༄༅། །རྒྱལ་བ་སྨན་རི་བའི་སྤྱི་སྤུངས་ཞི་ཁྲོའི་སྨན་སྒྲུབ་ཆེན་མོ་ལེགས་པར་གྲུབ་པའི་གཏོང་རག་བཀྲ་ཤིས་ཀྱི་མཛད་སྒོར་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་སྐུ་མགྲོན་གཙོ་བོར་མགྲོན་འབོད་གནང་དོན་ལྟར། ཕྱི་ལོ་ ༢༠༢༤ ཟླ་བ་ ༠༤ ཚེས་ ༢༦ དགོང་དྲོའི་ཆུ་ཚོད་ ༡༠ ཙམ་ལ་དཔལ་ལྡན་སྲིད་སྐྱོང་མཆོག་བོན་གཞིས་ཌོ་ལན་ཇིར་རྟེན་གཞི་བྱས་པའི་གཡུང་དྲུང་བོན་གྱི་གདན་ས་ཆེན་མོ་དཔལ་གཤེན་བསྟན་སྨན་རིའི་གླིང་དུ་ཕེབས་འབྱོར་བྱུང་ཡོད།
སྐབས་དེར་བོད་མི་མང་སྤྱི་འཐུས་དགེ་བཤེས་སྨོན་ལམ་མཐར་ཕྱིན་ལགས་དང་། སྤྱི་འཐུས་དགེ་བཤེས་ཨ་ཀྲོང་རིན་ཆེན་རྒྱལ་མཚན་ལགས། སྤྱི་འཐུས་དབྲ་ཙ་བསོད་ནམས་ནོར་བུ་ལགས། སྤྱི་ཟུར་བ་ར་ཚེ་དབང་བཀྲ་ཤིས་ལགས། བོད་གཞིས་ཌོ་ལན་ཇིའི་ས་གནས་འགོ་འཛིན་བསྟན་འཛིན་ཆོས་འཕེལ་ལགས། དེ་བཞིན་ས་གནས་འཐུས་ཚོགས་དང་། ས་གནས་རང་བདེན་ཚོགས་ཆུང་། བོད་ཀྱི་བོན་པོ་ཚོགས་པའི་སྐུ་ཚབ། དབུས་གཡུང་དྲུང་བོན་འཛིན་སྐྱོང་ཚོགས་པ། སྨན་རི་དགོན་གྱི་དགེ་འདུན་པ། ས་གནས་གཞོན་ནུ། ས་གནས་གཞིས་མི་སོགས་ནས་ཕེབས་བསུ་ཞུས་ཡོད་པ་རེད།
ཕྱི་ཚེས་ ༢༧ ཉིན་གྱི་སྔ་དྲོ་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་གཡུང་དྲུང་བོན་གྱི་གདན་ས་ཆེན་མོ་དཔལ་གཤེན་བསྟན་སྨན་རིའི་གླིང་དུ་མཆོད་མཇལ་དང་། ༸ཞྭ་དཀར་གཡུང་དྲུང་བོན་གྱི་བསྟན་པའི་གཙུག་རྒྱན་སྐྱབས་རྗེ་རྒྱལ་བ་སྨན་རིའི་ཁྲི་འཛིན་ ༣༤ པ་ལུང་རྟོགས་ཟླ་བ་དར་རྒྱས་རིན་པོ་ཆེ་མཆོག་གི་མཇལ་ཁ་ཞུས་གྲུབ་མཚམས་སྐྱབས་རྗེ་སྨན་རིའི་ཁྲི་འཛིན་དབུ་བཞུགས་ཐོག་མཛད་སྒོར་ཕེབས་ཞུགས་གནང་།
ཉིན་རྒྱབ་ཆུ་ཚོད་ ༠༡ ཐོག་སྨན་རིའི་འདུ་ཁང་ཆེན་མོའི་མདུན་ཐང་དུ་མཛད་སྒོ་དངོས་གཞིའི་ཐོག་༸ཞྭ་དཀར་གཡུང་དྲུང་བོན་གྱི་བསྟན་པའི་གཙུག་རྒྱན་སྐྱབས་རྗེ་རྒྱལ་བ་སྨན་རིའི་ཁྲི་འཛིན་ ༣༤ པ་ལུང་རྟོགས་ཟླ་བ་དར་རྒྱས་རིན་པོ་ཆེ་མཆོག་དང་། གསང་གསུམ་བོན་གྱི་མཛོད་འཛིན་སྐྱབས་རྗེ་སྨན་རིའི་དཔོན་སློབ་འཕྲིན་ལས་ཉི་མ་རིན་པོ་ཆེ་མཆོག བཤད་སྒྲུབ་མཁན་སློབ་རྣམ་གཉིས། སྐུ་མགྲོན་གཙོ་བོ་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག བོད་མི་མང་སྤྱི་འཐུས་དགེ་བཤེས་སྨོན་ལམ་མཐར་ཕྱིན་ལགས་དང་། སྤྱི་འཐུས་དགེ་བཤེས་ཨ་ཀྲོང་རིན་ཆེན་རྒྱལ་མཚན་ལགས། སྤྱི་འཐུས་དབྲ་ཙ་བསོད་ནམས་ནོར་བུ་ལགས། སྤྱི་ཟུར་བ་ར་ཚེ་དབང་བཀྲ་ཤིས་ལགས། བོད་གཞིས་ཌོ་ལན་ཇིའི་ས་གནས་འགོ་འཛིན་བསྟན་འཛིན་ཆོས་འཕེལ་ལགས། དེ་བཞིན་སྨན་རི་དགོན་གྱི་དགེ་འདུན་པ་དང་ས་གནས་བོད་མི། ཕྱོགས་མཐའ་ཁག་ནས་ཕེབས་པའི་དད་ལྡན་མི་མང་སོགས་ལྷན་འཛོམས་ཀྱི་ཐོག་མར་བོན་གཞིས་ཉིན་སློབ་དང་། ས་གནས་གཞིས་མི། གསོ་རིག་འབུམ་བཞིའི་མཐོ་སློབ་ཀྱི་སློབ་ཕྲུག་བཅས་ནས་རིག་གཞུང་འཁྲབ་སྟོན་གནང་རྗེས་སྐུ་མགྲོན་གཙོ་བོ་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་གསུང་བཤད་གནང་དོན། ྋརྒྱལ་བ་སྨན་རི་བའི་སྨན་སྒྲུབ་འོད་ཟེར་འཁྱིལ་བའི་སྒྲུབ་ཆེན་ཐེངས་ ༣༤ པ་ལེགས་པར་གྲུབ་པའི་མཛད་སྒོའི་དབུ་བཞུགས་༸ཞྭ་དཀར་གཡུང་དྲུང་བོན་གྱི་བསྟན་པའི་སྲོག་ཤིང་༸རྒྱལ་བ་སྨན་རི་བའི་ཁྲི་འཛིན་སོ་བཞི་པ་༸སྐྱབས་རྗེ་ལུང་རྟོགས་ཟླ་བ་དར་རྒྱས་དཔལ་བཟང་པོ་མཆོག་གི་དབུས། ༸སྨན་རིའི་དཔོན་སློབ་རིན་པོ་ཆེ་མཆོག་དང་། སྐྱབས་གནས་དགེ་འདུན་གྱི་སྡེ། སྐུ་མགྲོན་རྣམ་པ། མི་མང་རྣམ་པ་བཅས་ལ་འཚམས་འདྲིའི་བཀྲ་ཤིས་བདེ་ལེགས་ཞུ་གི་ཡོད།
བོད་གངས་ཅན་གྱི་ལྗོངས་འདིར་གསོ་རིག་གི་བསྟན་པ་དར་ནས་ལོ་རྒྱུས་ཧ་ཅང་རིང་པོ་ཡོད་པའི་བཞེད་སྲོལ་ཡོད་པ་དང་། དེའི་སྒྲུབ་བྱེད་གཅིག་ནི། ཞྭ་དཀར་གཡུང་དྲུང་བོན་གྱི་སྟོན་པ་གཤེན་རབ་མི་བོ་ཆེས་གསོ་རིག་གི་བསྟན་བཅོས་དུ་མ་མཛད་ཡོད་པ་མ་ཟད། ཁོང་གི་སྐུའི་གདུང་སྲས་བརྒྱད་ཀྱི་ནང་ནས་བགྲེས་པ་དཔྱད་བུ་ཁྲི་ཤེས་ཀྱིས་ཀྱང་གསོ་དཔྱད་ཀྱི་བསྟན་བཅོས་ཁག་ཅིག་གསར་རྩོམ་མཛད་དེ་སྔ་རབས་ཞང་ཞུང་གི་གསོ་རིག་བསྟན་པའི་སྒྲོན་མེ་སྦར་ཚུལ་བོད་ཀྱི་གསོ་རིག་ལོ་རྒྱུས་སྐད་གྲགས་ཆེན་པོ་མང་པོའི་ནང་བཀོད་ཡོད།
ཆོས་རྒྱལ་ཁྲི་སྲོང་ལྡེའུ་བཙན་གྱི་སྐབས་སུ་བོད་ཀྱི་གསོ་རིག་གི་གནད་ཚད་ཧ་ཅང་ཚད་མཐོན་པོར་སླེབས་ཡོད་པའི་རྟགས་མཚན་ཞིག་ནི། བསམ་ཡས་གཙུག་ལག་ཁང་དུ་ཁྱིམ་མཚེས་རྒྱལ་ཁབ་ཀྱི་སྨན་པ་མཁས་པ་དགུ་གདན་དྲངས་ཏེ་གཡུ་ཐོག་རྙིང་མ་ཡོན་ཏན་མགོན་པོ་དང་ཕན་ཚུན་རྒྱལ་སྤྱིའི་རང་བཞིན་ལྡན་པའི་གསོ་རིག་བགྲོ་གླེང་གནང་བ་དང་། ཀོང་པོ་སྨན་ལུང་དུ་གསོ་རིག་སློབ་གྲྭ་ཆེད་འཛུགས་གནང་བའི་ཡོངས་གྲགས་ཀྱི་ལོ་རྒྱུས་ལས་ཤེས་ཐུབ་ཀྱི་འདུག
ལོ་རྒྱུས་ཡུན་རིང་ལྡན་པའི་བོད་ཀྱི་གསོ་བ་རིག་པ་འདི། བོད་གངས་ཅན་གྱི་ལྗོངས་སུ་བྱོན་པའི་མཁས་གྲུབ་མང་པོས་དུས་རབས་སོ་སོར་ལག་ལེན་གྱི་ཉམས་མྱོང་དང་། དཔྱད་བརྡར་གྱི་གྲུབ་དོན་བསྣན་ཏེ་གསོ་དཔྱད་རིག་པའི་བསྟན་བཅོས་བརྒྱ་ཕྲག་དུ་མ་རྩོམ་འབྲི་གནང་ཡོད་པ་དང་། བོད་ཆོལ་ཁ་གསུམ་གྱི་གདན་ས་ཆེ་ཁག་མང་པོའི་ནང་སྨན་པ་གྲྭ་ཚང་ཟུར་འཛུགས་གནང་སྟེ་གསོ་རིག་སློབ་གཉེར་རྒྱུན་སྐྱོང་དང་། གསོ་དཔྱད་ལག་ལེན་རྒྱ་ཁྱབ་ཏུ་གནང་ཡོད་པ་དང་། དེ་ཡང་གསོ་བྱ་དང་གསོ་བྱེད། གསོ་ཐབས། གསོ་མཁན་གྱི་སྒོ་ནས་གཞུང་ལུགས་འཆད་ཉན་དང་ཉམས་ལེན་བྱེད་པ་ཙམ་དུ་མ་ཟད། ཡི་དམ་ལྷ་དང་འབྲེལ་བའི་སྨན་སྒྲུབ་ཀྱི་ཐུན་མོང་མ་ཡིན་པའི་ཕྱག་སྲོལ་ཡང་རྒྱ་ཁྱབ་ཏུ་དར་ཡོད་པ་དེ་དག་གིས་བོད་དང་བོད་མི་རིགས་ལ་ཕན་ཐོགས་རྒྱ་ཆེན་པོ་བསྒྲུབས་ཡོད།
གཡུང་དྲུང་བོན་གྱི་གདན་ས་ཁག་ཏུའང་གསོ་རིག་སློབ་གཉེར་དང་ཉམས་ལེན་གྱི་ལམ་སྲོལ་དར་ཁྱབ་ཆེ་བ་མ་ཟད། སྨན་སྒྲུབ་ཀྱི་ཕྱག་སྲོལ་ཡང་དར་སོ་ཆེན་པོ་ཡོད་འདུག་པ་དང༌། ༸རྒྱལ་བ་སྨན་རི་བའི་སྨན་སྒྲུབ་ཀྱི་ཕྱག་བཞེས་འདི་ཡང་རང་ཅག་གི་གསོ་དཔྱད་རིག་པའི་ཕྱག་སྲོལ་ཐུན་མོང་མ་ཡིན་པ་ཞིག་རེད་འདུག
སྨན་རི་ཁྲི་འཛིན་རིམ་བྱོན་གྱི་སྐུ་ཐོག་རེར་སྨན་རིའི་སྒྲུབ་ཆེན་རེ་འཚོགས་སྲོལ་ཡོད་པ་འདི་ནི་ཞྭ་དཀར་གཡུང་དྲུང་བོན་གྱི་གདན་ས་ཆེན་པོ་སྨན་རི་དགོན་ཕྱག་འདེབས་པ་པོ་མཉམ་མེད་ཤེས་རབ་རྒྱལ་མཚན་མཆོག་གིས་དུས་རབས་བཅོ་ལྔ་པའི་སྟོད་ཀྱི་ཆར་ (༡༤༠༥) སླར་གསོ་སྲོལ་བཏོད་མཛད་པ་ཞིག་ཡིན་འདུག་པ་ལྟར། གདན་ས་འདིའི་ཁྲི་འཛིན་རིམ་བྱོན་གྱིས་ཉམས་པ་མེད་པའི་སྒོ་ནས་ཕྱག་ལེན་དུ་བསྟར་གནང་འདུག
བཙན་བྱོལ་ནང་༸རྒྱལ་བ་སྨན་རི་བའི་ཁྲི་འཛིན་སོ་གསུམ་པ་༸ལུང་རྟོགས་བསྟན་པའི་ཉི་མ་མཆོག་གིས་ཕྱི་ལོ་ ༡༩༨༨ ལོར་སྨན་རིའི་སྒྲུབ་ཆེན་ཚུགས་ཏེ་སྙན་གྲགས་ཆེན་པོ་རྒྱས་ཡོད་པ་རེད། ད་ཐེངས་༸རྒྱལ་བ་སྨན་རི་བའི་ཁྲི་འཛིན་སོ་བཞི་པ་༸སྐྱབས་རྗེ་ལུང་རྟོགས་ཟླ་བ་དར་རྒྱས་དཔལ་བཟང་པོ་མཆོག་དབུ་བཞུགས་ཀྱིས། གདན་ས་ཆེན་མོ་འདིར་ཟླ་ཕྱེད་ལྷག་རིང་ཚུགས་པའི་༸རྒྱལ་བ་སྨན་རི་བའི་སྨན་སྒྲུབ་འོད་ཟེར་འཁྱིལ་བའི་སྒྲུབ་ཆེན་ཐེངས་ ༣༤ པ་ལེགས་པར་གྲུབ་པའི་མཛད་སྒོ་གལ་ཆེན་འདི་ལྟ་བུ་ཞིག་ལ་བཅར་ཞུགས་ཐུབ་པ་ནི་སྐལ་བ་བཟང་པོ་ཞིག་ཏུ་སྒོམ་བཞིན་ཡོད། སྒྲུབ་ཆེན་འདིའི་བྱིན་མཐུ་ལ་བརྟེན་ནས། དེ་རིང་གནས་འདིར་འདུས་པའི་སྐལ་ལྡན་པ་རྣམས་དང་། ཡུལ་ལུང་གང་སར་གནས་པའི་དད་ལྡན་པ་རྣམས་ཀྱི་རྐྱེན་ངན་བར་ཆད་མཐའ་དག་ཞི་བ་དང་། ནད་གདོན་གྱི་འཇིགས་པ་མཐའ་དག་ལས་གྲོལ་ཏེ། ཚེ་བསོད་རླུང་རྟ་དར་བ་དང་། ཡུལ་ལུང་ཀུན་ལ་ཞི་བདེ་ཡོང་བའི་སྐྱབས་སྨོན་ཞུ་བཞིན་ཡོད།
ལྷག་དོན་དུ། ༸སྐྱབས་རྗེ་༸རྒྱལ་བ་སྨན་རི་བའི་ཁྲི་འཛིན་སོ་གསུམ་པ་མཆོག་གིས། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་དགོངས་ལྟར། ཐུགས་སྟོབས་གོ་ཆ་བཙན་པར་བགོས་ཏེ་ཁྲི་འཛིན་གོང་མའི་རྣམ་ཐར་བདག་གིར་བཞེས་བཞིན། བོད་བསྟན་སྲིད་མི་རིགས་ཀྱི་ཆེད་དུ་རླབས་ཆེན་གྱི་མཛད་འཕྲིན་རྒྱ་ཆེར་སྐྱོང་ཕྱིར་སྐུ་ཚེ་རྒྱལ་མཚན་རི་རབ་བཞིན་དུ་བརྟན་པའི་སྐྱབས་འཇུག་ཞུ་བཞིན་ཡོད། ཅེས་གསུང་བཤད་གནང་རྗེས་༸སྐྱབས་རྗེ་རྒྱལ་བ་སྨན་རི་བ་མཆོག་གིས་སྐུ་མགྲོན་གཙོ་བོར་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་ལ་གཟེངས་རྟགས་སྩལ་རྗེས་མཛད་སྒོ་ལེགས་པར་གྲོལ་ཡོད་པ་བཅས།།
