟུང་སྦྲེལ་ཞུ་འབོད་རེ་འདུན་དོན་ཚན་ལྔ་ཅན་ཞིག་ཞུ་རྒྱུ་ཡིན།
དང་པོ། ཕྱི་རྒྱལ་གྱི་གཞུང་དང་མཉམ་འབྲེལ་རྒྱལ་ཚོགས། དེ་བཞིན་རྒྱལ་སྤྱིའི་ཚོགས་སྡེ་ཁག་ནས་མི་ལོ་ ༢༩ རིང་གར་སོང་ཆ་མེད་དུ་གྱུར་པའི་བོད་ཀྱི་༸པཎ་ཆེན་རིན་པོ་ཆེ་སྐུ་ཕྲེང་བཅུ་གཅིག་པ་རྗེ་བཙུན་བསྟན་འཛིན་དགེ་འདུན་ཡེ་ཤེས་འཕྲིན་ལས་ཕུན་ཚོགས་དཔལ་བཟང་པོ་ (དགེ་འདུན་ཆོས་ཀྱི་ཉི་མ་) མཆོག་གི་ཛ་དྲག་གནས་སྟངས་ཤེས་རྟོགས་ཡོང་རྒྱུར་རྒྱ་ནག་དུ་ཕྱི་རྒྱལ་གཞུང་ཚབ་མི་སྣས་པཎ་ཆེན་རིན་པོ་ཆེ་དང་དངོས་སུ་མཇལ་འཕྲད་ཐུབ་ཐབས་ཀྱི་གཞུང་འབྲེལ་ཁྲིམས་འཆར་གཏན་འབེབས་གནང་ཐབས་ཡོང་བ་ཞུ་རྒྱུ།
གཉིས་པ། ཕྱི་རྒྱལ་གྱི་གཞུང་དང་མཉམ་འབྲེལ་རྒྱལ་ཚོགས། དེ་བཞིན་རྒྱལ་སྤྱིའི་ཚོགས་སྡེ་ཁག་ནས་༸པཎ་ཆེན་རིན་པོ་ཆེ་སྐུ་ཕྲེང་བཅུ་གཅིག་པ་མཆོག་དགུང་ལོ་དྲུག་ནས་ད་བར་མི་ལོ་ ༢༩ རིང་འགྲོ་བ་མིའི་ཐོབ་ཐང་དང་། ཆོས་དད་རང་མོས། བྱིས་པའི་ཐོབ་ཐང་སོགས་མདོར་ན་འགྲོ་སྡོད་སྤྱོད་གསུམ་གྱི་གཞི་རྩའི་འགྲོ་བ་མིའི་ཐོབ་ཐང་རྩ་བ་ནས་མེད་པའི་ངོས་བཞེས་མཚོན་རྟགས་ཀྱི་གཟེངས་རྟགས་རིགས་འབུལ་ཐབས་ཡོང་བ་ཞུ་རྒྱུ།
གསུམ་པ། ཕྱི་རྒྱལ་གྱི་གཞུང་དང་མཉམ་འབྲེལ་རྒྱལ་ཚོགས། དེ་བཞིན་རྒྱལ་སྤྱིའི་ཚོགས་སྡེ་ཁག་ནས་ཀུན་གཟིགས་༸པཎ་ཆེན་རིན་པོ་ཆེ་མཆོག་མྱུར་དུ་གློད་བཀྲོལ་ཡོང་ཐབས་ཆེད་ཆེ་མཐོང་རྒྱབ་སྐྱོར་མཚོན་ཕྱིར་སྐུའི་འཁྲུངས་སྐར་ཉིན་མོར་སྲུང་བརྩིའི་ལས་འགུལ་ཞིག་སྤེལ་གནང་ཡོང་བ་ཞུ་རྒྱུ།
བཞི་བ། ད་བར་མི་ལོ་ ༢༩ རིང་གར་སོང་ཆ་མེད་དུ་གྱུར་པའི་༸པཎ་ཆེན་རིན་པོ་ཆེའི་ཡང་སྲིད་འཚོལ་ཞིབ་ཚོགས་ཆུང་གི་དབུ་འཛིན་སྐུ་ཞབས་བྱ་བྲལ་རིན་པོ་ཆེ་གཙོས་བོད་ནང་གང་བྱུང་འཛིན་བཟུང་བཙོན་བཅུག་བྱས་པའི་ཆབ་སྲིད་བཙོན་པ་རྣམས་འཕྲལ་དུ་གློད་བཀྲོལ་ཡོང་ཐབས་སུ་རྒྱབ་སྐྱོར་གནང་རོགས་ཞུ་རྒྱུ་དང༌། བོད་ནང་གི་གནས་སྟངས་ད་དུང་ཡང་ཧ་ཅང་གི་ཛ་དྲག་ཡིན་པས་ད་བར་བོད་མི་བརྒྱ་ཕྲག་བརྒྱལ་བས་རང་ལུས་མེར་བསྲེག་གི་རྒྱ་ནག་གཞུང་ལ་ཞི་བའི་ངོ་རྒོལ་བྱེད་བཞིན་ཡོད། ཕྱི་ལོ་ ༢༠༢༢ ནང་རང་ལོ་ ༢༥ ཡིན་པའི་བོད་ཀྱི་ན་གཞོན་གཞས་པ་ཚེ་དབང་ནོར་བུ་ལགས་དང་། རང་ལོ་ ༨༡ ལ་ཕེབས་པའི་བཀྲ་ཕུན་ལགས་གཉིས་ཀྱིས་བོད་ནང་རང་ལུས་མེར་བསྲེག་བྱས་ཡོད། ཁོང་ཚོས་རང་གི་གཅེས་པའི་ཚེ་སྲོག་བློས་བཏང་ནས་བོད་ནང་གི་དངོས་ཡོད་ཀྱི་དཀའ་ངལ་སེལ་ཐབས་སུ་མཉམ་འབྲེལ་རྒྱལ་ཚོགས་དང་འཛམ་གླིང་མི་མང་སར་སྐད་འབོད་བྱེད་བཞིན་ཡོད་པས་ཕྱི་རྒྱལ་གྱི་གཞུང་དང་མཉམ་འབྲེལ་རྒྱལ་ཚོགས། དེ་བཞིན་རྒྱལ་སྤྱིའི་ཚོགས་སྡེ་ཁག་ནས་བོད་ནང་དངོས་ཡོད་ དཀའ་ངལ་ཁག་མྱུར་དུ་སེལ་ཐབས་སུ་སྔར་ལས་རྒྱབ་སྐྱོར་ཤུགས་ཆེན་གནང་རོགས་ཞུ་རྒྱུ་ཡིན།
ལྔ་པ། བོད་མི་མང་གི་མངོན་འདོད་སྤྱི་ནོར་ྋགོང་ས་ྋསྐྱབས་མགོན་ཆེན་པོ་མཆོག་མྱུར་དུ་བོད་ལ་ཕེབས་ཐུབ་ཐབས་དང་། ཁོང་གི་དགོངས་གཞིར་ཡོད་པའི་གཉིས་སྨན་དབུ་མའི་ལམ་གི་བོད་དོན་སྲིད་ཇུས་ལ་མུ་མཐུད་རྒྱབ་སྐྱོར་གནང་རོགས་ཞུ་རྒྱུ།
ད་བར་ཕྱི་རྒྱལ་གྱི་གཞུང་དམངས་དང་མཉམ་འབྲེལ་རྒྱལ་ཚོགས། དེ་བཞིན་རྒྱལ་སྤྱིའི་ཚོགས་སྡེ་ཁག་ནས་བོད་དོན་ཐོག་རྒྱབ་སྐྱོར་ཤུགས་ཆེན་གནང་དང་གནང་བཞིན་པར་ཐུགས་རྗེ་ཆེ་ཞུ་རྒྱུ་དང༌། མ་ཟད་གོང་དུ་ང་ཚོས་སྙན་གསེང་ཞུས་པའི་དོན་ཚན་ལྔ་ཅན་གྱི་ཞུ་འབོད་དེ་དག་བོད་མི་ཙམ་མ་ཟད་སྐྱེ་བོ་ས་ཡ་མང་པོའི་སེམས་ཁམས་དང་དེ་དག་གི་མང་གཙོའི་ཐོབ་ཐང་ཡང་འབྲེལ་བ་ཤུགས་ཆེན་ཞིག་ཆགས་ཡོད་པས་ཕྱི་རྒྱལ་གྱི་གཞུང་དམངས་དང་རྒྱལ་མཉམ་འབྲེལ་རྒྱལ་ཚོགས། དེ་བཞིན་རྒྱལ་སྤྱིའི་ཚོགས་སྡེ་ཁག་ནས་བོད་ནང་གི་དངོས་ཡོད་ཀྱི་ཛ་དྲག་དཀའ་ངལ་སེལ་ཐབས་སུ་རྒྱབ་སྐྱོར་སྔར་ལས་ཤུགས་ཆེན་གནང་རྒྱུར་ང་ཚོའི་རེ་བ་དང་ཡིད་ཆེས་བརྟན་པོ་ཡོད། ཅེས་གསུངས་རྗེས་གཟིག་རྒྱབ་རིན་པོ་ཆེ་དང་། ལ་དྭགས་ནང་ཚོགས་ཀྱི་ཚོགས་གཙོ་ལས་ཚབ་རིག་འཛིན་རྡོ་རྗེ་ལགས་ནས་ཀུན་གཟིགས་པཎ་ཆེན་རིན་པོ་ཆེའི་གནས་སྟངས་དང་། རྒྱལ་སྤྱིའི་སྤྱི་ཚོགས་ནས་ཁོང་ཉིད་གློད་བཀྲོལ་ཡོང་ཐབས་སུ་རྒྱབ་སྐྱོར་གནང་དགོས་པའི་རེ་སྐུལ་དང་སྦྲགས། གསར་འགོད་པའི་དྲི་བར་ལན་འདེབས་གསལ་བཤད་གནང་ཡོད་པ་བཅས།།
